މަތީ ތައުލީމު ހާސިލު ކުރާ ލޯފަން ކުދިންނަށް އެހީވުމަށް ޓަކައި، ލައިބްރަރީތަކުގައި ހުރި ފޮތްތަކުގެ އޯޑިއޯ ރެކޯޑިން ހެދުމުގެ މަޝްރޫއެއް ފައްޓަވާނެ ކަމަށް އިސްލާމީ ކަންކަމާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ރައްޔިތުންގެ ސުވާލުތަކަށް ވަޒީރުން ޖަވާބު ދިނުމަށް ބާއްވާ 'އަހާ’ގެ ފުރަތަމަ ފޯރަމްގައި، ވާހަކަދައްކަވަމުން ޝަހީމް ވިދާޅުވީ، ޚާއްސަ އެހީއަށް ބޭނުންވާ ފަރާތްތަކުގެ ތެރެއިން ލޯފަން މީހުންނަށް އެންމެ ގިނަ ވަޒީފާ ފުރުސަތު ފަހިކޮށްދީފައިވާ ވުޒާރާއަކީ އިސްލާމީ ކަންތައްތަކާ ބެހޭ ވުޒާރާއިން ކަމަށާއި ރައީސުލްޖުމުހޫރިއްޔާ ޑރ. މުހައްމަދު މުޢިއްޒު އެންމެ އިސްކަންދެއްވާ އެއް ދާއިރާއަކީ ޚާއްސަ އެހީއަށް ބޭނުންވާ ފަރާތްތަކުގެ ދާއިރާ ކަމަށެވެ.
ޝަހީމް ވިދާޅުވީ ލޯފަން ބޭފުޅުންގެ ތެރެއިން މަތީ ތައުލީމު ހާސިލު ކުރަން ބޭނުންވާ މީހުންނަށް ފުރުސަތު ފަހި ކޮށްދިނުމަށް މަސައްކަތް ކުރައްވަމުންދާ ކަމަށެވެ.
ނުކުޅެދުންތެރިކަން ހުންނަ މީހުންނަށް މިސްކިތް ތަކަށް ވަނުމަށް ކުރިމަތިވާ އުނދަގޫތައް ހައްލު ކުރުމަށް ކަމާއި ބެހޭ އިދާރާތަކާއެކު މަސައްކަތް ކުރައްވާނެ ކަމަށް ވެސް ޝަހީމް ވަނީ ވިދާޅުވެފަ އެވެ.
