ހުޅުމާލެ ފޭސް 2 ގައި އާއްމު ބަލިތަކަށް ހިމެނޭހެން ތެލަސީމިއާއަށް ހާއްސަ ހޮސްޕިޓަލެއް އަޅަން ނިންމާފައިވާކަމަށް ސިއްހީ ވަޒީރު ޑރ. އަބްދުﷲ ހަލީލް ވިދާޅުވެއްޖެއެވެ.
މިދިޔަ ބުރާސްފަތި ދުވަހު ތެލެސީމިއާ ކޮންޓްރޯލް ކުރުމުގެ ގައުމީ ކެމްޕެއިން ފެށުމަށް ބޭއްވި ރަސްމިޔާތުގައި މުހާތަބުކުރައްވަމުން ވަޒީރު ޑރ. ހަލީލް މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން ހުޅުމާލޭގެ ފޭސް 2 ގައި ތެލެސީމިއާއަށް ޚާއްސަ ހޮސްޕިޓަލެއް އަޅަން ނިންމާފައިވާކަމަށެވެ. އަދި އެކަމަށް ފޭސް 2 ކުން 71،000 އަކަފޫޓުގެ ބިމެއް ސިއްހީ ވުޒާރާއަށް ލިބިފައިވާކަން ވަޒީރު ފާހަގަކުރެއްވިއެވެ.
މި އަހަރު ތެރޭގައި ހޮސްޕިޓަލް އެޅުމުގެ މަސައްކަތް ފެށޭތޯ މަސައްކަތްކުރަމުން އަންނަ ކަމަށް ވަޒީރު ވިދާޅުވިއެވެ.
ރާއްޖޭގައި ތެލެސީމިއާ ޕޭޝަންޓުން ގިނަވަމުންދާކަން ފާހަގަކުރައްވާ ވަޒީރު ވިދާޅުވީ، ތެލެސީމިއާ ޕޭޝަންޓުންނަށް ރަނގަޅު ފަރުވާ ލިބެންޖެހޭކަމަށެވެ.
ތެލެސީމިއާ ކުދިންނަށް ބޭނުންވާ ސައިކޮލޮޖިކަލް ސަޕޯޓާއި އެކުދިންނަށް ބޭނުންވާ ހާއްސަ ފަރުވާތައް ލިބެންޖެހޭކަމަށެވެ. އަދި މިހާރު ރާއްޖޭގައި ތެލެސީމިއާ ކުދިންނަށް ދިމާވެފައިވާ އެންމެ ބޮޑު އެއް ދައްޗަކީ ލޭ ލިބުމުގެ ދަތިކަމާއި، އެކަމަށް ހައްލެއް ގެނައުމުގެ ގޮތުން ފެންވަރު ރަނގަޅު ބްލަޑް ބޭންކެއް ގާއިމްކުރާނެކަމަށް ވަޒީރު ވިދާޅުވިއެވެ.
ހަމައެއާއެކު، ތެލެސީމިއާއަށް ހާއްސަ ހޮސްޕިޓަލަކީ ހަމައެކަނި ލޭއެޅުމަށްފަހު ގެއަށް ދާންޖެހޭ ތަނަކަށް ނުވެ، ރަށްރަށުން ހޮސްޕިޓަލުގެ ހިދުމަތް ހޯދަން އަންނަ ފަރާތްތަކަށް ހޮސްޕިޓަލުގައި ހުރެވޭނެ ޖާގަ ކަށަވަރުކޮށްދޭންޖެހޭކަމަށް ވަޒީރު ވިދާޅުވިއެވެ.
ކުދިންނަށް މުނިފޫހި ފިލުވުމުގެ ގޮތުން ކުދިންގެ ސަމާލުކަން ދަމައިގަތުމަށް ކުދިން ކުޅޭނެ ސަރަހައްދެއް ގާއިމްކުރުމާއި ލައިބްރަރީއެއް ގާއިމް ކުރުމަކީ މުހިއްމު ކަމެއްކަން އެމަނިކުފާނު ފާހަގަކުރެއްވިއެވެ.
ގާތްގަނޑަކަށް 40،000 މީހުންގެ އާބާދީއެއް ދިރިއުޅޭ ފޭސް 2 ކަށް ހޮސްޕިޓަލެއް ބޭނުންވާކަން އެމަނިކުފާނު ފާހަގަކުރެއްވިއެވެ. އަދި ގާއިމްކުރެވިގެންދާ ތެލެސީމިއާއަށް ހާއްސަ ހޮސްޕިޓަލަކީ ޖާގައިގެ ދަތިކަން ދިމާނުވާނެފަދަ ހޮޮސްޕިޓަލަކަށް ވާންޖެހޭކަން ވަޒީރު ފާހަގަކުރެއްވިއެވެ.
