އިސްލާމީ މުހިއްމު މުނާސަބަތުތައް ގައުމީ ފެންވަރެއްގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފާހަގަކުރަން ސަރުކާރުން މަޝްވަރާކޮށްފިއެވެ.
ރައީސް އޮފީހުގައި އޮތް ޕްރެސް ކޮންފަރެންސްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް މިއަދު ވިދާޅުވީ، އިސްލާމީ މުހިއްމު މުނާސަބަތުތައް ގައުމީ ފެންވަރެއްގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފާހަގަ ކުރަން ސޯޝަލް ކައުންސިލްގައި މަޝްވަރާ ކުރައްވާފައިވާ ކަމަށާއި، އެގޮތުން އެ ރަށެއްގެ ކައުންސިލްތަކާއި ޖަމިއްޔާ، ޖަމާއަތްތައް ގުޅިގެން އެކަން ކުރެވިދާނެ ގޮތުގެ މަޝްވަރާ ކުރެއްވި ކަމަށެވެ.
ފާހަގަކުރަން މަޝްވަރާކުރެވުނު ބައެއް މުނާސަބަތުތަކުގެ ތެރޭގައި، ރަމަޟާން މަހުގެ މުނާސަބަތު ފާހަގަ ކުރުމާއި، ދެ އީދު ދެ ދުވަސް ފާހަގަ ކުރުމާއި، ރާއްޖެ އިސްލާމްވި ދުވަސް ފާހަގަކުރުން ހިމެނެއެވެ.
ރައީސް މުޢިއްޒުގެ ސަރުކާރުން އަންނަނީ ދީނީ އަދި ގައުމީ ކަންކަން ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އޭގެ ތެރޭގައި، ސްކޫލު އެސެމްބްލީގައި ޤައުމީ ސަލާމް ކިއުމާއި ސްކޫލުތަކުގައި ގައުމިއްޔަތާ ގުޅޭ މާއްދާއެއް ކިޔަވައިދިނުން ހިމެނެއެވެ.
އިސްލާމީ ޝިޢާރުގެ އަޑު ދިވެހި ފަޒާގައި ގުުގުމާލުމަށް ގިނަ މަސައްކަތްތަކެއް މިސަރުކާރުން ކުރައްވަން ނިންމަވާފައިވާއިރު، މުސްލިމުން ފާހަގަކުރާ ފިތުރު އީދާއި އަޟްހާ އީދުގައި ހުރިހާ ސިޓީތަކަކާއި ވެރިކަން ކުރާ ރަށްތަކުގައި ބޮކި ދިއްލައި ޒީނަތްތެރިކޮށް، ތަކުބީރުގެ އަޑުން ގުގުމާލާނެ ކަމަށް ރައީސް ޑރ. މުހައްމަދު މުއިއްޒު މީގެކުރިން ވަނީ ވިދާޅުވެފައެވެ.
