ތިލަމާލެ ބްރިޖް މަޝްރޫޢުގެ މަސައްކަތް ތާވަލަށްވުރެ %1.11 ކުރިއަށް ޖައްސާލެވިފައިވާކަމަށާއި، މަސައްކަތުގެ ޓައިމްލައިން އަވަސްކުރަން ކޮންޓްރެކްޓަރާ މަޝްވަރާކުރައްވާނެކަމަށް އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވެއްޖެއެވެ. މުއްޠަލިބު މިހެން ވިދާޅުވި އެ ވުޒާރާގެ މަސައްކަތްތަކާ ގުޅޭ މަޢުލޫމާތު ޙިއްސާކުރެއްވުމަށް ބޭއްވެވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
ތިލަމާލެ ބްރިޖް ޓައިމްލައިންގައިވާ ގޮތުން މާލެއިން ގުޅިފަޅަށް މަސައްކަތްތައް ނިންމުމަށް ތާވަލުކޮށްފައިވަނީ 31 މަރޗް 2026އަށްކަމަށެވެ. ގުޅިފަޅުން ތިލަފުއްޓަށް ގުޅާލާ ބްރިޖްގެ މަސައްކަތް ނިންމުމަށް ތާވަލުކޮށްފައިވަނީ 30 ސެޕްޓެމްބަރު 2026އަށް ކަމަށާއި، މިއާއެކު މުޅި މަޝްރޫޢު ނިމޭނެކަމަށްވެސް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026އަށް ކަމަށް ވަޒީރު ވިދާޅުވިއެވެ.
ބްރިޖްގެ މަސައްކަތް ލަސްވެފައިވަނިކޮށް އެ މަސައްކަތް އަވަސްކޮށް، ޚާއްސަ އިސްކަމެއްދޭ މަސައްކަތެއްގެ ގޮތުގައި ސަރުކާރުގެ ހަފްތާ 14 އެޖެންޑާގައި ހިމަނައިގެން ވަނީ ފަށްޓަވާފައެވެ. ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވެސް ވަނީ އެމަސައްކަތް ޢަމަލީގޮތުން ބައްލަވާލައްވާ އަދި އެމަސައްކަތުގެ ކޮންޓްރެކްޓަރާއެކުވެސް މަސައްކަތް އަވަސްކުރެއްވުމަށް މަޝްވަރާ ކުރައްވާފައެވެ.
އިމާރާތްކުރުމާއި ބިނާރާބެހޭ ވަޒީރު ޑރ.އަބްދުﷲ މުއްޠަލިބު ވިދާޅުވީ، ތިލަމާލެ ބްރިޖްގެ މުޅި މަޝްރޫއުގެ %35.53 މަސައްކަތް މުޅިން ނިމިފައިވާކަމަށެވެ.
ބްރިޖްގެ މަސައްކަތް ކުރިއަށްގޮސްފައިވާ މިންވަރު:
- ބްރިޖް ތަނބުތަކުގެ ޕައިލިން މަސައްކަތުގެ %58 ނިމިފައި
- ޕައިލް ކެޕްގެ %43 މަސައްކަތް ނިމިފައި
- ޕިއަރ ކޮލަމްންސްގެ %40 ނިމިފައި
- ބްރިޖް ސުޕަރސްޓްރަކްޗަރގެ ޕްރީކާސްޓް ސެގްމަންޓްގެ 24%ވަނީ ކާސްޓްކޮށް ނިމިފައި
ވަޒީރު ވިދާޅުވީ ތިލަމާލެ ބްރިޖްގެ މަސައްކަތް ސަރުކާރުން ވަރަށް ގާތުން ބައްލަވަމުންގެންދަވާކަމަށެވެ. މިއާއެކު މިހާރު ޕްރޮޖެކްޓްގެ މަސައްކަތްތައް ތާވަލަށްވުރެ އަވަސްކޮށްފައިވާކަމަށެވެ.
ތިލަމާލޭ ބްރިޖްގެ މަސައްކަތް 2025ގެ ނިޔަލަށް ނުވަތަ 2026ގެ ކުރީކޮޅު ނިންމުމަކީ ސަރުކާރުގެ އަމާޒެކެވެ. ހަތަރު ސަރަޙައްދެއް ގުޅުވާލާ، ޖުމްލަ 6.7 ކިލޯމީޓަރުގެ މިބްރިޖު ތަރައްޤީކުރުމަށް 7 ބިލިއަނަށްވުރެ ގިނަ ދިވެހި ރުފިޔާ ހޭދަކުރެއެވެ.
މުޅި މަޝްރޫއު ނިންމަން މިހާރު ތާވަލުކޮށްފައިވަނީ 30 ސެޕްޓެމްބަރ 2026 އަށެވެ.
