ހުޅުމާލެ 2 ގައި 14 ބުރިއަށް އަދި އެއަށް ވުރެ އުސްކޮށް ރެސިޑެންޝިއަލް 10 ޓަވަރު އަޅާނެ ބަޔަކު ހޯދަން އެޗްޑީސީން އިއުލާންކޮށްފިއެވެ.
އެޗްޑީސީން ވަނީ މި މަޝްރޫއު ހިންގުމަށް ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުސަތު ހުޅުވާލާފައެވެ.
އެއީ، ހުޅުމާލެ 2 ގައި މީހުންނަށް ދިރިއުޅެވޭނެ ގޮތަށާއި ވިޔަފާރި ކުރެވޭނެ ގޮތަށާއި ޕާކިން އާއި އިތުރު އާންމު ހިދުމަތްތަކާ އެކު ހަދާ މިކްސްޑް ޔޫސް ރެސިޑެންޝިއަލް އިމާރާތްތަކެއް ކަމަށް ވެސް އެ ކުންފުނީގެ އިއުލާނުގައިވެއެވެ.
ހުޅުމާލެ 2 ގައި ހުންނަ ހިޔާ ފްލެޓްތަކުގެ އުތުރަށް އޮންނަ ބޮޑު ބިމުން ބައެއް ވިއްކައިގެން ހިންގާ މި މަޝްރޫއު ހަވާލު ކުރާނެ ފަރާތެއް ކަނޑައަޅާނީ އެޗްޑީސީގެ ސިޔާސަތުތަކާ ގުޅޭ ގޮތަށް އެންމެ ފުރިހަމަ ޕްރޮޕޯސަލްއަކާއި އަގެއް ހުށަހަޅާ ފަރާތަކަށް ކަމަށް ވެސް އެ ކުންފުނިން ވިދާޅުވެއެވެ.
އެޗްޑީސީން އާންމުކޮށްފައިވާ އިއުލާނާއެކު ބިމާ ބެހޭ ތަފުސީލުގައިވާ ގޮތުން އެއީ 9،000 އަކަފޫޓާއި 15،100 އަކަފޫޓާ ދެމެދުގެ 10 ބިމެވެ. އެ ބިންތަކުގައި އިމާރާތްކުރަން ޖެހެނީ 14 ބުރީގެ ހަ ޓަވަރާއި 20 ބުރީގެ ދެ ޓަވަރު އަދި 15 ބުރީގެ ދެ ޓަވަރެވެ.
ރެސިޑެންޝިއަލް އިމާރާތް އެޅުމަށް ހުޅުމާލެ 2 އިން ދޫކުރާ ސަރަހައްދު، އެޗްޑީސީގެ ކުރެހުމެއް
ހުޅުމާލެ 2 ގައި ކޮމާޝަލް އިމާރާތްތަކެއް އަޅަން އީއޯއައި ހުށަހެޅުމުގެ ފުރުސަތު ވެސް އެޗްޑީސީން މިއަދު ވަނީ ހުޅުވާލައިފައެވެ. އީއޯއައި ހުށަހަޅަން ވަކި މުއްދަތެއް ދީފައެއް ނުވެއެވެ. އެއީ ވެސް ހުޅުމާލެ 2 ގެ އިރުމަތީ ފަރާތުން ހަތަރު ބިމެއްގަ އެވެ. ހަތަރު ބުރިއަށް ނަގަން ޖެހޭ އެ އިމާރާތްތައް ހަދަން ވިއްކާ ބިންތަކަކީ 4،000 އަކަފޫޓާއި 11،015 އަކަފޫޓާ ދެމެދުގެ ބިންތަކެވެ.
