މިއަހަރުގެ ޒުވާނުންގެ ދުވަސް ފާހަގަ ކުރުމުގެ ގޮތުން ދިނުމަށް ހަމަޖެހިފައިވާ ޒުވާނުންގެ އިނާމު ދިނުމުގެ ހަފްލާ ފަހުގެ ތާރީޚަކަށް ބަދަލުވެފައިވާކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން ވިދާޅުވެއްޖެއެވެ.
ޒުވާނުންގެ އިނާމު ދިނުމުގެ ހަފްލާ ބާއްވަން ކުރިން ނިންމާފައި އޮތީ އޯގަސްޓު، 12 ގައެވެ.
ޒުވާނުން ބާރުވެރިކުރުވުމާއި ބެހޭ ވުޒާރާއިން، މަޢުލޫމާތުދެއްވި ގޮތުގައި، އިނާމް ދިނުމުގެ މިހަފްލާ ފަސްކުރީ، ދައުލަތުން ކުރާ ޚަރަދު ކުޑަކުރުމަށް ސަރުކާރުން އަޅުއްވަން ނިންމަވާފައިވާ ފިޔަވަޅުގެ ދަށުންނެވެ. މިހަފްލާ ބާއްވާނެ ތާރީޚެއް ފަހުން އިޢުލާންކުރައްވާނެ ކަމަށް އެވުޒާރާއިން ވަނީ ވިދާޅުވެފައެވެ.
އެވޯޑު ދިނުމުގެ ހަފްލާ ލަސްވުމާއި ގުޅިގެން، އަލުން އެވޯޑަށް ކުރިމަތިލުމަށް ހުޅުވާލާނެ ކަމަށާއި އެހެންނަމަވެސް މިހާރު ކުރިމަތިލާފައި ތިބި ފަރާތްތަކަށް އިތުރު ބަދަލެއް ނާންނާނެ ކަމަށް އެވުޒާރާއިން ވިދާޅުވިއެވެ.
މި އިނާމަކީ ގައުމުގެ ތަރައްގީގައި ޒުވާނުން އަދާކުރާ މުހިންމު ދައުރު ފާހަގަކޮށް ޒުވާނުންނަކީ މުޖުތަމައުއަށް ފައިދާހުރި، އުފެއްދުންތެރި، ޒިންމާދާރު ބަޔަކަށް ހެދުމަށް ބާރުއަޅައި، ވާގި ދިނުމުގެ ގޮތުން ދޭ އިނާމެކެވެ.
މިއަހަރު 17 ދާއިރާއަކުން އެވޯޑް ދޭންވަނީ ނިންމާފައެވެ.
ޒުވާނުންގެ އެވޯޑު ލިބޭ ފަރާތްތަކަށް އިނާމުގެގޮތުގައި ޒުވާނުންނަށް ދެވޭ ހާއްސަ އެވޯޑާއި އަދި ސެޓްފިކެޓް ލިބިގެން ދާނެއެވެ.
މި އަހަރު ޒުވާނުންގެ އެވޯޑުގެ ގޮތުގައި ތަފާތު 17 ދާއިރާއަކުން އިނާމު ދިނުމަށް ވަނީ ކަނޑައަޅާފައެވެ.
އިނާމު ދިނުމަށް ކަނޑައަޅާފައިވާ ދާއިރާތައް:
· ވިޔަފާރިއާއި އިގްތިސާދު
· އާރޓްސް އެންޑް ކަލްޗަރ- ފަންނުވެރިކަމާއި ސަގާފަތް ދިރުވުން
· މަސްތުވާ ތަކެއްޗާއި ދެކޮޅަށް މަސައްކަތްކުރުން
· ދަރުމަވެރިކަން
· ވޮކޭޝަނަލް ޓްރެއިނިންގ- ދަސްކޮށްދިނުން
· ނަފްސާނީގޮތުން ދުޅަހެޔޮ ސިއްހަތެއް ބިނާކުރުމަށް މަސައްކަތްކުރުން
· ތިމާވެށި ހިމާޔަތް ކުރުމަށް މަސައްކަތްކުރުން
· މަސްވެރިކަމުގެ ދާއިރާ
· ދަނޑުވެރިކަމުގެ ދާއިރާ
· މިންތީގެ ހަމަހަމަކަން ގާއިމުކުރުމަށް މަސައްކަތްކުރުން
· ނުކުޅެދުންތެރިކަން ހުންނަ ފަރާތްތައް ބާރުވެރިކުރުމަށް މަސައްކަތްކުރުން
· ޒުވާނުންގެ ބާރުވެރިކަން އިތުރުކުރުމަށް މަސައްކަތްކުރުން
· ހަށިހެޔޮ ދުޅަހެޔޮ ސިއްހަތެއް ބިނާކުރުމަށް މަސައްކަތްކުރުން
· ދިވެހިބަސް ދިރުވުމަށް މަސައްކަތްކުރުން
· ކުޅިވަރުގެ ދާއިރާއިން- ކުޅިވަރުގެ ދާއިރާއިން އާދަޔާއި ހިލާފު ހުނަރެއް ދައްކާފައިވާ ފަރާތްތައް
· ފަންނިއްޔާތުގެ ދާއިރާ
· ޝަހީދު ޖަވާދު އުމަރުގެ ހަނދާނީ ފިލާ
ރާއްޖޭގައި 2016 ވަނަ އަހަރުން ފެށިގެން ދަނީ ޒުވާނުންގެ އެވޯޑުދެމުންނެވެ.
