ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ގޮތް އެނގިވަޑައިގަަންނަވާތީ، ރައީސް ޑރ. މުޙައްމަދު މުޢިއްޒަށް ރިޔާސީ އިންތިޚާބުގެ ޓިކެޓް ދެއްވަން މާކުރިން ވެސް ރޭވެވި ކަމަށް ރައްޔިތުންގެ މަޖިލީހުގެ ރައީސް، ފޮނަދޫ ދާއިރާގެ މެމްބަރު ޢަބްދުއްރަހީމް ޢަބްދުﷲ ވިދާޅުވެއްޖެއެވެ.
ޢަބްދުއްރަހީމް މިހެން ވިދާޅުވީ، ރޭ ޕީއެންސީގެ މައި ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަަވަމުންނެވެ.
ޕީއެންސީގެ ޗެއާޕާސަން ޢަބްދުއްރަހީމް ވިދާޅުވީ، ޔާމީންގެ ގޮތް އެނގިވަޑައިގަންނަވާތީ ރައީސް މުއިއްޒަށް ރިޔާސީ ޓިކެޓް ދެއްވަން މާ ކުރިން ރޭވި ކަމަށާއި، ޔާމީނަށް ވާދަ ނުކުރެވޭ ނަމަ ޕާޓީން ވެރިކަމަށް ކުރިމަތިލާން ފުރުސަތު ނުދެއްވާނެ ކަން މާ ކުރިން ވިސްނިވަޑައިގެންނެވި ކަމަށެވެ.
"އަޅުގަނޑަށް ރައީސް ޔާމީން އެނގޭތީ ރޭވީ، އަޅުގަނޑަށް އެނގެއޭ އެމަނިކުފާނަށް ކުރިމަތިނުލެވެންޏާ އަޅުގަނޑުމެންގެ ޕާޓީން ވެރިކަމަށް ކުރިމަތިލާން ފުރުސަތު ނުދެއްވާނެކަން، އެކަން އަޅުަގަނޑަށް އެނގެއޭ، 30 އަހަރުގެ ތަޖުރިބާއާއި އެކީގައި ވިސްނަމުން ގެންދެވީ އަޅުގަނޑުމެންގެ ޕާޓީ މަގުމަތިވިޔަ ނުދޭން، ރައްޔިތުން ބިކަވިޔަ ނުދޭން، މި ގައުމުގެ މިނިވަންކަން ގެއްލިގެން ދިޔަ ނުދޭން، އަމާން ވެއްޓެއް ގާއިމް ކުރަން، ރައްޔިތުންނަށް އުފާވެރި މުސްތަގުބަލެއް ހޯދައިދޭން، އެހެންވެގެން ރާވަމުން ގެންދެވީ،". އަބްދުއްރަހީމް ވިދާޅުވިއެވެ.
ޢަބްދުއްރަހީމް ވިދާޅުވީ، ޕްލޭން "އޭ ހަދާފައި، ބީ ހަދާފައި ސީ ހަދާފައި" އުޅުނުއިރު، އެމަނިކުފާނުގެ އެއްބަސްވުމެއްގައި، ރުހުމުގައި ޕީޕީއެ ޕީއެންްސީއަށް ރިޔާސީ އިންތިހާބުގައި ވާދަ ނުކުރެވޭނެކަން އެނގިވަޑައިގަންނަވާ ކަމަށެވެ.
"އެެހެންވެގެންނޭ އެ ދުވަހު 9:00 ޖެހިއިރު ގޮސް ފޯމް ވެއްދީ، ފޯމް ވެއްދީ ދެވަނަ މީހަކަށް އެ ފޯމް ވައްދާނެ ޔާގަ ނުދޭން ވެގެން، އެ ފޯމް ވައްދާ ހިތުން ތެޅި ފޮޅުނު މީހުންނާއި، ފޯނުކޮށްފައި ދެއްކި ވާހަކައާއި ފޯނު ކޯލުން އެކޮޅަށް ދިން ޖަވާބާއި އެކީގައި ގާގަޑެއްގައި ގޮސް އިށީންނި އިށީންނުމާއި މި ހުރިހާ މަންޒަރެއް އަޅުގަނޑުމެންގެ އަތުގައި އެބަހުއްޓޭ، އެ ހުރިހާ އަޑެއް ވާހަކައެެއް އެބަހުއްޓޭ އަޅުގަނޑުމެންގެ އަތުގައި،". އަބްދުއްރަހީމް ވިދާޅުވިއެެވެ.
