މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ އަހަރީ 2023 ވަނަ އަހަރުގެ އަހަރީ އާންމު ޖަލްސާގައި ބައިވެރިވާން ބޭނުންވާ ހިއްސާދާރުންނަށް ރަޖިސްޓަރ ކުރުމުގެ ފުރުސަތު ހުޅުވައިލައިފިއެވެ.
އެ ކުންފުނިން ވިދާޅުވި ގޮތުގައި، އެމްޓީސީސީގެ އަހަރީ އާންމު ޖަލްސާ ބޭއްވުމަށް ހަމަޖެހިފައިވަނީ މި މަހުގެ 17 ވާ ބުދަ ދުވަހުގެރޭ 20:30 ގައި ކުރުނބާ މޯލްޑިވްސްގެ ބޯގަންވިލާ މާލަމުގައެވެ.
އެމްޓީސީސީއިން ވަނީ މި ޖަލްސާގައި ހިއްސާދާރުންނަށް މޯލްޑިވްސް ސެކިއުރިޓީޒް ޑިޕޮސިޓަރީގެ އޮންލައިން ވެބް އެޕްލިކޭޝަން "ފަހިވޯޓް" މެދުވެރިކޮށް ނުވަތަ ޖަލްސާއަށް ވަޑައިގެން ބައިވެރިވުމުގެ ފުރުސަތު ހުޅުވައިލައިފައެވެ.
މި ޖަލްސާގައި ބައިވެރިވެވޭނީ މިދިޔަ ޖޫންމަހުގެ 23 ވަނަ ދުވަހުގެ ނިޔަލަށް އެ ކުންފުނީގެ ހިއްސާދާރުންގެ ދަފްތަރުގައި ރަޖިސްޓްރީކޮށްފައިވާ ފަރާތްތަކަށް ކަމަށް އެ ކުންފުނިން ވިދާޅުވެއެވެ.
ޖަލްސާގެ އެޖެންޑާ
- ކީރިތި ޤުރުއާނުގެ ބަރަކާތުން ޖަލްސާ ފެށުން
- 2022 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސްކުރުން
- ޚާއްސަ އާންމު ޖަލްސާ 2024ގެ ޔައުމިއްޔާ ފާސްކުރުން
- 2023 ވަނަ އަހަރުގެ ޑިރެކްޓަރުންގެ ރިޕޯޓް ހުށަހަޅައި ފާސްކުރުން
- 2023 ވަނަ އަހަރުގެ އޮޑިޓްކޮށްފައިވާ ކުންފުނީގެ ބެލެންސް ޝީޓާއި، ފައިދާ އާއި ގެއްލުމުގެ ހިސާބު ހުށަހަޅައި ފާސްކުރުން
- 2023 ވަނަ އަހަރުގެ ފައިދާއިން ހިއްސާދާރުންނަށް ބެހުމަށް ޑިރެކްޓަރުންގެ ބޯޑުން ހުށަހަޅާފައިވާ އަދަދު ފާސްކުރުން
- 2024 ވަނަ އަހަރަށް ކުންފުނީގެ އޮޑިޓަރުން ހޮވައި، އެ ފަރާތުގެ އުޖޫރަ ކަނޑައެޅުން
- ކުރިއަށް އޮތް ދައުރަށް ސަރުކާރުގެ ފަރާތުން އައްޔަންކޮށްފައިވާ ޑިރެކްޓަރުންގެ ނަންތައް އިއުލާނު ކުރުން
- ކުރިއަށް އޮތް ދައުރަށް އާންމު ހިއްސާދާރުންގެ ފަރާތުން ޑިރެކްޓަރުން އިންތިޚާބު ކުރުން
- ހިއްސާދާރުންގެ ސުވާލުތަކަށް ޑިރެކްޓަރުންގެ ބޯޑުން ޖަވާބު ދެއްވުން
އެމްޓީސީސީއިން ވިދާޅުވީ، ޖަލްސާގައި ބައިވެރިވުމަށް ބޭނުންވާ އެންމެހައި ހިއްސާދާރުން ޖުލަައި 15 ވަނަ ދުވަހުގެ 20:30 ގެ ކުރިން ރަޖިސްޓަރ ކުރަންވާނެ ކަމަށެވެ.
މޯލްޑިވްސް ސެކިއުރިޓީސް ޑިޕޮޒިޓަރީގެ އިންފިނިޓީ ޕޯރޓަލް (infinity.mv)، އެމްޓީސީސީގެ ޝެއަރހޯލްޑަރސް އޮންލައިން ޕޯރޓަލް (sop.mtcc.com.mv)، ([email protected]) އީމެއިލް މެދުވެރިކޮށް ނުވަތަ އެމްޓީސީސީ ޓަވަރުގެ ކައުންޓަރަށް ހުށަހަޅައިގެން ވެސް ރަޖިސްޓަރ ކުރެވޭނެއެވެ.
ޖަލްސާއަށް ރަޖިސްޓަރ ކުރާނެ ގޮތުގެ ވީޑިއޯ އަދި ޖަލްސާއާއި ގުޅޭ ފޯމުތައް އެމްޓީސީސީގެ ވެބްސައިޓުގައި ވަނީ ޝާއިއުކޮށްފައެވެ.
މި ޖަލްސާގައި ވޯޓުލުން ކުރިއަށް ގެންދިއުމަށް ހަމަޖެހިފައި ވަނީ އިލެކްޓްރޯނިކް ވަސީލަތެއް މެދުވެރިކޮށްކަމުގައިވާތީ ޖަލްސާއަށް ހާޒިރުވެ، ބައިވެރިވެ ވަޑައިގަންނަވާ ފަރާތްތައް ސްމާރޓް ފޯނު / ޓެބްލެޓް ފަދަ، "ފަހިވޯޓް" ބޭނުންކުރެވޭނެ ވަސީލަތަކާއެކު ޖަލްސާއަށް ވަޑައިގަތުމަށް އެދޭކަމަށް އެކުންފުނިން ވިދާޅުވެއެވެ.
