އަންނަ އަހަރުގެ ނިޔަލަށް ރާއްޖޭގެ ހުރިހާ ރަށެއްގައި ފެނާއި ނަރުދަމާގެ ޚިދުމަތް ގާއިމްކުރުމުގެ މަސައްކަތް ނިންމާލާނެކަމަށް ޢިމާރާތްކުރުމާއި ބިނާރާއިބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސުލްޖުމްހޫރިއްޔާ ތިނަދޫ ރައްޔިތުންނާ ބައްދަލުކުރެއްވުމަށް ރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ.
ވަޒީރު ޑރ.ޢަބްދުﷲ މުއްޠަލިބް ވިދާޅުވީ، ރާއްޖޭގެ ވަރަށް ގިނަ ރަށްރަށުގައި ފެނާއި ނަރުދަމާގެ މަސައްކަތް ފެށިފައި ބައެއް ރަށްރަށުގެ މަސައްކަތް ހުއްޓިފައިވާކަމަށެވެ. އަދި ދެން ހުރި ބައެއް ރަށްރަށުގެ މަސައްކަތް އެކަށީގެންވާ ގޮތެއްގައި ކުރިއަށްނުދާކަމަށްވެސް ވަޒީރު ވިދާޅުވިއެވެ.
"އަޅުގަނޑުމެން މިކުރާ ދަތުރުގައި އެންމެ ބޮޑަށް ލިބޭ ޝަކުވާއަކީ ފެނާއި ނަރުދަމާގެ ޚިދުމަތް ނުލިބޭ މައްސަލަ. 102 ރަށެއް އެބައޮތް ޚިދުމަތް ނުލިބޭ. އެހެންނަމަވެސް ހުރިހާ ރަށެއްގައިވެސް މަސައްކަތް އޮތީ ފެށިފައި. އެހެންނަމަވެސް މިދައުރުގެ ތެރޭގައި މިއަހަރު ނުވަތަ އަންނަ އަހަރުގެ ތެރޭގައި ހުރިހާ ރަށެއްގެ މަސައްކަތް އެއްކޮށް ނިންމާ ޚިދުމަތް ދެވޭނެ." ވަޒީރު ވިދާޅުވިއެވެ.
ފެނާއި ނަރުދަމާގެ ކަންކަން ހުރި ނެތްގޮތް ބެލިއިރު، 102 ރަށެއްގައި ފެނާއި ނަރުދަމާގެ ޚިދުމަތް ނުލިބޭކަމަށެވެ. މަސައްކަތް ހުއްޓިފައިވާ 27 ރަށެއް އެބައޮތްކަން ފާހަގަކުރައްވަމުން ވަޒީރު ވިދާޅުވީ ސަރުކާރުން ކޮންޓްރެކްޓަރުންނާއި މަޝްވަރާކޮށް މިވީ މުއްދަތުގެ ތެރޭގައި 3 ރަށެއްގެ މަސައްކަތް ފެށިފައިވާކަމަށާއި، 6 ރަށެއްގެ ފެނާއި ނަރުދަމާގެ ޢަމަލީ މަސައްކަތް ނިންމާ ޓެސްޓުކޮށްފައިވާކަމަށާއި 9 ރަށެއްގެ ޓްރައިލް މުއްދަތު ނިމި ޚިދުމަތްދޭ ފަރާތާއި ޙަވާލުކޮށްފައިވާކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ ފެނާއި ނަރުދަމާގެ ޚިދުމަތް ރާއްޖޭގެ ހުރިހާ ރަށަކަށް ލިބޭނެ މަގުފަހިކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން ވަރަށް ހާއްސަ އިސްކަމެއް ދެއްވާކަމެއްކަމަށެވެ.
މި ޖަލްސާގައި ރައީސުލްޖުމްހޫރިއްޔާ ވާހަކަފުޅު ދައްކަވަމުން ތިނަދޫ ބައިނަލްއަޤްވާމީ ވައިގެ ބަނދަރު ތަރައްޤީކުރުމަށްޓަކައި މިރޭ ސޮއިކުރެއްވިގެންދިޔަ ފަހުމުނާމާގެ މައްޗަށް އަލިއަޅުވާލެއްވިއެވެ. އެގޮތުން ތިނަދޫ ސިޓީގައި ތަރައްޤީކުރާ ބައިނަލްއަޤްވާމީ ވައިގެ ބަނދަރަކީ، ދުނިޔޭގެ ފެންވަރުގައި ފާހަގަކޮށްލެވޭނެ ފެންވަރަށް ތަރައްޤީކުރާނެ ވައިގެ ބަނދަރެއްކަމުގައި އެމަނިކުފާނު ވިދާޅުވިއެވެ. އަދި މި ވައިގެ ބަނދަރަކީ ފެންމަތީގައި ހަދާ ތަނެއްކަމަށާއި، ތިމާވެއްޓާ ރަށްޓެހި ވައިގެ ބަނދަރަކަށް އެތަން ވާނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދި މި މަޝްރޫޢުގެ ތެރެއިން ފްލައިންގ ސްކޫލަކާއި، 12 ރިސޯޓް ތަރައްޤީވެގެން ދިއުމުން ރައްޔިތުންނަށް ވަޒީފާ ލިބި މުޅި ސަރަހައްދު ކުރިއަރާނެކަން އެމަނިކުފާނު ފާހަގަކުރެއްވިއެވެ. އަދި ހަމަ އެއާއެކު މި މަޝްރޫޢު ގިނަވެގެން 2 އަހަރު ތެރޭގައި ނިމިގެންދާނެކަމުގައިވެސް އެމަނިކުފާނު ވިދާޅުވިއެވެ.
