ރަމަޟާން މަހަށްފަހުވެސް ހެޔޮޢަމަލު ކުރުންމަތީ ދެމިތިބުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
"ރަމަޟާން މަހަށްފަހު ހެޔޮޢަމަލު ކުރުންމަތީ ދެމިތިބޭށެވެ!" މި މައުޟޫޢުގެ މައްޗަށް ރާއްޖޭގެ މިސކިތްތަކުގައި އިއްވި ހުކުރު ޚުޠުބާގައި ވަނީ ރަމަޟާން މަހަށްފަހު ހެޔޮޢަމަލު ކުރުންމަތީ ދެމިތިބުމަށް ނަސޭޙަތްތެރިވެވަޑައިގަންނަވާފައެވެ.
"ރަމަޟާން މަސް އަހުރެމެންނާ އަލްވަދާޢު ކިޔަނީއެވެ. ފުރިހަމަ މުއުމިނަކު، ދުވަހަކު ވެސް ހެޔޮޢަމަލު ކުރުމަކަށް އަލްވަދާޢެއް ނުކިޔާނެއެވެ. އެހެންކަމުން އަހަރެމެންނަށް އޮތީ ރަމަޟާން މަސް ނިމުމަށް ފަހުގައި ވިޔަސް، ހެޔޮ ޢަމަލު ކުރުންމަތީ ދެމިތިބުމެވެ. ޔަޤީންވެގެންވާ މަރު އަހަރެމެންނާ ބައްދަލުކޮށްފުމަށް ދާންދެނެވެ. އަޅުކަން ކުރުމަކީ، އަހަރެމެން ޚަލްޤުކުރެއްވުމުގެ މަޤްޞަދެވެ." ޚުޠުބާގައި ވިދާޅުވިއެވެ.
ޚުޠުބާގައި ވިދާޅުވީ، މުއުމިނުންނަކީ، ވަކި މަހެއްގައި، ވަކި މޫސުމެއްގައި، ﷲ އަށް އަޅުކަން ކުރަން ޖެހޭ ބައެއްނޫން ކަމަށާއި، މުޅި ޙަޔާތުގައި ވެސް އަޅުކަން ކުރަންޖެހޭނެ ކަމުގައެވެ.
"ބައެއް މޫސުންތަކުގައި އަޅުކަން ކުރުން ގިނަވެއެވެ. ރަމަޟާން މަހަކީ އެފަދަ މޫސުމެކެވެ. އެއީ އެ މޫސުމުގެ ބޭނުން ހެޔޮގޮތުގައި ހިފުމަށެވެ." ޚުޠުބާގައި ފާހަގަކުރެއްވިއެވެ.
މުސްލިމަކު ހެޔޮ ޢަމަލެއް ކުރުމަށް ފަހު، އެންމެ މުހިންމު ކަމަކީ، އެ ޢަމަލު ޤަބޫލުކުރައްވާތޯ ދެންނެވުމާއި، އެ ޢަމަލުކުރުންމަތީ ދެމިހުރުމުގެ ތައުފީޤަށް އެދި ދުޢާ ދެންނެވުން ކަން ފާހަގަކުރައްވަމުން، ރަމަޟާން މަސް އަހަރެމެންނާ ވަކިވެގެން މިދަނީ، ޝައްވާލު މަހުގެ ހަ ރޯދައިގެ ނިޢުމަތަށް މަގު ފަހިކޮށްދީފައި ކަމުގައި ޚުޠުބާގައި ވިދާޅުވިއެވެ.
" އެހެންކަމުން ތިބާއީ ހެޔޮކަމަށް އެދޭމީހަކަށް ވާށެވެ! އަދި ދީލަތިވަންތަ ﷲ ދެއްވި މި ނިޢުމަތުގެ ބޭނުން ހިފާށެވެ! މުޅި އަހަރު ދުވަހު ރޯދަހިފިކަމުގެ ޘަވާބު ލިބިގަންނާށެވެ!" ޚުޠުބާގައި ވިދާޅުވިއެވެ.
