މި އަހަރު ރާއްޖެއިން ޙައްޖަށް ދިޔަ ދިވެހިން އެނބުރި ގައުމަށް އަންނަން މިއަދު ފަށައިފިއެވެ.
އެގޮތުން، ދިވެހި އްޖުވެރިންގެ ފުރަތަމަ ފްލައިޓް ވެލާނާ އިންޓަނޭޝަނަލް އެއާޕޯޓަށް ޖެއްސީ އިއްޔެ މެންދުރު ފަހު 1:55 ގައެވެ. އެ ފްލައިޓުގައި 296 ޙައްޖުވެރިން ވަނީ ރާއްޖެ އައިސްފައެވެ.
ދިވެހި ހައްޖުވެރިން ރާއްޖެ އައުމަށް ހަތަރު ފްލައިޓެއް ބާއްވާނެ ކަމަށެވެ. ފުރަތަމަ ފްލައިޓު މިއަދު އައިރު ދެން އެންމެ އަވަހަށް ހައްޖުވެރިން އަންނާނީ އަންނަ ހުކުރު ދުވަހު ބާއްވާ ފްލައިޓަކުން ކަމަށާއި، އަންނަ މަހު އެކަކާއި ހަތަރެއްގައި ވެސް ފްލައިޓެއް ބާއްވާނެ ކަމަށް ރާއްޖޭގެ ޙައްޖު މިޝަން އިން ވިދާޅުވެއެވެ.
1445 ވަނަ އަހަރުގެ ޙައްޖުގެ އަޅުކަން އަދާކުރުމަށްފަހު އެނބުރި ރާއްޖެދާ ފުރަތަމަ ފްލައިޓްގެ ޙައްޖުވެރިން އެއަރޕޯޓަށް ދިއުމަށް ބަހަށް އަރަނީ. މި ފްލައިޓުން ފުރާނީ 296 ޙައްޖުވެރިން. pic.twitter.com/qij5XB511F
— Maldives hajj mission بعثة ا لحج ا المالديفية (@hajjmission_mv) June 23, 2024
ރާއްޖެއިން މި އަހަރު ހައްޖުގެ އަޅުކަމަށް 1،150 މީހުން ދިޔައެވެ.
ޙައްޖުވެރިން އަންނަން ފެށުމާ އެކު އެއާޕޯޓަށް ބާރުބޮޑުވާނެތީ، އެހެން ފްލައިޓުތަކުން ދަތުރުކުރާ ފަސިންޖަރުން ވީހާވެސް އަވަހަކަށް ނުވަތަ ތިން ގަޑިއިރު ކުރިން ޗެކިން ވުމަށް އެމްއޭސީއެލް އިން ވެސް މިއަދު ވަނީ އެދިފައެވެ.
