ރިޔާސީ އިންތިޚާބާ ދިމާކޮށް މަހުގެ އަގު އޭރުގެ ސަރުކާރުން ބޮޑުކުރުމުގެ ސަބަބުން މަސްވެރިންނާއި އެ ސިނާއަތަށް ބޮޑު ގެއްލުމެއްވިކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ވިދާޅުވެއްޖެއެވެ.
ދައުލަތުގެ މީޑިޔާ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅުދައްކަވަމުން، އަޒާން ވިދާޅުވީ ކުރިއާ އަޅާބަލާއިރު ރާއްޖޭގެ މަސްވެރިކަން ތަރައްގީވެ ކެޕޭސިޓީ ވަރަށް ބޮޑަށް އިތުރުވެފައިވި ނަމަވެސް މިފްކޯއަށް އަންނަންޖެހޭ ތަރައްގީ އައިސްފައިނުވާކަމަށެވެ. މިހާރުވެސް މިފްކޯއިން އެކްސްޕޯޓު ކުރަނީ ޕްރޮސެސް ނުކުރާ މަސް ކަމަށާއި، ސަރުކާރުން މިހާރު މަސް ގަންނަންޖެހިފައިވަނީ ގެއްލުމުގައި ކަމަށް އޭނާ ވިދާޅުވިއެވެ.
އަޒާން ވިދާޅުވީ، ރިޔާސީ އިންތިޚާބަށް ކުޑަ ދުވަސްކޮލަކަށްވެފައި ވަނިކޮށް މަސް ކިލޯއެއްގެ އަގު 25 ރުފިޔާއަށް އެމްޑީޕީ ސަރުކާރުން ބޮޑުކުރިއިރުވެސް، އެ ފައިސާ ބަޖެޓުގައި ނެތްކަން އެ ސަރުކާރަށް އެނގޭކަމަށާއި، މިއީ މަސްވެރިންނަށް ދިން ބޮޑު ގެއްލުމުގެގޮތުގައި ސިފަކުރައްވާ އަޒާން ވިދާޅުވީ އެގޮތަށް ބަދަލު ގެނައި ނަމަވެސް މި ސަރުކާރުން ދަތި އުދަނގުލާއެކު ފައިސާ ދައްކާ ބެކްލޮގް ކްލިއާ ކޮށްފައިވާ ކަމަށެވެ.
އައްޑޫގައި ކުރިއަށްދާ މަސްވެރިންގެ އިހުތިޖާޖަށް އިޝާރާތް ކުރައްވާ އަޒާން ވިދާޅުވީ މަސްވެރިންނަށް ދިމާވެފައިވާ ދަތިތައް ޙައްލު ކުރެއްވުމަށް ސަރުކާރުން ވައުދުވެވަޑައިގެންނެވި ނަމަވެސް އެއީ ކުޑަ ދުވަސްކޮޅެއްގެ ތެރޭގައި ހައްލު ކުރެވޭނެ ކަމެއް ނޫން ކަމަށެވެ. އަދި އެމަނިކުފާނަށް ވައުދުތައް ނުފުއްދޭ ކަމަށްވާނީ ދައުރު ނިމޭއިރުވެސް މައްސަލަތައް ހައްލުނުކުރެވޭނަމަ ކަމަށް އަޒާން ވިދާޅުވިއެވެ.
