އަޤްޞާގެ ޠޫފާން – 6

އައްޝައިޚް ޙަސަން ލަޠީފް މޫސާ
10 ފެބްރުއަރީ 2024, 12:48

•[އަޔަންޑޯމް] އަށް އޮޅުވާލުން:

އަޔަންޑޯމްއަކީ އިޒްރޭލުގެ ދިފާޢީ އައްޑަނައެވެ. އަޤްޞާގެ ޠޫފާނުގެ ތެރޭގައި މި ވަރުގަދަ އައްޑަނައަށް ކުރިމަތިވަމުން އަންނަ ގޮންޖެހުންތައް ދަނީ ފެންނަމުންނެވެ. މުޖާހިދުންގެ ފެކްޝަންތަކުން ދަނީ އަޔަންޑޯމަށް އޮޅުވާލައި އޭގެ މަސައްކަތް ބަލިކަށިކޮށްލާނެ ގޮތްތައް ކުރިމަތިކުރަމުންނެވެ. އެއީ އިޒްރޭލުގެ ތަފާތު އަމާޒުތަކަށް އެއްފަހަރާ ގިނަ ޙަމަލާތަކެއް ދީގެންނެވެ.

އިޒްރޭލުގެ ރޮކެޓެއް ޓެލްއަވިވް ސަރަޙައްދަށް ވެއްޓުމުން އަޔަންޑޯމްގެ ދިފާޢީ ނިޒާމުގެ ފުރިހަމަކަމާއި އެ މަސައްކަތް ކުރާ ގޮތާމެދު ވަނީ ސުވާލު އުފެދިފައެވެ. ކޮންމެއަކަސް އިޒްރޭލުން މިކަމަށް އުޒުރެއް ދެއްކުމުގެ ގޮތުން، އެކަން ހިނގައި ދިޔައީ ޓެކްނިކަލް ކުށެއްގެ ސަބަބުންކަމަށް ބުނަމުންދިޔަކަމުގައިވިޔަސް، އެއްފަހަރަށްވުރެ ގިނަ ފަހަރު މިކަން ތަކުރާރުވުމުން އެ ދައްކާ އުޒުރަކީ އެއްވެސް ބުރަދަނެއް ހުރި އެއްޗަކަށް ނުވިއެވެ.

މި ހަނގުރާމައިގެ ފުރަތަމަ ދުވަހު، މުޖާހިދުންގެ ފެކްޝަންތަކުން، ފަސްހާހަށްވުރެ ގިނަ ރޮކެޓް އިޒްރޭލަށް އަމާޒުކޮށް ފޮނުވާލިއެވެ. މި ޢަދަދަކީ އަޔަންޑޯމްގެ ނިޒާމަށް އެ ރޮކެޓްތަކަށް ހުރަސްއެޅުމަށް ކުޅަދާނަވަރަށްވުރެ އެތައް ގުނައެއް ގިނަ ޢަދަދެކެވެ. އެހެންކަމުން އަޔަންޑޯމްގެ މަސައްކަތާމެދު ނެގެޓިވްކޮށް ވިސްނުމުގެ ފުރުޞަތު ހުޅުވިގެން ދިޔައެވެ. އަދި ގިނަ ޢަދަދެއްގެ ރޮކެޓްތަކަށް ހުރަސް އެޅުމަށް އެއަށް ނުކުޅެދިގެންވާކަންވެސް ހާމަވެގެން ދިޔައެވެ.

އިޒްރޭލާއި ޣައްޒާއާ ދެމެދު ފެށިފައިވާ މި ހަނގުރާމާގައި އަޔަންޑޯމަށް ލިބިގެންވާ ކުޅަދާނަކަމާމެދު ހުޅަނގުގެ ރިޕޯޓުތައް ދަނީ ޝައްކުތައް އުފައްދަމުންނެވެ. ބްލޫމްބަރގް ނޫސް އެޖެންސީ ބުނާގޮތުން، ކާމިޔާބުކަމާއެކު ރޮކެޓްތަކަށް ހުރަސް އެޅުމުގައި އަޔަންޑޯމްގެ އިތުބާރު، ނުވަދި ޕަސެންޓުން އަށްޑިހަ ޕަސެންޓަށް ވަނީ ދަށަށް ގޮސްފައެވެ. މީގެ މާނައަކީ، މުޖާހިދުންގެ ފެކްޝަންތަކުން ރޮކެޓް ޙަމަލާތައް ކެނޑިނޭޅި ދެމުން އަންނަނަމަ، ގިނަ ރޮކެޓް ޙަމަލާތަކެއް އިޒްރޭލަށް އަމާޒުވުމަކީ އެކަށީގެންވާ ކަމެކެވެ. އަދި މިހާރު މިދަނީ މިކަން ފެންނަމުންނެވެ.

