ރައްޔިތުންގެ މަޖިލީހަށް ކުރިމަތިލެއްވީ ރައީސް ޑރ. މުޙައްމަދު މުޢިއްޒު ގެ ފުރިހަމަ ތާއީދާ އިތުބާރާއެކު ސަރުކާރުގެ ސިޔާސަތު ތަންފީޒު ކުރުމަށް ކަމަށް ރައްޔިތުންގެ މަޖިލިހުގެ އިންތިޚާބަށް އެމްޑީއޭއިން ވެލިދޫ ދާއިރާއަށް ކުރިމަތިލައްވާފައިވާ ކެންޑިޑޭޓް، އެމްޑީއޭގެ ޤައުމީ ކައުންސިލް މެންބަރު މުޙައްމަދު އައްބާސް ވިދާޅުވެއްޖެއެވެ.
އައްބާސް ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރު ދިފާޢުކޮށް ވާންޖެހުނު ކޮންމެ ޤުުރުބާނީއެއް ވުމަށް ހުންނެވީ ތައްޔާރަށް ކަމަށާއި، އަދި މި ސަރުކާރުގެ ސިޔާސަތުތައް ތަންފީޒުކުރުމަށްޓަކައި ދޭންޖެހޭ ފުރިހަމަ އެއްބާރުލުން ދެއްވާނެ ކަމަށެވެ.
"އަޅުގަނޑު ނިކުމެ މިހުރީ ރައީސް ޑރ.މުޙައްމަދު މުޢިއްޒު ގެ ފުރިހަމަ ތާއީދާ އިތުބާރާ އެކު ސަރުކާރު ގެ ސިޔާސަތު ތަންފީޒު ކުރުމަށް ރައްޔިތުންގެ މަޖުލީސް ތެރެއިން އެއްބާރުލުންދީ އަދި ވެލިދޫ، ޅޮހި، ފޮއްދޫ ރައްޔިތުން އެދޭ ތަރައްޤީ ކަށަވަރު ކުރުމަށް!" ވެލިދޫ ދާއިރާގެ މެންބަރުކަަމަށް ކުރިމަތިލައްވާފައިވާ އައްބާސް ވިދާޅުވިއެވެ.
ދާއިރާގެ ތިން ރަށުގެ ތަރައްޤީއަށް އަމިއްލަފުޅު ޙައިސިއްޔަތުންވެސް އެތަކެެއް ހޭދައެއް ކޮށްދެއްވާފައިވާ މުޙައްމަދު އައްބާސް، ރައްޔިތުންގެ މަޖިލިހުގެ އިންތިޚާބަށް އެމްޑީއޭއިން ވެލިދޫ ދާއިރާއަށް ކުރިމަތިލައްވާ ކެންޑިޑޭޓެއްގެ ގޮތުގައި މިހާރު ވަނީ ފޯމު ހުށަހަޅުއްވާފައެވެ. އަދި އޭނާގެ ކެންޑިޑެސީ ވަނީ އިލެކްޝަންސް ކޮމިޝަނުން ބަލައިގެންފައެވެ.
އައްބާސްއަކީ އަބަދުވެސް މީހުންނާ ގުޅޭ އަދި ޚާއްޞަކޮށް ވެލިދޫ ދާއިރާގެ ތިން ރަށްކަމަށްވާ ޅޮހި، ވެލިދޫ، އަދި ފޮއްދޫގެ ރައްޔިތުންނާ ވަރަށް ގާތް ގުޅުމެއް ބާއްވަވަމުން ގެންދަވާ ބޭފުޅެކެވެ.
