އިސްރަށްވެހިންނަށް ޚާއްސަ ކްލިނިކަކާއި އެފަރާތްތަކުން ހޮސްޕިޓަލަށް އައުމުގެ ބަދަލުގައި ގޭގައި ތިބެގެން މެމޯ ހެއްދުމުގެ ޚިދުމަތް ރަސްމީކޮށް ތަޢާރަފްކޮށްފިއެވެ.
މިކަމަށްޓަކައި ބޭއްވެވި ރަސްމިއްޔާތުގައި މިޚިދުމަތް ތަޢާރަފްކޮށްދެއްވައި، ޞިއްޙަތާ ބެހޭ ވަޒީރު ޑރ. ޢަބްދުﷲ ޚަލީލު ވިދާޅުވީ އިސްރަށްވެހީންނަށް ޚާއްސަކޮށް ޞިއްޙީ ޚިދުމަތް ފޯރުކޮށްދޭ ކްލިނިކަކާއި ގޭގައި ތިބެގެން މެމޯ ހެއްދޭނެ މަގުފަހިވެގެން ދިއުމަކީ ޒަމާންތަކެއް ވަންދެން އެފަރާތްތަކުން ކުރަމުން އައި އުންމީދުތައް ހަގީގަތަކަށް ވެގެން ދިއުން ކަމަށެވެ. ވަޒީރު ޚަލީލް ވިދާޅުވީ މިކްލިނިކުން އުމުރުން ދުވަސްވީ ފަރާތްތަކަށް ޚާއްސަ ސަމާލުކަމެއް ދީގެން ޞިއްޙީ ޚިދުމަތް ދިނުން ކުރިއަށް ގެންދަވާނެކަމަށެވެ.
މި ޚިދުމަތް ފަށާފައިވަނީ އައިޖީއެމްއެޗުގައެވެ. ރާއްޖޭގެ ހުރިހާ އަތޮޅަކަށް ފުޅާކުރެއްވުމަކީ ރައީސުލްޖުމްހޫރިއްޔާގެ މުހިންމު ވަޢުދުފުޅެއް ކަމަށް ހާމަކުރައްވަމުން ވަޒީރު ވިދާޅުވީ މިޚިދުމަތް ރާއްޖޭގެ ހުރިހާ އަތޮޅަކަށް ފުޅާކުރުމުގެ މަސައްކަތް ރައީސްޖުމްހޫރިއްޔާ ކަނޑައަޅުއްވާ ގޮތެއްގެ މަތިން ޞިއްޙީ ވުޒާރާއިން ކުރިއަށް ގެންދަވާނެކަމަށެވެ. އަދި މިޚިދުމަތް ފުޅާކުރެއްވުމުގެ ގޮތުން އަވަށްޓެރި އެހެން ޤައުމުތަކާއި ވާހަކަދައްކަވަމުން އަންނަކަމަށް ޞިއްޙަތާ ބެހޭ ވަޒީރު ވިދާޅުވިއެވެ.
ރާއްޖޭގެ ޞިއްޙީ ދާއިރާގެ ބޭފުޅުންނާއި މިދާއިރާއިން ތަޢުލީމު ހާސިލްކުރަން ބޭނުންވާ ފަރާތްތަކަށް އެ ފުރުސަތު ހޯދައިދިނުމުގެ މަސައްކަތްކުރަމުންދާ ކަމަށް ވިދާޅުވިއެވެ. ހަމައެއާއެކު ރާއްޖޭގައި ތަޢުލީމު ފޯރުކޮށްދޭ ފަރާތްތަކާއެކުވެސް މި ޚިދުމަތަކާއި ގުޅޭ ޢިލްމު ފޯރުކޮށްދޭނެ ގޮތްތަކާ ބެހޭގޮތުން މަޝްވަރާކުރައްވަމުންގެންދަވާ ކަމަށް މިހާރު ތައްޔާރުވަނީ ރާއްޖޭގެ ޤައުމީ ޔުނިވަރިސޓީ އާއި ވާހަކަދައްކައިގެން އެ ޔުނިވަރސިޓީ ތެރޭގައިވެސް ކިޔަވައިދޭ ކިޔެވުމުގައި އޭގެ ޚާއްސަ މޮޑިއުލްތަކެއް ތައްޔާރުކުރުމުގެ މަސައްކަތް ކަމަށާއި، މިކަން ފުޅާކޮށް ފެށިގެންދާއިރުގައި ރާއްޖޭގައި ޖެނެޓިކް ކެއަރ ނުވަތަ ދުވަސްވީ ބޭފުޅުންނަށް ޚިދުމަތްދިނުމުގެ ފަންނު ނުވަތަ ތަޢުލީމު އުނގެނުން ތަޢާރަފްކުރެވި ކުރިއަށްދާނެ ކަމަށް ޞިއްޙަތާ ބެހޭ ވަޒީރު ޚަލީލް ވިދާޅުވިއެވެ.