އަޔަންޑޯމް އެކުލެވިގެންވަނީ، ރާޑަރަކާއި ޒަމާނީ ޓްރެކިންސިސްޓަމެއްގެ މައްޗަށެވެ. މީގެ އިތުރުން އިޒްރޭލަށް ފޮނުވާ ބޮމާއި މިސައިލްތަކަށް ހުރަސްއަޅައި އެ ޙަމަލާތައް ނާކާމިޔާބު ކޮށްލާފަދަ ވިހި ޓެމިރ މިސައިލް ( Missile Tamir) ގެ ބެޓެރިއެއްވެސް އޭގައި ވެއެވެ. މިއިން ކޮންމެ މިސައިލަކަށް، ސާޅީސްހާހާއި ފަންސާސްހާސް ޑޮލަރާ ދެމެދުގެ އަގެއް އަރައެވެ.

ގޮތް ނޭނގޭ ދިމަދިމާއިން އިޒްރޭލަށް އަންނަ ޙަމަލާތައް، އަޔަންޑޯމްގެ ރާޑަރުން، ޓްރަކްކުރެއެވެ. އެ ހިސާބުން، އޭގައިވާ އެޑްވާންސް ސޮފްޓްވެއަރގެ އެހީގައި، އެ ޙަމަލާތައް އަމާޒުވާނެކަމަށް ބެލެވޭ ދިމާތަކަށް، ޙަމަލާތަކަށް ހުރަސްއަޅާ މިސައިލްތައް ފޮނުވާލެވެއެވެ.

މުޖާހިދުންގެ ފެކްޝަންތަކުން ވަނީ، ކިތަންމެ ފަހަރެއްގެ މަތިން އަޔަންޑޯމް ފަހަނަޅައި އެމީހުންގެ ރޮކެޓް ޙަމަލާތައް ފޮނުވުމުގައި ކާމިޔާބު ހޯދާފައެވެ.

ކުރީގެ ބައި ވިދާޅުވުމަށް:

އަޤްޞާގެ ޠޫފާން – 5

•••✧•✧•✧•✧•✧•✧•✧•✧•••

އެޑިޓަރުގެ ބަސް:

އައްޝައިޚް ޙަސަން ލަޠީފް މޫސާ އަކީ "ފިޔަ އޮންލައިން" އަށް ސިލްސިލާ ގޮތެއްގައި ލިޔުއްވަމުން ގެންދަވާ ކުޅަދާނު ލިޔުންތެރިއެކެވެ. އެމަނިކުފާނަށް ވަނީ ހިތްވަރު ދިނުމުގެ ޤައުމީ އިނާމު ލިބިވަޑައިގެންފައެވެ. ހިތްވަރު ދިނުމުގެ ޤައުމީ އިނާމު ލިބިވަޑައިގެންނެވީ، އިސްލާމްދީނަށް ހޭލުންތެރިކަން އިތުރުކުރުވުމާއި، ދީނަށް ޚިދުމަތްކުރުމާއި، ދީނީ ޢިލްމު އުނގަންނައިދިނުމުގެ ދާއިރާއިން؛ އިސްލާމްދީން އުނގަންނައިދިނުމުގެ ރޮނގުންނެެވެ.

އައްޝައިޚް ޙަސަން ލަޠީފަކީ 1989 ވަނަ އަހަރުން ފެށިގެން ދީނީ ޢިލްމު އުނގަންނައިދިނުމުގެ ދާއިރާގައި ޚިދުމަތް ކުރައްވަމުން ގެންދަވާ ހަރުދާނާ ޝަޚްޞިއްޔަތެވެ. އަލްމަދީނަތުލް މުނައްވަރާގެ އިސްލާމިކް ޔުނިވަރސިޓީން ދީނީ ތަޢުލީމް ލިބިވަޑައިގެން ހުންނެވި، ޚިދުމަތްތެރިއެކެެވެ. އައްޝައިޚް ޙަސަން ލަޠީފް މޫސާއަކީ ޤައުމީ ޔުނިވަރސިޓީގެ އެސޯސިއޭޓް ލެކްޗަރަރގެ ގޮތުގައި މަސައްކަތްކުރައްވަމުން ގެންދަވާ ބޭފުޅެކެވެ. އައްޝައިޚް ޙަސަން ލަޠީފް މޫސާ އަކީ ދީނީ ފޮތްތައް ލިޔުއްވަމުން ގެންދަވާ ބޭފުޅެކެވެ.