މި އަހަރުގެ މިހާތަނަށް މިސްކިތުން ވައްކަން ކޮށްގެން 21 މައްސަލަ ހުށަހެޅުނު ކަމަށާއި، މިހާތަނަށް ހަ ފަންކާ އާއި ދެ ފޯނު، އަދި ފެންމޯޓަރެއް ހޯދައި، ހަވާލުކުރެވިފައިވާ ކަމަށް ފުލުހުންގެ ޚިދުމަތުން ވިދާޅުވެއްޖެއެވެ.
ފުލުހުންގެ ތަރުޖަމާން އަދި އެސިސްޓެންޓް ކޮމިޝަނަރ އޮފް ފޮލިސް އަހްމަދު ޝިފާން އެކްސްގައި ކުރި ޕޯސްޓެއްގައި ވިދާޅުވީ، މި އަހަރު މިހާތަނަށް 21 މައްސަލައެއް މާލޭގެ މިސްކިތްތަކުން ވައްކަންކޮށްގެންް ފުލުހުންނަށް ހުށަހަޅާފައިވާ ކަމަށެވެ. އދި މި މައްސަލަތަކަށް ނިސްބަތްވާ ހަ ފަންކާ އާއި ދެ ފޯނުގެ އިތުރުން ފެންމޯޓަރެއް ހޯދާ ހަވާލުކުރެވިފައިވާ ކަަމަށް ޝިފާން ވިދާޅުވިއެވެ.
2024 ވަނަ އަހަރު މިހާތަނަށް 21 މައްސަލައެއް މާލޭގެ މިސްކިތްތަކުން ވައްކަންކޮށްގެންް ފުލުހުންނަށް ހުށަހަޅާފައިވޭ. މި މައްސަލަތަކަށް ނިސްބަތްވާ 6 ފަންކާ، 2 ފޯނު އަދި ފެންމޯޓަރެއްވަނީ ހޯދާ ހަވާލުކުރެވިފައި. https://t.co/O6WncyaVBi
— Ahmed Shifan (@Shifan4040) June 21, 2024
މާލެ ސިޓީ ކައުންސިލުން ވިދާޅުވިގޮތުގައި ޢީދު މިސްކިތުން މި މަހު އެކަނިވެސް 10 ފަންކާ ވަގަށް ގެންގޮސްފައިވެއެވެ. މިސްކިތުގެ ކެމެރާ ފުޓޭޖްތައް ނަގާ ފުލުހަށް މައްސަލަ ހުށައެޅުމުގެ މަސައްކަތް ކުރަމުންދާ ކަމަށްވެސް އެ ކައުންސިލުން ވިދާޅުވެފައި ވެއެވެ.
މާލޭ ސިޓީ ކައުންސިލުން ވަނީ މިސްކިތްތަކުން ވައްކަން ކޮށް ތަކެއްޗަށް ގެއްލުންދީ ނެހެދުމަށް އިލްތިމާސް ކޮށްފައެވެ. މީގެ ކުރިންވެސް މިސްކިތްތަކުން ވައްކަން ކުރުމުގެ މައްސަލަތައް ވަނީ ރިޕޯޓްކުރެވިފައެވެ.
