މުލަކަތޮޅާއި މާލެއާ ދެމެދު ހައިސްޕީޑު ފެރީގެ ޚިދުމަތް ފަށައި، އިތުރު 3 އަތޮޅެއްގައި އާރުޓީއެލްގެ ޚިދުމަތް ފެށުމުގެ އެއްބަސްވުމުގައި ސޮއިކޮށްފިއެވެ.
މިއަދު ބޭއްވި ރަސްމިއްޔާތެއްގައި މުލަކަތޮޅާއި މާލެއާއި ދެމެދު ސްޕީޑު ފެރީގެ ޚިދުމަތް ފެށުމުގެ އެއްބަސްވުމުގައި ދަތުރުފަތުރާ މަދަނީ އުދުހުންތަކާ ބެހޭ ވުޒާރާގެ ފަރާތުން ސޮއިކުރެއްވީ އެވުޒާރާގެ ޑިރެކްޓަރ ޖެނެރަލް އަޙްމަދު ޝަމީމްއެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ ޢަބްދުﷲ ޒިޔާދެވެ.
ރާއްޖެ ޓްރާންސްޕޯޓު ލިންކް، އާރުޓީއެލް ނ، ރ އަދި ބ.އަތޮޅަށް ފުޅާކުރުމުގެ އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ޕާރމަނަންޓް ސެކްރެޓަރީ މަރިޔަމް ޝަހާނާއެވެ. އެމްޓީސީސީގެ ފަރާތުން ސީއީއޯ ޢަބްދުﷲ ޒިޔާދެވެ.
މި ރަސްމިއްޔާތުގައި ވާހަކަދައްކަވަމުން ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު ޢަމީން ވިދާޅުވީ، މުލަކަތޮޅާއި މާލެއާއި ދެމެދު ހައި ސްޕީޑު ފެރީގެ ޚިދުމަތް ހަފްތާއަކު 2 ދުވަހު ކުރާނެކަމަށާއި މިހާރުވެސް އެމްޓީސީސީން އެ އަތޮޅުތެރޭގައި ދަތުރުކުރިނަމަވެސް، އޮތް ދަތިކަމަކީ މާލެއާއި އެއަތޮޅާ ދެމެދު ދަތުރުކުރެވޭނެ އިންތިޒާމެއް ނެތުންކަމަށެވެ.
MTCC has entered into an agreement with the @MoTCAmv to launch speed ferry services between Mulaku Atoll and Male’ City, as well as RTL Ferry services at N. R. and B. Atoll. CEO @CEOMTCC signed on behalf of MTCC, while Honourable Minister @ameen3d signed on behalf of the… pic.twitter.com/40UgvDK6o3
— MTCC Plc (@MTCCPlc) April 15, 2024
އާރުޓީއެލް ނ، ރ އަދި ބ އަތޮޅަށް ފުޅާކުރުމަށް ވެވުނު އެއްބަސްވުމާއި ގުޅޭގޮތުން އަމީން ވިދާޅުވީ މިއީ މިހާރުވެސް ބައެއް ސަރަޙައްދުތަކުގައި ހިނގަމުންދާ ޚިދުމަތެއްކަމުން ރައީސް ދެއްވާ ޔަޤީންކަމަކީ ހިނގަމުންދާ އެފަދަ އެއްވެސް ކަމެއް ހުއްޓާނުލައި އިތުރަށް ރަނގަޅުކުރުންކަމަށެވެ. ރާއްޖެ 6 ޒޯނަކަށް ބަހާލައިގެން އެމްޓީސީސީއާ ހަވާލުކޮށްގެން ކުރިއަށް ގެންދާ މިމަސައްކަތް ދެމެހެއްޓިނިވިގޮތެއްގައި ކުރިއަށް ގެންދިއުމަށް އިޞްލާހު ގެންނަންޖެހޭ ކަމަށް އަމީން ވިދާޅުވިއެވެ. އެގޮތުން އެމްޓީސީސީއަށް ބައެއް ގޮންޖެހުން އެބައޮތްކަމަށާއި، ރައްޔިތުން އެންމެ ބޭނުން ނުވާގޮތަށް ބައެއް ރޫޓުތައް އެބަހުރިކަމަށްވެސް އަމީން ވިދާޅުވިއެވެ. އެހެންކަމުން ރައްޔިތުން ބޭނުންވާގޮތަށް އެރޫޓުތައް ބަދަލުކޮށް، ދޮޅު މަސްދުވަހުގެ ތެރޭގައި ވަރަށް ގިނަބަދަލު އަންނާނެކަމަށްވެސް ވަޒީރު ވިދާޅުވިއެވެ.
މިއަދުގެ ރަސްމިއްޔާތުގައި އެމްޓީސީސީގެ ސީއީއޯ ޢަބްދުﷲ ޒިޔާދު ވިދާޅުވީ މިއެއްބަސްވުމުގެ ދަށުން މުލަކަތޮޅު ރައްޔިތުންނަށް އެކަށީގެންވާ އަގެއްގައި ޚިދުމަތް ލިބޭނެކަމުގެ ޔަޤީންކަން ދެއްވާކަމަށެވެ. އަދި ނ، ރ އަދި ބ އަތޮޅުގައި އާރުޓީއެލް ފުޅާވުމުން ކައިރި މުސްތަގްބަލުގައި އެ އަތޮޅުތަކުގެ ކޮންމެ ރަށަކަށް ޚިދުމަތް ދެވޭނެކަމަށް ޒިޔާދު ވިދާޅުވިއެވެ. އަދި އިޤްތިޞާދީ އަދި އިޖްތިމާޢީގޮތުން ގިނަ ފައިދާތަކެއް ކުރާނެކަމަށްވެސް ޒިޔާދު ވިދާޅުވިއެވެ.
އެމްޓީސީސީން ދެމުން އަންނަ އާރުޓީއެލް ބަހާއި ފެރީގެ ޚިދުމަތުގައި މިހާރު މާލެއާއި އަތޮޅުތަކުގައި 105 ބަސް އަދި ފެރީގެ ޚިދުމަތުގައި 25 އުޅަނދު ބޭނުންކުރެއެވެ. އަދި މިޚިދުމަތުގައި 580 މުވައްޒަފުން ހަރަކާތްތެރިވެއެވެ. މިއެއްބަސްވުމާއެކު ޚިދުމަތް ފުޅާވާނެކަމަށާއި، ސަރުކާރުގެ އަމާޒަކީ މުޅި ރާއްޖެއަށް ވީހާވެސް އަވަހަށް ފުޅާކުރުންކަމަށް އެމްޓީސީސީން ބުންޏެވެ.
