ސިޔާސީ ގޮތުން އިސް ސަފުގައި ގިނަ ޒުވާނުންތަކެއް ހަރަކާތްތެރިވި ދަ ޑިމޮކްރެޓްސް ޕާޓީގައި ޒުވާނުންނަށް ފުރުސަތު ނެތް ކަމަށް ބުނެ ފާޑުކިޔަންފަށައިފިއެވެ.
ޒުވާނުންނަށް ފުރުޞަތުތައް ހުޅުވާލައި، ޑިމޮކްރެސީގެ މަގުގައި ދަތުރުކުރުމަށްޓަކައިި އުފެއްދެވި ދަ ޑިމޮކްރެޓްސް ޕާޓީއަކީ ގިނަ މެންބަރުންތަކެއް އެމްޑީޕީން ވަކިގެެން އުފެއްދި ޕާޓީއެކެވެ. އެ ޕާޓީގައި އިސްކޮށް އުޅުއްވި, ކުރީގެ ރައީސް, ރައީސް ނަޝީދު ވަނީ ސިޔާސީ މައިދާނުން ދުރަށް ޖެހި ވަޑައިގެންފައެވެ. އެތެރޭގެ އިންތިޚާބެއް ބާއްވާ, ޕާޓީގެ ރައީސް ކަމާ ހަވާލުވެ ވަޑައިގެން ހުންނެވީ, ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ.
ޔަންގް ޑެމްސްގެ ލީޑަރު ކަަމަށް ވާދަކުރެއްވި އެ ޕާޓީގެ ހަރަކާތްތަކުގައި އެންމެ އިސްކޮށް ހަރަކާތްތެރިވާ ޒުވާނެއް ކަމަށްވާ, ޔޫސުފް ޝާހްގެ ވެސް ވަނީ ކަންބޮޑުވުން ފާޅުކޮށްފައެވެ.
ޑިމޮކްރެސީގެ އަސާސްތަކުގެ މަތީގައި ޕާޓީ އުފެދިިގެން އައިއިރު ޒުވާނުންނަށް ފުރުސަތު ދޭން އެ ޕާޓީން ވަނީ, ޔަންގް ޑެމްސްގެ ނަމުގައި ގުނަވަނެއް އުފައްދާފައެވެ. އެއީ ޒުވާނުންނަށް ބަސް ކިޔޭނެ, ޒުވާނުންގެ އަޑު އިއްވާނެ, ޒުވާނުން ރިޕްރެޒެންކޮށްދޭން ބަޔަކު އުފެއްދުމަށް އޭރު ކުރި ކަމެކެވެ. އެހެންނަމަވެސް މިއަދު ޒުވާން ޑިމޮކްރެޓުން ވަނީ ޕާޓީގެ އުސޫލުތަކާ މެދު ހިތްހަމަ ނުޖެހިފައެވެ.
އެންމެ ބޮޑަށް ކަންބޮޑުވުން ފާޅުކޮށްފައިވަނީ، ޑިމޮކްރެޓްސްގެ ޕާޓީގެ ރައީސްގެ ކައުންސިލް އެކުލަވާލިއިރު ޔަންގް ޑެމްސްގެ ޝާމިލުވުމެއް ހިމެނިފައި ނުވުމުންނާއި، އެތެރޭގެ އިންތިޚާބު ބޭއްވިތާ 2 މަސްވިއިރުވެސް, ޔަންގް ޑެމްސްގެ ލީޑަރުގެ މަޤާމުގެ އެއްވެސް މަޢުލޫމާތެއް ފޯރުވެފައި ނެތުމުންނެވެ.
