ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރު ނިމި، ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތްއިރު ހުއްޓިފައިވާ މަޝްރޫއުތަކުގެ ތެރެއިން ދެބައިކުޅައެއްބައި މަޝްރޫއުގެ މަސައްކަތް ފަށައިފިއެވެ.
މިސަރުކާރު ޙަވާލުވިއިރު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީ އަދި ރޯޑް ޑެވެލޮޕްމަންޓް ކޯޕަރޭޝަން، އާރުޑީސީއާ ކުރީ ސަރުކާރުން ހަވާލުކޮށްފައިވާ 64 މަޝްރޫއެއް އޮތީ ހުއްޓިފައެވެ.
އެކްސްގައި ޙިއްސާކުރެއްވި ޕޯސްޓެއްގައި މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް ވަނީ ވިދާޅުވީ، މިސަރުކާރު ހަވާލުވިއިރު ހުއްޓިފައިވާ މަޝްރޫއުތަކުގެ ތެރެއިން 32 މަޝްރޫއެއްގެ މަސައްކަތް އަލުން ފަށާފައިވާ ކަމަށް ކަމަށާއި، މިސަރުކާރު ހަވާލުވިއިރު ހުއްޓިފައިވާ 64 މަޝްރޫއަކީ އެމްޓީސީސީ އަދި އާރުޑީސީއާ ޙަވާލުކުރެވި މަސައްކަތް ފެށި ހުއްޓިފައިވާ މަޝްރޫއުތަކެއް ކަމަށެވެ. މީގެ ތެރެއިން 32 މަޝްރޫއެއްގެ މަސައްކަތް އަލުން ފަށާފައިވާ ކަމަށް މުއްޠަލިބް ވިދާޅުވިއެވެ.
މީގެ އިތުރުން މިދެކުންފުންޏާއެކު ސޮއިކޮށް މަސައްކަތް ފަށާފައިނުވާ 83 މަޝްރޫޢެއް އެބައޮތް ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު މުއްޠަލިބް ވިދާޅުވި ގޮތުގައި، ފެނަކަ ކޯޕަރޭޝަން، އެމްޑަބްލިއުއެސްސީ އަދި އަމިއްލަ ކުންފުނިތަކާ ޙަވާލުކުރެވިފައިވާ ވަރަށް ގިނަ މަޝްރޫއުތަކެއްވެސް ހުރީ ނުފެށި ނުވަތަ މަސައްކަތް ހުއްޓިފައެވެ. ސަރުކާރުގެ އަމާޒަކީ ހުއްޓިފައިވާ ހުރިހާ މަޝްރޫއެއް ވީހާވެސް އަވަހަކަށް ފެށުން ކަމަށްވެސް އެމަނިކުފާނު ވިދާޅުވިއެވެ.
މިނިސްޓަރު މިހެން ވިދާޅުވެފައިމިވަނީ ކުރީ ސަރުކާރުން ފަށާފައިވާ މަޝްރޫއުތަކުގެ ތެރެއިން 70 ނުވަތަ 80 ޕަސެންޓް މަސައްކަތް މިސަރުކާރުން ހުއްޓާލާފައިވާ ކަމަށް ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވުމާ ގުޅިގެންނެވެ.
