އެމްއެސްއެމްއީ އެވޯޑު ދިނުމަށް ބިޒްނަސް ސެންޓަރ ކޯޕަރޭޝަނުން ތައްޔާރުވެއްޖެއެވެ.
މިއީ މިފަދަ އެވޯޑެއް ރާއްޖޭގައި ދޭން ފަށާ ފުރަތަމަ ފަހަރެވެ. މިއީ މިދާއިރާ އިތުރަށް ކުރިއެރުވުމަށް މުހިއްމު ކަމެއްގެ ގޮތުގައި ބީސީސީއިން ފާހަގަކުރެއެވެ.
ބައިނަލްއަޤުވާމީ އެސްއެމްއީ ދުވަހުގެ މުނާސަބަތުގައި ބިޒްނަސް ސެންޓަރ ކޯޕަރޭޝަންއިން ނެރުއްވި މި ބަޔާނުގައި ވަނީ އެމްއެސްއެމްއީ އެވޯޑުގެ ނަމުގައި ދޭން ފަށާ މިއެވޯޑަކީ ކުދި ވިޔަފާރިތަކުން ޤައުމީ އަދި ބައިނަލްއަޤުވާމީ ފެންވަރުގައި ކުރަމުންދާ މަސައްކަތްތަކާއި ހޯދަމުންދާ ކާމިޔަބީތައް ފާހަގަކޮށް ދޭން ނިންމި އެވޯޑެއްކަމަށެވެ.
ރާއްޖޭގައި އަމިއްލަ މަސައްކަތްކުރާ ފަރާތްތަކާއި، ވިޔަފާރި ރަޖިސްޓަރ ކުރުން ލާޒިމުނުވާ ފަށައިގަންނަ ވިޔަފާރިތަކަކީ ދިވެހި އިޤްތިޞާދުގައި ބޮޑު ހިއްސާއެއް އަދާކުރާބައެއްކަމަށް ބީސީސީގެ މެނޭޖިންގ ޑިރެކްޓަރ ވިދާޅުވިއެވެ.
ދިވެހި އުފެއްދުންތައް ބޭރުގެ އެކި ޤައުމުތަކުގައި ވިއްކޭނެ ފުރުސަތުތަކާއި ބައިނަލްއަޤުވާމީ އެކި އިވެންޓުތަކުގައި ދިވެހި އުފެއްދުންތައް ބައިވެރިކޮށް އިޝްތިޙާރު ކުރެވޭނެ އިންތިޒާމުތައް ހަމަޖއްސަމުންދާކަން ޒިޔާއު ފާހަގަކުރެއްވިއެވެ.
ބައިނަލްއަޤުވާމީ އެންމެ ކުދި އަދި މެދުފަންތިގެ ވިޔަފާރިތަކުގެ ދުވަހަކީ ކޮންމެ އަހަރެއްގެވެސް ޖޫން މަހުގެ 27 ވަނަ ދުވަހެވެ.