ޢަބްދުއްރަހީމް ވިދާޅުވީ، ވޭތުވެދިޔަ 15 ވަރަކަށް އަހަރު ލީޑަރުން ޕާޓީ ހިންގާ އުޅުނު ގޮތް މީހުންނަށް ނުފެންނާނެ ކަމަށާއި، ޕާޓީ ހިންގި ގޮތާއި، ވެރިކަން ކުރި ގޮތާއި، އެ ވެރިކަމުގައި ކަންކަން ހިނގާދިޔަ ގޮތް މިތިބީ ދެކިގެން ކަމަށެވެ.
"2017 ވަނަ އަހަރު އޮތީ އަޅުގަނޑުމެންނަށް ނިސްބަތްވާ ވެރިކަމެއް އޮތީ، އަޅުގަނޑުމެން ދިޔައީމޭ 2018 ވަނަ އަހަރު އަޅުގަނޑުމެންނަށް ވެރިކަން ލިބޭނެ ގޮތް ރައީސުލްޖުމްހޫރިއްޔާއަށް ދަންނަވަން، އަޅުގަނޑުމެން ދެންނެވިން އިއްޒަތްތެރި ރައީސްއޭ، މިއީ އަޅުގަނޑުމެންގެ ވެސް ގައުމޭ، މިއީ އަޅުގަނޑުމެންގެ ޕާޓީގެ ވެރިކަމެކޭ، މިހާރު މި ކުރާ ގޮތަށް ކެމްޕެއިންކޮށްގެންނެއް ވެރިކަމެއް ނުލިބޭނެއޭ. ހިސާބުން ދެއްކިން އަޅުގަނޑުމެން، ދެ ފުރާނައެއްގެ ދަށުގައި މިގޮތަށް ވެރިކަން ކޮށްގެން 2018އެއް އަޅުގަނޑުމެންނަކަށް ނުލިބޭނެއޭ، ކެމްޕެއިން އޮފީހުގައި ނެތޭ ސިޔާސީ މަސްރަހު ދަންނަ މީހުންނެއް، އެ މީހުންނަކަށް ވާނުވާއެއް ނޭނގެއޭ، ޕާޓީ އޮފީހުން ކެމްޕެއިން ކުރާށޭ، އެއިރުން މި ވެރިކަން ކާމިޔާބު ވާނެއޭ، ވިދާޅުވީ، މިއީ ތިމަންނަގެ ކަމެކޭ، ކަލޭމެންނާއި ބެހޭ ކަމެއް ނޫނޭ މިއީކީ، ތިމަންނަމެން ބުނާ ކަމެއް ކުރަން ކަލޭމެން ތިބޭށޭ." ޢަބްދުއްރަހީމް ވިދާޅުވިއެވެ.
އެ ދެންނެވިގޮތަށް ތިބީ ބުނާ ކަމެއް ކުރުމުގައި ކަމަށާއި، މަސް ދުވަސް ވުމުން ހިސާބު ހަދައިގެން ގޮސް ވެސް އެ މައުލޫމާތު ހިއްސާ ކުރެއްވި ކަމަށާއި، ވޯޓު ހޯދޭނެ ގޮތް ވެސް ހިއްސާ ކުރެއްވި ކަމަށާއި، އިންތިހާބުގެ ނަތީޖާ އައުމުން ވެސް ބަލައިނުގަންނަ ކަމަށް ޢަބްދުއްރަހީމް ވިދާޅުވިއެެވެ.
ރައީސް ޔާމީނަށް ވެރިކަން ގެއްލުނީ ކޮރަޕްޝަންގެ މައްސަލަތަކުގައި ފިޔަވަޅު ނޭޅިގެން ކަމަށްވެސް ޢަބްދުއްރަޙީމް ފާހަގަކުރެއްވިއެވެ.
ތަފާތަކީ މިއަދުގެ ރައީސުލްޖުމްހޫރިއްޔާ، ދިމާވާ ކޮންމެ ބޮޑުކަމެއްގައި ވެސް ދެ ޕާޓީގެ ލީޑާޝިޕާ އެކީގައި މަޝްވަރާ ކުރައްވާ ކަމަށާއި، ކެބިނެޓް ކުރިއަށް ގެންދަވަނީ ލީޑާޝިޕްގެ މަޝްވަރާއާ އެކީގައި ކަމަށާއި، އެއީ ޕާޓީގެ ނިޒާމާއި ޕާޓީގެ ލީޑާޝީޕް ހިނގާ ގޮތް ކަމަށާއި، ކާމިޔާބު ވަނީ އެހެންވެ ކަމުގައި ޢަބްދުއްރަޙީމް ފާހަގަކުރެއްވިއެވެ.
