ސޯޝަލް ކައުންސިލުން ހޯޕް އައިލެންޑްގެ ކޮންސެޕްޓް އެޕްރޫވްކޮށްފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ކުށުގެ މާޙައުލަށް ހުށައެޅޭ ކުދިން ރީހެބިލިޓޭޓްކުރުމަށް ހަދާ "ހޯޕް އައިލެންޑް"ގެ މަސައްކަތް ފެށީ މެއި މަހުގެ ތެރޭގައެވެ.
މި މަސައްކަތްތަކާ ގުޅޭގޮތުން ވާހަކަ ދައްކަވަމުން މިނިސްޓަރ ވިދާޅުވީ ސޯޝަލް ކައުންސިލުން ހޯޕް އައިލެންޑްގެ ކޮންސެޕްޓް އެޕްރޫވްކޮށްފައިވާ ކަމަށާއި ދެން އެންމެ އަވަހަށް ބާއްވާ ވަޒީރުންގެ މަޖިލީހަށް އެ ކޮންސެޕްޓް ހުށަހެޅުމަށް މިހާރު ވަނީ ތައްޔާރުވެފައި ކަމަށެވެ.
"އެރަށުގައި ޑިސްފަކްޝަނަލް އާއިލާތަކުގެ ކުދިންނަށް ފަރުވާ ދެވިގެންދާނެ ކަމަށާއި، ތިން އަހަރެއްހާ ދުވަސް ތެރޭގައި އެރަށުގެ ހުރިހާ މަސައްކަތްތައް ނިމި އެއްކޮށް އޮޕަރޭޝަނަށް އެރަށަށް ގެނެވޭނެ." ދާޚިލީ ސަލާމަތާ ބެހޭ ވަޒީރު ޢަލީ އިޙްސާން ވިދާޅުވިއެވެ.
މިނިސްޓަރ ވިދާޅުވީ މީގެ ކުރިންވެސް ފުލުހުންގެ ޓްރެއިނިންގ ފެސިލިޓީތަކުގައި މީގެ ޕްރޮގްރާމްތައް ޕައިލެޓް ކުރާނެ ކަމަށެވެ.
ހޯޕް އައިލެންޑަށް ގެންދާ އެކުދިންނަށް ރަނގަޅު ވަޒީފާތަކާއި ފައިނޭންޝަލް ސިސްޓަމްގައި ކުދިންނަށް ލިބެންޖެހޭ ފަރުވާ ދިނުމުން މިކަމުގަ ދާއިމީ ހައްލެއް ލިބިގެންދާނެ ކަމަށްވެސް މިނިސްޓަރ ވިދާޅުވިއެވެ.
ވަޒީރު ވިދާޅުވީ، ހޯޕް އައިލެންޑްގައި އުޅޭ ކުދިން 18 އަހަރު ވަންދެން އެތަނުގައި އުޅޭނެ ކަމަށެވެ. އެއަށްފަހު ދިވެހި ފުލުހުން ނުވަތަ ދިވެހި ސަފައިންގެ ޚިދުމަތުންކުރެ ތަނެއްގައި ވަކި މުއްދަތެއް ވަންދެން އެކުދިން ޚިދުމަތް ކުރަންޖެހޭނެކަމަށް ވަޒީރު ވިދާޅުވިއެވެ. އެއަށްފަހު އެކުދިން ބޭނުންވާ ދާއިރާއަކުން ކުރިއަށް ދިއުމަށް ފުރުޞަތު ދެވޭނެކަންވެސް ވަޒީރު ފާހަގަކުރެއްވިއެވެ.
މީގެ އިތުރުން ވަޒީރު ވަނީ ޖިނާޢީ ކުށެއް ކޮށްގެން ކުޑަކުދިން ޒިންމާވާންޖެހޭ ޢުމުރު ކުޑަކުރުމުގެ މަސައްކަތް ފަށާފައިވާ ކަމަށްވެސް މިނިސްޓަރ ވަނީ ވިދާޅުވެފައެވެ.
ޖިނާޢީ ކުށެއްގެ ޒިންމާ ކުޑަކުއްޖަކު މިހާރު ނަގަންޖެހޭ ޢުމުރަކީ 15 އަހަރެވެ. ނަމަވެސް ޒިންމާ ނަގަންޖެހޭ ޢުމުރު 12 އަހަރަށް ކުޑަކުރަންޖެހޭ ކަމަށް މީގެ ކުރިން ވަޒީރު ވިދާޅުވެފައިވެއެވެ.
ނޫސްވެރިންގެ ބައްދަލުވުމުގައި ވަޒީރު ވިދާޅުވީ، 12 އަހަރުގެ ކުޑަކުދިންވެސް ތަފާތު ބާވަތްތަކުގެ ކުށްތަކަށް އަރައިގަންނަމުން އަންނަ ކަމަށާއި، ކުށުގެ މާޙައުލުން އެކުދިން ދުރުކުރެވޭނީ އެކުދިންނަށްވެސް ޤާނޫނީ ގޮތުން ފިޔަވަޅު އެޅިގެން ކަމަށެވެ. މިގޮތުން ޖިނާޢީ ކުށެއް ކޮށްގެން ޒިންމާ ނަގަންޖެހޭ ޢުމުރު 12 އަހަރަށް ކުޑަކުރުމަށް ޤާނޫނީ ގޮތުން ކުރަންޖެހޭ މަސައްކަތްތައް ޕްރޮސިކިޔުޓަރ ޖެނެރަލްގެ އޮފީހާއެކު މިހާރު ފަށާފައިވާ ކަމަށް ވަޒީރު ވިދާޅުވިއެވެ.
ޒިންމާ ނަގަންޖެހޭ ޢުމުރު 12 އަހަރަށް ކުޑަ ކުރެވުމާއެކު 12 އަހަރުގައި ކުށަށް އަރައިގަންނަ ކުދިންވެސް ރީހެބިލިޓޭޓްކުރުމަށް ހޯޕް އައިލެންޑަށް ގެންދެވޭނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ވިދާޅުވިއެވެ.
ކުށަށް އަރައިގަންނަ ކުޑަކުދިން ކުށުގެ މާޙައުލުން ދުރުކޮށް އެކުދިން ރަނގަޅު މަގަށް ގެނައުމަށް ރީހެބިލިޓޭޝަން ފެސިލިޓީއެއް ޤާއިމްކުރުމަށް ނިންމާފައިވާކަން ދާޚިލީ ވަޒީރު އިޙްސާން ހާމަކުރައްވާފައިވަނީ އޭޕްރީލް މަހުގެ 6 ވަނަ ދުވަހުއެވެ. އޭރު ވަޒީރު ވިދާޅުވެފައިވަނީ ރީހެބިލިޓޭޝަން ފެސިލިޓީ އެޅުމަށް ވަކިން ރަށެއް ތަރައްޤީކުރައްވާނެ ކަމަށެވެ.
