މިސަރުކާރުން ހުޅުމާލޭގައި ޤާއިމުކުރުމަށް ނިންމާފައިވާ މީޑިއާ ވިލެޖްގެ މަސައްކަތް ވަރަށް އަވަހަށް ފެށޭނެ ކަމަށް ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވަޒީރު، އިބްރާހިމް ވަހީދު (އަސްވާޑް) ވިދާޅުވެއްޖެއެވެ.
ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވުޒާރާ އިން ބޭއްވި ނޫސްވެރިންގެ ބައްދަލުވުމުގައި އަސްވާޑު ވިދާޅުވީ މީޑިއާ ވިލެޖްގެ މަސައްކަތް ވަރަށް އަވަހަށް ފެށޭނެ ކަމަށާއި، މީޑިއާ ވިލެޖްގައި މަސައްކަތް ނިމިގެންދާއިރު ނޫސްވެރިކަން މުޅިން އެހެން މިސްރާބަކަށް ބަދަލުވެގެންދާނެ ކަމަށެވެ.
މީޑިއާ ވިލެޖް އެޅުމުގެ ކަރުދާހަށް ކެބިނެޓްގެ ރުހުން ލިބި ފާސްވެފައިވާ ކަން ފާހަގަކުރައްވަމުން، މީޑިއާ ވިލެޖް އެއްކޮށް ނިމޭއިރު، ޓީވީ ސްޓޭޝަންތަކަށް ޖާގަ ތަނަވަސް ތަނެއް ހަމަޖެހިގެންދާނެ ކަމަށާއި ރަނގަޅު ފެންވަރުގެ ސްޓޫޑިއޯތައް ޤާއިމުކުރެވޭނެ މަގު ވެސް ފަހިވެގެންދާނެ ކަމަށާއި، ރާވާފައިވަނީ ނޫސް ކޮންފަރެންސްތައް ވެސް މީޑިއާ ވިލެޖްގައި ބާއްވާ ގޮތަށް ކަމަށާއި ފައިބަރ އެޅިފައި ހުންނާނެ ކަމަށެވެ. އަހަރީ އާންމު ޖަލްސާތަކާއި ޕްރައިވެޓް ބައްދަލުވުންތައް ވެސް އެތަނުގައި ބޭއްވޭނެ ކަމަށް ވިދާޅުވިއެވެ.
އަސްވާޑް ވިދާޅުވީ، ކޮފީ ބޯނެ ތަނަކާއި ނޫސްވެރިންނަށް ޖިމެއް ވެސް މީޑިއާ ވިލެޖްގައި ޤާއިމުވެގެންދާނެ ކަމަށެވެ.
ނޫސްވެރިންގެ ބައްދަލުވުމުގައި، ވަޒީރު ވިދާޅުވީ ރާއްޖޭގައި ބައިނަލްއަގުވާމީ ފެންވަރުގެ އާޓްސް ސްކޫލެއް އެޅުމަކީ ރައީސް ޑރ. މުހައްމަދު މުއިއްޒުގެ މެނިފެސްޓޯގައި ވެސް ފާހަގަކުރައްވާފައިވާ ކަމެއް ކަމުގައެވެ. އަދި އެކަމާއިގުޅޭގޮތުން ރައީސް މަޝްވަރާކުރައްވާ ކަމަށެވެ. އެ މަސައްކަތް ވަރަށް އަވަހަށް ފައްޓަވާނެކަން ފާހަގަކުރައްވައި ވަޒީރު ވަނީ ބައިނަލްއަގުވާމީ ފެންވަރުގައި ގަބޫލުކުރާ އާރޓްސް ސްކޫލެއް ރާއްޖޭގައި ގާއިމުކުރައްވާނެ ކަމަށް ވިދާޅުވެފައެވެ.
މީޑީއާތައް ހިންގުމަށް ދައުލަތުން ފައިސާގެ އެހީތެރިކަން ފޯރުކޮށްދިނުމަށް ރައީސް މުއިއްޒު ވަނީ ނިންމާފައެވެ. މި އަހަރުގެ ބާކީ ހަރަދުތައް ހަމަޖެއްސުމަށް ރައްޔިތުންގެ މަޖިލިހަށް ހުށަހެޅި 6.5 ބިލިއަން ރުފިޔާގެ ބަޖެޓުގައި މީޑިއާތަކަށް 6.5 މިލިއަން ރުފިޔާ ވަނީ ހިމަނާފައެވެ.
މީޑިއާތަކުގެ ކުރިއެރުމަށް ސަރުކާރުން ފުރިހަމައަށް އެއްބާރުލުން ދެއްވައި، ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގައި ހިމެނޭ މީޑިއާ ވިލެޖް ގާއިމުކުރުމާއި، މީޑިއާތަކުގައި މަސައްކަތްކުރާ ފަރާތްތަކަށް ތައުލީމާއި ތަމްރީނުގެ ފުރުސަތުތައް ފަހިކޮށްދިނުން ފަދަ ހުރިހާކަމެއްވެސް ސަރުކާރުން ހާއްސަ ސަމާލުކަމަކާއެކު ކުރިއަށް ގެންދަވާނެކަމުގެ ޔަގީންކަން ވެސް ސަރުކާރުން ވަނީ ދެއްވާފައެވެ.
