ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އަޒުލުކުރަން ޖެހޭނީ ސަރުކާރު ތަމްސީލު ކުރައްވާ މަޖިލިސް މެންބަރުންގެ ފުރާނަ ދުއްވާލުމަށްފަހު ކަމަށް ވެރިކަން ކުރަ ޕީއެންސީގެ ޕާލަމެންޓަރީ ގްރޫޕުގެ ލީޑަރު އަޙްމަދު ސަލީމް މިއަދު ވިދާޅުވެއްޖެ އެވެ.
ރައީސް ޑރ. މުޢިއްޒު އަޒުލު ކުރުމުގެ މަސައްކަތް އިދިކޮޅު ޕާޓީތަކުން ފަށާފައިވާތީ އެކަމަށް އިޝާރާތް ކުރައްވާ، މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި، ސަލީމް ވިދާޅުވީ ރައީސް އަޒުލު ކުރުމަށް ސޮއި ހަމަކުރި ނަމަވެސް އެ ފުރުސަތު ސަރުކާރު މެންބަރުން ނުދޭނެ ކަމަށެވެ.
"އަޒުލު ކުރުމުގެ މަސައްކަތަކީ އެބޭފުޅުން ކުރާ މަސައްކަތެއް، އަޅުގަނޑުމެންގެ މަސައްކަތެއް ނޫން. އަޅުގަނޑުމެން މިއުޅެނީ ރައީސް އަޒުލު ކުރާކަށް ނޫން، އެކަމަށް ފުރުސަތެއް ވެސް ނުދޭނަން، އަޅުގަނޑުމެން އެކަން ހުއްޓުވާނަން. އަޅުގަނޑުމެންގެ ފުރާނަ ދުއްވާލާފަ ރައީސް އަޒުލު ކުރަން ޖެހޭނީ،" ސަލީމް ވިދާޅުވިއެވެ.
ރައީސުލްޖުމްހޫރިއްޔާ އަޒުލު ކުރުމުގެ ގަރާރު ރައްޔިތުންގެ މަޖިލީހަށް ހުށަޅަން 34 މެމްބަރަކު ސޮއި ކޮށްފައިވާ ކަމަށް މި ނޫހަށް މައުލޫމާތު ލިބިފައިވެއެވެ. ގަރާރު ހުށަހަޅަން ބޭނުން ވަނީ 26 ސޮޔެވެ.
ރައީސް އަޒުލުކުރުމަށް އެމްޑީޕީ މެމްބަރުން ސޮއި ހަމަ ކުރީ ބައެއް ވަޒީރުންނަށް ރުހުން ނުދޭނެ ކަމަށް އެމްޑީޕީ މެމްބަރުން ހާމަކުރުމުން ވަޒީރުންނަށް ރުހުން ދިނުމަށް ނަގާ ވޯޓު ނެގިޔަ ނުދިނުމަށް ސަރުކާރު މެމްބަރުން މަޖިލީހަށް ހުރަސް އަޅަމުން ދިޔަ ވަގުތުގައެވެ. މިހާރު ތިން ވަޒީރުން ފިޔަވައި އެހެން ހުރިހާ ވަޒީރުންނަށް ރުހުން ދީފައިވާއިރު، ރައީސް އަޒުލުކުރުމާ ގުޅޭ ގޮތުން ރަސްމީކޮށް އިދިކޮޅު ޕާޓީން އެއްޗެއް ހާމަކޮށްފައެއް ނުވެއެވެ.
މި މައްސަލައިގައި މަޖިލީހުގެ އިދާރާގައި ނޫސްވެރިންނާއި ބައްދަލު ކުރައްވައި ސަލީމް ވިދާޅުވީ، ކެބިނެޓަށް ރުހުން ނުދީ ތިން މަސް ހިފެހެއްޓުމަށް ފަހު ޒާތީ ހަސަދަތަކެއްގެ ތެރެއިން ތިން ވަޒީރަކަށް ރުހުން ނުދޭން ނިންމާފައި ވަނީ ވަރަށް ޒިންމާދާރުކަން ކުޑަކޮށް ކަމަށެވެ. ރުހުން ނުދޭން ނިންމި ތިން ވަޒީރުންނަކީ ވެސް ދާއިރާގެ އިލްމު އުނގެނިގެން ތިބި، އަދި ކަމަށް ގާބިލު އެންމެ އެކަށީގެންވާ ބޭފުޅުން ނަމަވެސް ރުހުން ނުދޭން ނިންމާފައި ވަނީ ޖެއްސުން ކުރުމަށްކަމަށް ސަލީމް ވިދާޅުވިއެވެ.
ސަލީމް ވިދާޅުވީ ވަޒީރުންނަށް ރުހުން ނުދޭން އުޅޭތީ އެކަމާ ތަކުރާރުކޮށް އެމްޑީޕީގެ މެމްބަރުންނާ ވާހަކަ ދެއްކެވިކަމަށާއި، އެއްވެސް މަގުބޫލު ސަބަބެއް ނެތި އެގޮތަށް ހަމަ ނިންމެވީކަމަށް ބައެއް މެމްބަރުން ވިދާޅުވެފައިވާ ކަމަށެވެ.
ސަލީމް ވިދާޅުވީ އެމްޑީޕީގެ މެމްބަރުން އެގޮތަށް ނިންމާފައި ވަނީ، ވަކި ބަޔަކު އެގޮތަށް ބޭނުންވެގެން އެންގި ގޮތަށް ވޯޓު ދިނުމަށެވެ.
ތިން ވަޒީރުންނަށް ރުހުން ނުދިނީ ސަަލީމް ވިދާޅުވީ ގޮތުގައި މަޖިލީހުގެ މެމްބަރުންނަށް ވުރެ ބޮޑަށް އެމްޑީޕީގެ ލީޑާޝިޕުން އެގޮތަށް ބޭނުންވާތީއެވެ.
މަޖިލީހުން އިއްޔެ ނިންމީ ބަންޑާރަ ނައިބު އަހުމަދު އުޝާމް އާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރަށް ރުހުން ނެތް ކަމަށެވެ. ނަމަވެސް އޭގެ ފަހުން އެ ތިން ބޭފުޅުން ވަނީ އަނެއްކާ ވެސް ކެބިނެޓަށް އައްޔަނުކޮށްފައެވެ.
