މަސްތުވާތަކެތި ބޭނުންކުރާ ފަރާތްތަކަށް ރިހެބިލިޓޭޝަން ފަރުވާދޭން ރާއްޖޭގެ ތިން ސަރަހައްދެއްގައި ރިހެބިލިޓޭޝަން ފަރުވާ ދޭ ސެންޓަރުތައް ގާއިމުކުރުމަށް ނޭޝަނަލް ޑްރަގް އެޖެންސީ (އެންޑީއޭ) އިން ދިރާސާތައް ކުރަމުން އަންނަ ކަމަށް އެއެޖެންސީން ހާމަކޮށްފިއެވެ.
ސަރުކާރުން ހާމަކުރައްވާފައިވާ ގޮތުގައި، ރިހެބިލިޓޭޝަން ފަރުވާ ދިނުމަށް މަރުކަޒުތައް ގާއިމު ކުރުމަށް ނިންމާފައިވަނީ ކ. ކާށިދޫ އާއި ނ. ވެލިދޫ އަދި ލ. އަތޮޅުގައެވެ. މަސްތުވާތަކެތި ބޭނުންކުރާ ފަރާތްތަކަށް ފަރުވާދޭން ރާއްޖޭގެ ތިން ސަރަހައްދެއްގައި ރިހެބިލިޓޭޝަން ފަރުވާ ދޭ ސެންޓަރުތައް ގާއިމުކުރުމަށް ވަޒީރުންގެ މަޖިލީހުން ނިންމާފައިވަނީ މިމަހުގެ ކުރީކޮޅުއެވެ.
މިކަމާ ބެހޭގޮތުން މަޢުލޫމާތު ދެއްވަމުން، އެންޑީއޭއިން ވިދާޅުވީ މަސްތުވާތަކެތީގެ ގާނޫނުގައި ބަޔާން ކުރާފަދަ، ފަރުވާދޭ މަރުކަޒުތައް ރާއްޖެ އާއި ރާއްޖޭން ބޭރުގައިވެސް އަމިއްލަ ފަރާތްތައް މެދުވެރިކޮށް ޤާއިމުކޮށް ހިންގުމާ ގުޅޭގޮތުން މަޝްވަރާ ކޮށްފައިވާ ކަމަށެވެ. އެގޮތުން، ލ. އަތޮޅުގައި ޕްރޮގްރާމް ހިންގާނޭ ރަށެއް ކަނޑައެޅުމުގެ ގޮތުން، އަތޮޅުގައި މަސްތުވާތަކެތީގެ ހާލަތު ދެނެގަތުމަށް، އެންޑީއޭއިން ވަނީ މި މަހުގެ 24 އިން 28 އަށް އަތޮޅުގެ 11 ރަށަކަށް ދަތުރުކޮށް ކައުންސިލްތަކާއި ބައްދަލުކޮށްފައެވެ.
އެ އިދާރާއިން ހިންގާ ދިރާސާ ދަތުރުގައި އެންޑީއޭގެ ސީއީއޯ އިމާދް ސާލިޙް އަދި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސީނިއަރ ޕޮލިޓިކަލް ޑައިރެކްޓަރ އިސްމާއިލް އިބްރާހީމް ބައިވެރިވެ ވަޑައިގެންފައެވެ. އެ އިދާރާއިން ވިދާޅުވާ ގޮތުގައި، ލ.އަތޮޅުގައި ރިހެބިލިޓޭޝަން ޕްރޮގްރާމް ހިންގާނެ ރަށެއް ކަނޑައަޅާނީ އަތޮޅު ކައުންސިލާ މަޝްވަރާ ކުރެއްވުމަށްފަހުގައެވެ.
