މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާން ހުށައަޅަން ޖެހޭނީ އަންނަ އަހަރުގެ އޯގަސްޓު މަސް ނިމުމުގެ ކުރިންކަމަށް ރައްޔިތުންގެ މަޖިލީހުން ވިދާޅުވެއްޖެއެވެ.
ރައްޔިތުންގެ މަޖިލީހުގެ ޤަވާއިދުގައި ބަޔާންކުރާ މުއްދަތު ހަމަވީއިރުވެސް މެންބަރުން މާލީ ބަޔާން ހުށަނާޅާކަމަށް ބައެއް ފަރާތްތަކުން ދައްކާ ވާހަކަތަކާ ގުޅިގެން، ރައްޔިތުންގެ މަޖިލީހުގެ އިދާރާއިން ވިދާޅުވީ މަޖިލީހުގެ ޤަވާއިދު ބަޔާންކުރާގޮތުގައި މެންބަރުންގެ މުދަލާއި ފައިސާގެ ބަޔާން ނުވަތަ މާލީ ބަޔާން ހުށަހަޅަންވާނީ، އެ މެންބަރެއްގެ މެންބަރު ކަމުގެ ހުވާކުރާ ތާރީޚުން ފެށިގެން 1 އަހަރުދުވަސް ފުރިހަމަ ވުމުން ކަމަށެވެ.
މަޖިލީހުގެ އިދާރާއިން މިއަހަރު މެއި 28 ވަނަ ދުވަހު 20 ވަނަ ދައުރަށް މެންބަރުން ހުވާ ކުރައްވާފައިވުމުން އެމެންބަރުން މާލީ ބަޔާން ހުށަހަޅަން ޤަވާއިދުގައި ބަޔާންކޮށްފައިވަނީ އަންނަ އަހަރުގެ މެއި 28 ވަނަ ދުވަހަށް އެއް އަހަރު ފުރުމަށްފަހުކަމަށާއި، އެ މެންބަރުން މާލީ ބަޔާން ހުށަހެޅުމުގެ އެންމެ ފަހު މުއްދަކީ އަންނަ އަހަރުގެ އޯގަސްޓް މަހުގެ 31 ވަނަ ދުވަހު ކަމަށެވެ.
މެންބަރުންގެ މާލީ ބަޔާން ޤަވާއިދުގައި ބަޔާންކުރާ މުއްދަތުގެ ތެރޭގައި ޢާންމުކުރަމުން ދާކަމަށާއި، ނިމިދިޔަ 19 ވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައްވެސް ވެބްސައިޓުން ފެންނާނެ ކަމަށް މަޖިލީހުގެ އިދާރާއިން ވިދާޅުވިއެވެ. އަދި އެބޭފުޅުންގެ 5 ވަނަ އަހަރުގެ މާލީ ބަޔާން ހުށަހަޅުއްވާނީ މިއަހަރުގެ އޯގަސްޓް މަސް ނިމުމުގެ ކުރިން ކަމަށްވެސް ރައްޔިތުން މަޖިލީހުގެ އިދާރާއިން ވަނީ ވިދާޅުވެފައެވެ.
