ފެނަކަ ކޯޕަރޭޝަނުން ދޭ ޔުޓިލިޓީ ޚިދުމަތުގެ ބިލް މިއަދުން ފެށިގެން ފޮނުވާނީ އެސްއެމްއެސް މެދުވެރިކޮށް ކަމަށް އެކޯޕަރޭޝަނުން ވިދާޅުވެއްޖެއެވެ.
ފެނަކައިން ވިދާޅުވީ، ޕްރިންޓްކޮށްފައިވާ ބިލް ހަވާލުކުރުމުގެ ބަދަލުގައި، ކޮންމެ ކަސްޓަމަރަކަށްވެސް އެ ކަސްޓަމަރަކު ކުންފުނީގައި ރަޖިސްޓަރ ކޮށްފައިވާ ފޯނު ނަންބަރަށް އެސްއެމްއެސް މެދުވެރިކޮށް ބިލް ފޮނުވާނެކަމަށެވެ. އެގޮތުން މިއަދުން ފެށިގެން ބިލު ފޮނުވަމުންދާނީ އެސްއެމްއެސް މެދުވެރިކޮށްކަމަށެވެ.
އެސްއެމްއެސް މެދުވެރިކޮށް ފޮނުވާ ބިލުގައި ހިމަނާފައި ހުންނާނެ މަޢުލޫމާތުތަކުގެ ތެރޭގައި ބިލިންގް އެޑްރެސް، ބިލް ނަންބަރު، ސަބްސްކްރިޕްޝަން ނަންބަރު، މީޓަރު ނަންބަރު، ބިލުގައިވާ ފައިސާގެ އަދަދު އަދި މުއްދަތު ހަމަވާ ތާރީޚު ހިމެނެއެވެ.
މީގެ އިތުރުން ބިލަށް ފައިސާ ދެއްކުމަށް ކަނޑައަޅާފައިވާ މުއްދަތު ހަމަވުމުން ފައިސާ ނުދައްކާ ފަރާތްތަކަށް ފޮނުވާ "ރެޑްނޯޓިސް"ވެސް ދެން ފޮނުވާނީ އެސްއެމްއެސް މެދުވެރިކޮށް ކަމަށް ފެނަކައިން ވިދާޅުވެއެވެ.
މިޢުސޫލަށް މިއަދުން ފެށިގެން އަމަލުކުރަން ފަށާފައިވާއިރު، މިމަޢުލޫމާތުތައް ހިމެނޭގޮތަށް ބިލު އެސްއެމްއެސް މެދުވެރިކޮށް ލިބެމުން ނުދާނަމަ، ޚިދުމަތް ހޯދާ ބްރާންޗަށް ގުޅައިގެން މައްސަލަ ހައްލުކުރުމަށް ފެނަކައިން ވަނީ އެދިފައެވެ.
އެންމެ ފަހުގެ ބިލު މިއަދުން ފެށިގެން އަންނަ މަހުގެ 5ގެ ނިޔަލަށް ފޮނުވަމުންދާނެކަން ފާހަގަކުރައްވަމުން، މިމުއްދަތުގައި ބިލު ނުލިބޭ ފަރާތްތަކުން މައްސަލަ ހައްލުކުރުމަށް ފެނަކައިންވަނީ އެދިފައެވެ.
ފެނަކައިން ވަނީ ސްމަރޓް މީޓަރު ތަޢާރަފުކޮށް ގޭބިސީތަކުގައި ބޭނުންކުރަންވެސް ފަށާފައެވެ. ސްމަރޓް މީޓަރުގެ ސަބަބުން، ކޮންމެ ދުވަހަކު އެގޭބިސީއަކުން ބޭނުންކުރާ ކަރަންޓުގެ މިންވަރު ފަސޭހައިން ބަލާލެވޭނެއެވެ. އަދި މީގެ ސަބަބުން ކަރަންޓު ބޭނުންކުރާ މިންވަރު މަދުކޮށް، ބިލު ކުޑަކުރުމަށްވެސް އެހީތެރިވެދެއެވެ.
ބައެއް ރަށްރަށުގައި ސްމާރޓް މީޓަރު ތަޖުރިބާކޮށްފައިވާއިރު، ފެނަކައިން ޚިދުމަތްދޭ ހުރިހާ ރަށެއްގައި ސްމާރޓް މީޓަރު ބޭނުންކުރަން ފެށުމަކީ އެ ކުންފުނީގެ ޢަމާޒެކެވެ.
