ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް މާދަމާ މިނިވަން ވާނެ ކަަމަށް އުއްމީދު ކުރައްްވާކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ޔާމީންގެ އިސްތިިއުނާފީ މައްސަލައިގެ ހުކުމް މާދަމާ އިއްވާ ގޮތަށް ހައިކޯޓުގައި ވަނީ ތާވަލުކޮށްފައެވެ.
އަންނަ އާދީއްތަ ދުވަހު ބާއްވާ މަޖިލިސް އިންތިޚާބާ ގުޅިގެން، ގދ. ގައްދޫ ދާއިރާއަށް ވާދަކުރައްވާ ޕީއެންސީ ކެންޑިޑޭޓްގެ އިވެންޓްގައި މިރޭ ވާހަކަފުޅު ދައްކަވަމުން ރައީސް ވިދާޅުވީ، ރައީސް ޔާމީންގެ މައްސަލަ އިންސާފުވެރިކަމާއެކު އަވަހަށް ނިންމަ ދޭން މީގެ ކުރިން އެމަނިކުފާނު ޖުޑިޝަރީއަށް ގޮވާލާފައިވާނެ ކަމަށެވެ.
ރައީސް ވިދާޅުވީ ރިޔާސީ އިންތިހާބު ކާމިޔާބުވެ އެންމެ ފުރަތަމަ ނޫސްވެރިންނާއި ބައްދަލު ކުރައްވާވެސް ކުރީގެ ރައީސައަށް ދެންނެވީ ރައީސް ޔާމީން ގެއަށް ބަދަލުކޮށްދެއްވުމަށް ކަމަށެވެ. އަދި ޖެހިގެން އައި ދުވަހު އެމަނިކުފާނު ގެއަށް ބަދަލުކޮށްދެއްވި ކަަމަށްވެސް ވިދާޅުވިއެވެ.
ރައީސް ޔާމީންއަށް ޙުކުމް އިއްވާފައިވާ މައްސަލައަކީ އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑްރިންގެ ކުށުގައި ޔާމީން 11 އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން ކުރި ހުކުމާއި ގުޅޭ މައްސަލައެވެ. އެ ހުކުމް މިދިޔަ އަހަރުގެ ކުރީކޮޅު ހައި ކޯޓުގައި އިސްތިއުނާފްކޮށްފައިވާއިރު، އެ މައްސަލައިގައި މިހާތަނަށް އައިއިރު، ހުކުމް އިއްވާފައެއް ނުވެއެވެ. އެކަމަކު، މި މައްސަލައިގެ އަޑުއެހުންތައް ހައި ކޯޓުގައި ނިންމާލައި އެ މައްސަލަ އޮތީ ހުކުމަކާ ހިސާބުގައެވެ.
