ތުރުކީ ހަނޑޫ އޭޕްރީލް މަހު ރާއްޖެއަށް އެތެރެވި ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ހާމަކޮށްފިއެވެ.
އެސްޓީއޯގެ މީޑިއާ އޮޕިސަރު ޔޫސުފް ޝާހު މިކަން ހާމަކޮށްފައިވަނީ އެކްސްގައި މިއަދު ކުރެއްވި ޕޯސްޓެއްގައެވެ. އެކްސްގައި މީހަކު ކުރި ޕަސްޓެއްގައި ކޮށްފައިވާ ސުވާލަށް ޖަވާބުދެއްވަމުން ޝާހު ކުރި ޕޯސްޓެއްގައި ވަނީ އޭޕްރީލް 20 ގައި ތުރުކީން ރާއްޖެއަށް ހަނޑޫ އެތެރެކޮށްފައިވާ ކަމަށް ހާމަކޮށްފައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމަށް ވަޑައިގެން ތުރުކީއަށް ކުރެއްވި ރަސްމީ ދަތުރުފުޅަށްފަހު ވަނީ ރާއްޖެއަށް އެގައުމުން ހަނޑުލާއި ކާޑުގެ ބައެއް ބާވަތްތައް ގެނައުމަށް އެއްބަސްވެވަޑައިގެންފައިވާ ކަމަށް ވިދާޅުވެފަ އެވެ. އެއާއެކު، މިހާރު އިދިކޮޅުގެ ބައެެއް އެކްޓިވިސްޓުން ދަނީ ތުރުކީގެ ހަނޑުލުގެ ބާވަތްތައް ސަރުކާރުން ރާއްޖެއަށް އެތެރެކުރާނީ ކޮން ދުވަހެއްގައި ކަމާއި ދޭތެރޭ ސުވާލު އުފައްދަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކާޑުގެ ބާވަތްތައް ހޯދުމުގައި އެއް ގައުމަކަށް ބަރޯސާ ވުމުގެ ބަދަލުގައި އެހެން ގައުމުތަކުންވެސް ޒަރޫރީ ކާދޫގެ ބާވަތްތައް ރާއްޖެއަށް އެތެރެކުރައްވަން ޖެހޭ ކަމަށް ގަބޫލުކުރައްވާ ކަމަށް ވިދާޅުވެފަ އެވެ. މީގެ އިތުރަށްވެސް ރައީސް ވަނީ ރާއްޖޭގައި ފުޑް ސެކިއުރިޓީ ގާއިމުކުރުމަށް އަމިއްލައަށް ކާބޯތަކެތި އުފެއްދުމުގެ މަޝްރޫއުތައްވެސް ކުރިއަސް ގެންދަވަން ރާވާފައިވާކަމަށް ވިދާޅުވެފަ އެވެ. އެގޮތުން، މިހާރު ދަނޑުވެރިކަމާއި ބެހޭ ވުޒާރާއިން ދަނީ ބައެއް ރަށްރަށުގައި ދަނޑުވެރިކަން އާލާކުރުމަށް ހާއްސަ މަޝްރޫއުތައް ހިންގަމުންނެވެ.
