މަނަދޫ އަޒީގެ ޅެންހާރު: މަރްޙޫމް މުޙަންމަދު ޢާރިފް (ބަކާ)ގެ ޛިކްރާ

*ރާގު: އޭކުމޭހޫން އޭކުމޭރީ ބޭގަސީކީ ސާމުހޭ….
ދިވެހި:(ދޭހުގައި ހިނގަމުންމިދާ)

ވަކިވެގެންދިޔުމުން ބަކާ މުޅިޤައުމު އަދު ރޮއްވައިފިޔޭ

ވަކިނުވާނެ ހަނދާންތަކުން ހިތްތައްއެކީ ފުރުވައިފިޔޭ

މާތްވި ޙައްޖުގެ އަޅުކަމަށްފަހު އެނބުރި އައުމާއެކު ރަށަށް 2

މާތް އިލާހުގެ حضرةއަށް އެ ފުރާނަ އުދުހި ހިގެއްޖެޔޭ

މިސްކިތާ ގުޅިފައިއެވާހިތް މީހުނާހުރި ގާތްކަމުން 2

އިސްކަމާއެކު ހިތްތަކުންވީ ޖާގައެއް ހޯދާފަޔޭ

ދުއްލިސާއެއްފަދަ މި ޤައުމަށް ކުޅިވަރުން އަލިކަން ގެނައި 2

ކުއްލިވަކިވުން ޢާރިފުގެ ޤައުމަށް ސިހުން ގެނުވައިފިޔޭ

ޚާއްޞަކޮށް ފުޓްބޯޅަޔަށް ކުރި ފަނޑުނުވާނޭ ޚިދްމަތުން 2

ޚާއްޞަ ޤަދަރާ ޝަރަފަކާ ޤައުމުންވަނީ ލިބިދީފަޔޭ

ހެޔޮލަފާ ދީންވެރި ބަކާގެ ހަނދާންތަކުން މުޅި ޤައުމުގައި 2

ހެޔޮދުޢާޔާ ހެޔޮ އެދުންތައް އަދުވަނީ ގުގުމާފަޔޭ

އެންމެފަހު ވަގުތާޖެހެންދެން ދީނުގައި ސާބިތުވުމުން 2

އެންމެ އިސްކަމަކީ އެއީކަން ސާފުކޮށް އެނގިގެންދެޔޭ

ފެތުރުމަށް ދީން ކުރިމަސައްކަތް އެކިރޮނގުން ޚާލިޞް ހިތުން 2

ފެތުރިގޮސް މުޅި މީޑިޔާގައި މިއަދު ޢާއްމުވެފައިވެޔޭ

ކުޅިވަރުގެ ދަނޑުގައިވިޔަސް ދިނުމުން ނަމާދަށް އިސްކަމެއް 2

ކުޅިވަރުގެ މުޅިޢާއިލާ އެކަމަށް ފަޚްރުވެރި ވެސްވެޔޭ

އަސަރުތައް ހިތްތަކުގެ ފުނުގައި އުފެދިފައިވާ އެކިގޮތައް 2

އަސަރުގަދަ އެކިއެކި ޝުޢޫރުން ފާޅުކުރަމުން އެބަދެޔޭ

ސާފުޠާހިރު ހިތްތަކަށް ދުނިޔޭން ލިބޭނެ ނަސީބަކީ 2

ސާފުޠާހިރުކަންމަތީ ދުނިޔޭން ވަކިވެ ދިޔައުން މެޔޭ

ޖަންނަތުލް ފިރްދައުސުގައި އެ ފުރާނަ މަތިވެރިލައްވަވައި 2

ޖަންނަތުގެ ރަޙްމަތް ލިބުންމީ މުޅި ޤައުމުގެ ދުޢާމެޔޭ

26 ޖޫން 2024
* عبدالعزيز قاسم
ލިލީ ނ.މަނަދޫ