"އެކަލާނގެއީ ތައުބާ ޤަބޫލުކުރައްވާ، ފާފަފުއްސަވާ ރަސްކަލާނގެއެވެ. އެކަލާނގެއީ އެކަލާނގެ ކޯފާއަށްވުރެ ރަޙްމަތް ތަނަވަސް ރަސްކަލާނގެއެވެ. އެކަލާނގެ ޒާތުފުޅަށް ރަޙްމަތް ލާޒިމް ކުރައްވާފައިވާ ރަސްކަލާނގެއެވެ. އޭ ހެޔޮކަމަށް އެދޭ މީހާއެވެ! އެކަމަށް އަވަސްވެގަންނާށެވެ! އެކަލާނގެ ރަޙްމަތުގެ ދޮރުކޮޅު ވަނީ، އެދޮރުކޮޅުން ވަންނަން ބޭނުން ކޮންމެ މީހަކަށް ހުޅުވިފައެވެ." ގިނަގިނައިން ތައުބާވެ، މާތް ﷲ ގެ ހަޟްރަތުގައި ފާފަފުއްސެވުމަށް އެދި ދަންނަވަން ހަނދުމަކޮށްދެއްވަމުން ޚުޠުބާގައި ފާހަގަކުރެއްވިއެވެ.
ޚުޠުބާގައި ވަނީ ނިމިގެންމިދާ ރަމަޟާންމަހު ތިބާގެ ޢަމަލުތައް ހުރިގޮތާމެދު ވިސްނާލުމަށް ނަސޭހަތްތެރިވެ، ޤަވާއިދުން ފަރުޟު ފަސްނަމާދު އަދާކުރެވުނު ނަމަ އެ ނަމާދުތައް ކުރުން ރަމަޟާންމަހަށް ފަހުގައި ވެސް ދަމެހެއްޓުމަށާއި ކޮންމެ ދުވަހަކު ޤުރްއާނުން ޞަފްޙާއެއް ނަމަވެސް ކިޔެވޭތޯ ބެލުމަށް ހަނދާންކޮށްދެއްވާފައެވެ.
"މުސްލިމް އަޚުންނޭވެ! ކުރިން ކުރެވިފައިވާ ހެޔޮޢަމަލުތަކަކީ، ގިނަގުނަ ޢަމަލުތަކެއް ކަމުގައި، އަހަރެމެން ދެކިގެންނުވާނެއެވެ. އެހެނީ ކުރެވުނު ހެޔޮ ޢަމަލުތަކަށްޓަކާ ބޮޑާވެ، އެއީ މާގިނަ ހެޔޮ ޢަމަލުތަކެއް ކަމުގައި ދެކޭނަމަ، އެ ޢަމަލުތައް ބާޠިލުވެދާނެއެވެ." ޚުޠުބާގައި ވިދާޅުވިއެވެ.
އަހަރެމެންނަށް ހެޔޮކަމެއް ކުރެވުމުން، އެކަމާ ބޮޑާ ނުވެ، އެ ހެޔޮކަމެއް ކުރުންމަތީ ދެމިތިބެން ޖެހޭ ކަމަށާއި، ކުރެވުނު ޢަމަލުގެ ގިނަކަމުން، ސުވަރުގެ ޔަޤީންވީ ކަމަށް އަހަރެމެން ދެކިގެން ނުވާނެ ކަމަށް ޚުޠުބާގައި ފާހަގަކުރެއްވިއެވެ.
