ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީ.އެޗް.އެސް.އީ) އަށް 45 އަހަރު ފުރުން ފާހަގަކުރުމަށް ބޭއްވި ޚާއްޞަ އެސެމްބްލީގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެ ވަޑައިގެންފިއެވެ.
މި އެސެމްބްލީގައި ރައީސުލްޖުމްހޫރިއްޔާގެ އަރިހުގައި އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢު ވެސް ބައިވެރިވެ ވަޑައިގެންނެވިއެވެ. ދެ ބޭފުޅުންނަކީ ވެސް ސީ.އެޗް.އެސް.އީގެ އިސްދަރިވަރުންނެވެ.
ސީ.އެޗް.އެސް.އީގެ 45 ވަނަ އަހަރީ ދުވަހުގެ ޚާއްސަ އެސެމްބްލީގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ސީ.އެޗް.އެސް.އީ އަކީ އެމަނިކުފާނުގެ ތަޢުލީމީ ހަޔާތުގައި ވެސް މުހިންމު ހަނދާންތަކެއް ހިމެނޭ ތަޢުލީމީ ބިނާއެއްކަމަށެވެ. އަދި އަހަރީ ދުވަހު ދަރިވަރުންނާ އެކީ ވަގުތުކޮޅެއް ހޭދަކޮށްލަން ލިބުމަކީ ލިބިވަޑައިގެންނެވި ބޮޑު އުފަލެއްކަމަށެވެ.
މަތީ ޘާނަވީ މަރުޙަލާއަކީ ދަރިވަރުންގެ މުސްތަޤްބަލު ބައްޓަންކުރަން ލިބޭ އެންމެ މުހިންމު މަރުހަލާކަން ފާހަގަކޮށް، ރައީސް ވަނީ އަމިއްލަ ހަޔާތަށްޓަކާ މި ފުރުޞަތުގެ ބޭނުން އެންމެ ހެޔޮގޮތުގައި ހިފުމަށް ދަރިވަރުންނަށް އިލްތިމާސްކުރައްވާފައެވެ.
މި އެސެމްބްލީގައި މިނިސްޓަރ ޑރ. އިސްމާޢީލް ޝަފީޢު ފާހަގަކުރެއްވި ގޮތުގައި ހުޅުމާލޭގައި ހުރި ސީ.އެޗް.އެސް.އީގެ އައު އިމާރާތުގައި ތަޢުލީމު ހާސިލުކުރުމަށް މާލެއިން ދާ ދަރިވަރުންނަށް ފަސޭހަކޮށްދިނުމަށްޓަކާ މާލޭގައި ހުރި ސީ.އެޗް.އެސް.އީގެ އިމާރާތުގައި ވެސް މިއަހަރު އޭ ލެވެލްއަށް ކިޔަވައިދޭން އަލުން ފެށުމަށް ރައީސުލްޖުމްހޫރިއްޔާގެ ލަފާފުޅާއެކު، ސަރުކާރުން ވަނީ ނިންމާފައެވެ.
މީގެ 45 އަހަރު ކުރިން 1979 ވަނަ އަހަރުގެ ޖުލައި މަހުގެ 3 ވަނަ ދުވަހު ސައިންސް އެޑިޔުކޭޝަން ސެންޓަރ (އެސް.އީ.ސީ)ގެ ނަމުގައި ރާއްޖޭގައި ފުރަތަމަ ފަހަރަށް މަތީ ޘާނަވީއަށް ކިޔަވައިދޭ ސްކޫލް ހުޅުވިއެވެ. މި ސްކޫލުގެ ނަން ނިހާރު އޮތް ގޮތަށް ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީ.އެޗް.އެސް.އީ) އަށް ބަދަލުކޮށްފައިވަނީ 2001 ގައެވެ.
1700 ދަރިވަރުން ކިޔަވަމުންދާ ސީ.އެޗް.އެސް.އީ އަކީ ދިވެހިރާއްޖޭގައި މަތީ ޘާނަވީ ތަޢުލީމު ކުރިއެރުވުމަށް މުހިންމު ދައުރެއް އަދާކުރާ ސްކޫލެކެވެ.
