މަނަދޫ އަޒީގެ ޅެންހާރު: މަލްޓިޕާޓީ ރިވެތި ސިފަތައްހޭ؟

ކޮންކަމެއްގެ ނުފޫޒުގައިހޭ ޙާލުމިފަށަށް ވެއްޓުނީ؟

އޮންނަ ރީތިއުސޫލުތައް މުޖްތަމަޢު ތެރެއިން ގެއްލުނީ؟

ބޮންތަކާ ބަޑިތައް ހިފައިގެން ދޭހަމަލަތައް ނޫނަކަސް

ކޮންމެކަމަކުންވެސް ދެކޮޅުވެރިކަން އުތުރިކެކިގަންނަނީ؟

ހިތްތަކަށް މީހުންގެ ވަރުގަދަ އިންގިލާބުތަކެއް އައިސް

ފިތްކަނޑައިގެންދާވަރުގެ ފާޙިޝްޢަމަލުތައް ހިންގަނީ؟

ވާދަވެރިކަން އުފެދި ބައިބައިވުން އެ ފާލުންނެއްޓިގޮސް

އާދައެއްކަމުގައި މަލާމާތާ ހަޖޫ މި ވެފައިވަނީ؟

ހެޔޮކަމެއްކޮށްގެން އުޅޭމީހަކު އުޅޭނަމައީ މިތާ

ހެޔޮބަހެއްނެތްތާ ނުބައި ތުހުމަމަތުގެ އިނގިލި މަޅައިލަނީ؟

ކޮންމެމީހަކުވެސް އެމީހާ ބުއްދިއަށްފެނި އަންނަގޮތް

އެންމެ މޮޅުގޮތްކަން އެއީ ދައްކަންވެގެން ފައިވިއްދަނީ؟

ބާރުހުރި މީހުންގެ ބާރާ އަދިނުފޫޒާ މުޅިތަނަށް

ބާރުގަދަ ހަތިޔާރަކާ އެއްފަދަގޮތުން ފޮނުވައިލަނީ؟

ބޮޑު ބޮޑުންނާ ލޮޑު ލޮޑުންނާ ފަރަގުވެވިގޮސް އިންތިހާ

ގޮނޑުހޮވާކާ ދަރަޖަޔަށް އެއްބަޔަކު ވެއްޓެން މިޖެހެނީ؟

އެންމެ މަތިވެރި ޞުލްޙަޔާ އިންސާފު މަޞްލަޙަތާ ތިނެތި

"ވެންޓިލޭޓަރުގައި" ކިއެއްހޭ ޙާލުދެރަވާން މިޖެހުނީ؟

ފަލްސަފާއިން އޭގެ މޮޅުކަން ހާމަކޮށް ދައްކަާލަދިން

"މަލްޓިޕާޓީ ރިވެތިސިފަތައްހޭ" މިހިރަ ފެނިގެންދަނީ؟

11 ޖުލައި 2024
*عبدالعزيز قاسم
ލިލީ ނ.މަނަދޫ