"ބައްޔެއްގެ ސަބަބުން، ނުވަތަ ދަތުރެއްގެ ސަބަބުން، ނުވަތަ ވަރުބަލިކަމުގެ ސަބަބުން، ނުވަތަ ހަނދާންނެތިގެން ވިޔަސް، ސުންނަތް އަޅުކަމެއް ދޫވެއްޖެނަމަ، އެކަމެއް ފިލައިދިއުމުން، އެ އަޅުކަމެއް ކުރަން އަވަސްވެގަންނާށެވެ! އެހެނީ ޢުޛުރަކާހުރެ ދޫވި އަޅުކަންތަކުގެ ސަވާބު، الله ތައާލާ ފުރިހަމައަށް ދެއްވާނެތެވެ." ޚުޠުބާގައި ފާހަގަކުރެއްވިއެވެ.
އަހަރެމެންގެ އެންމެ ފަހުގެ މަންޒިލަކީ ކޮބައިކަން ހަނދާނަށް ގެންނަން ވިދާޅުވެ، ސުވަރުގެ ސިފަކޮށްދެއްވިއެވެ.
" އެއީ އެތަނުގެ މޭވާތަކާއި، ގަސްތަކުގެ ހިޔާ އަބަދަށް ދެމިހުންނަ ސުވަރުގެއެވެ. އެ ގަސްތަކުގެ މޭވާ ބިނުމަށް ފަސޭހަކުރައްވާފައި ވެއެވެ. އެތާނގައި، ތަޣައްޔަރުކަމެއް ނުވާ ސާފުފެނުގެ ކޯރުތަކާއި، އޭގެ ރަހަ ތަފާތުނުވާ ކިރުގެ އާރުތަކާއި، ބޯމީހުންނަށް އުފާވެރިކަމާއި، ހިތްހަމަޖެހުން ލިބޭނޭ ރާގެ އާރުތަކާއި، މީރު ބުއިންތަކާއި، ސާފު މާމުއިގެ އާރުތައް ވެއެވެ. އަދި ޚާލިޞް ރިހިން ތައްޔާރު ކުރެވިފައިވާ ކަންވާރުތަކާއިގެން، އެއުރެންނަށް ޚިދުމަތްކޮށްދޭން ތިބޭ ކުދިންތައް ވެއެވެ. ބޭކާރު ވާހަކައެއް އެތަނުގައި އެއުރެން ނާހާނެއެވެ. އުފުލިގެންވާ ދާންތަކާއި، އެތުރިގެންވާ ބާލީސްތަކާއި، ފެތުރިފައިވާ ރީތި ދޫލަތައް ވެސް އެތަނުގައި ވެއެވެ. ސުވަރުގޭގައި އަށް ދޮރުކޮޅު ވެއެވެ. އޭގެ ތެރޭގައި އައްރައްޔާނޭ ކިޔުނު ދޮރުކޮޅެއް ވެއެވެ. އެ ދޮރުކޮޅުން ސުވަރުގެ ވަންނަހުށީ ހަމައެކަނި ރޯދަވެރީންނެވެ. ސުވަރުގޭގެ ޙަޔާތަކީ އަބަދީ ޙަޔާތެކެވެ. އެތާނގެ އަހުލުވެރީންގެ ޒުވާންކަމަށް ބަދަލު އައުމެއް ނެތެވެ. އެހެންކަމުން، ސުވަރުގެއަކީ، އަހަރެމެންގެ މަންޒިލް ކަމުގައި ހަދާށެވެ! އަދި ދަންނާށެވެ! އެނޫން މީހުން ޤިޔާމަތްދުވަހުން އެއްލައިލެވޭނީ، ނަރަކައަށެވެ. އެއީ، މިނިވަންކަމެއް ނެތި ކަސްތޮޅު އެޅިގެން ތިބެންޖެހޭ، އަނދައަނދާ ހުރި އަލިފާނުގެ ގޮވައްޗެވެ. އަލިފާނުގެ ފާރުތަކުން އެއުރެން ވަށާލެވިގެންވާނެތެވެ." ސުވަރުގޭގެ ނިޢުމަތްތައް ފާހަގަކުރައްވަމުން ޚުޠުބާގައި ވިދާޅުވިއެވެ.