ޖެނެޓިކް ކެއަރ ނުވަތަ ދުވަސްވީ މީހުންނަށް ޞިއްޙީ ޚިދުމަތް ފަށަން ބޭނުންވާ ފަރާތްތައް ޞިއްޙީ ދާއިރާގައި ތިބިކަން ފާހަގަކުރައްވަމުން ވަޒީރުވަނީ ދުވަސްވީ މީހުންނަށް ޞިއްޙީ ޚިދުމަތް ފޯރުކޮށްދޭއިރު، އެފަރާތްތަކަށް އޯގާތެރިކަމާ އަޅާލުން އިހުސާސްވާގޮތަށް ޚިދުމަތް ދިނުމަށް ވަޒީރު އިލްތިމާސްކުރައްވާފައެވެ.
މިރަސްމިއްޔާތުގައި ވާހަކަދައްކަވަމުން ދަރުމަވަންތަ ހޮސްޕިޓަލުގެ ޗީފް އެގްޒެކެޓިވް އޮފިސަރ، އިބްރާހިމް އަބްދުރައްޒާޤު ހަލީމް ވިދާޅުވީ މިހާރު ރާއްޖޭގެ ނިސްބަތުން ޒުވާނުންނަށްވުރެ ދުވަސްވީ މީހުންގެ އަދަދު ގިނަކަމަށާއި، އެހެންކަމުން އެމީހުންގެ ޞިއްޙީ ދުޅަހެޔޮކަން ކަށަވަރުކޮށް އެފަރާތްތަކަށް ބޭނުންވާ ފެންވަރު ރަނގަޅު ޚިދުމަތް ފޯރުކޮށްދިނުމަށް ސަރުކާރުން ފެއްޓެވި މި މަސައްކަތަކީ މުހިންމު އަދި ބޭނުންތެރި ކަމެއް ކަމަށާއި، އިސްރަށްވެހިންނަށް ނުވަތަ 65 އަހަރުން މަތީގެ ބޭފުޅުންނަށް ގޭގައި ތިބެގެން މެމޯ ހެއްދުމުގެ އިންތިޒާމް އަދި ހަމައެއާއެކުގައި އެބޭފުޅުންނަށް ޚާއްސަ އިންޓަރނަލް މެޑިސިން އޯޕީޑީއެއް ޤާއިމްކުރުމުގެ މަސައްކަތް ފެށިގެންދާކަމަށް ދަރުމަވަންތަ ހޮސްޕިޓަލުގެ ސީއީއޯ އަބްދުއްރައްޒާޤު ހަލީމް ވިދާޅުވިއެވެ.
އޭނާ ވިދާޅުވީ 2 މަސްތެރޭގައި ސަރުކާރުން ޞިއްޙީ ދާއިރާއަށް ނުހަނު ބޮޑު ކުރިއެރުމެއް ގެނެސްދެއްވާފައިވާ ކަމަށާއި ޞިއްޙީ ދާއިރާ ތަރައްޤީކޮށް ރާއްޖޭގައި ފޯރުކޮށްދޭ ޚިދުމަތްތައް ފުޅާކޮށް ހަރުދަނާކުރުމަށް ރައީސުލްޖުމްހޫރިއްޔާ ގިނަ މަސައްކަތްތަކެއް ކުރައްވަމުން އަންނަ ކަމަށް ޢަބްދުރައްޒާޤު ހަލީމް ވިދާޅުވިއެވެ.
އިސްރަށްވެހީންނަށް ޚާއްޞަ ޞިއްޙީ ފަރުވާ ލިބޭނެ އިންތިޒާމުތައް ފުޅާކުރުމުގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހަފްތާ-14 މަގުޗާޓުގައިވެސްވަނީ ހިމަނުއްވާފައެވެ.
