12 ފެބުރުވަރީ 2025
"ޕެރިސް އޮލިމްޕިކްސް 2024" ދިވެހިރާއްޖޭގެ ދިދަ ހަވާލުކުރުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތުގައި، ފޮޓޯ: ރައީސް އޮފީސް

ރާއްޖޭގެ ތާރީޚުގައި ނުދެކޭ ފެންވަރަށް ކުޅިވަރުތައް ގެންދިއުމަކީ ސަރުކާރުގެ ސިޔާސަތެއް: ރައީސް

ރާއްޖޭގެ ތާރީޚުގައި ނުދެކޭ ފެންވަރަށް ކުޅިވަރުތައް ގެންދިއުމަކީ ސަރުކާރުގެ ސިޔާސަތެއްކަމަށާއި، ކުޅިވަރަށް އިންގިލާބީ ކުރިއެރުންތަކެއް ހޯދައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، "ޕެރިސް އޮލިމްޕިކްސް 2024″ ދިވެހިރާއްޖޭގެ ދިދަ ހަވާލުކުރުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ޕެރިސް އޮލިމްޕިކްސްގައި ރާއްޖޭގެ ފަރާތުން 5 އެތުލީޓުން ބައިވެރިވާއިރު، ރައީސް ވިދާޅުވީ، ރާއްޖޭގެ ފަރާތުން ގިނަ އެތުލީޓުން ބައިވެރިވުމުގެ ފުރުޞަތު ލިބުމަކީ ކުޅިވަރު ކުރިއެރުވުމަށް ލިބޭ ބޮޑު ހިތްވަރެއްކަމަށެވެ. އޮލިމްޕިކްސްގައި ބައިވެރިވާ 5 އެތުލީޓުންނަށްވެސް ހިތްވަރުދެއްވަމުން ރައީސް ވަނީ ރާއްޖެއަށް ގެނެސްދެވެން އޮތް އެންމެ ރީތި ނަމެއް ހޯދައިދެއްވުމަށް އެދިވަޑައިގެންފައެވެ. ރައީސް ވިދާޅުވީ ރާއްޖެއަށް ރިތި ނަން ހޯދައިދިނުމަށް އެންމެ ފުރިހަމައަށް އެ އެތުލީޓުން މަސައްކަތްކުރާނެކަމުގެ ޔަޤީންކަން އެބައޮތްކަމަށެވެ.

ރައީސް ވިދާޅުވީ، އެ ފަސް އެތުލީޓުންނަށް މިހިސާބަށް އާދެވޭނީ ވަރަށް ބުރަ މަސައްކަތުންކަމަށާއި، ކުރިއަށް އޮތްތަނަށް މިއީ ވަރަށް މުހިންމު ފެށުމެއްކަމަށް ބެލުމަށް އެދިވަޑައިގެންފައެވެ. ރާއްޖޭގައި އެކި ދާއިރާތަކުން ކުޅިވަރު ކުރިއެރުވުމަށް މަސައްކަތްކުރައްވާކަމަށާއި، ބައިނަލްއަޤްވާމީ ފެންވަރުގައި ރާއްޖެއަށް ރީތި ނަން ހޯދައިދެވޭނެ ފެންވަރަށް ކުޅިވަރު ކުރިއެރުވުމަށް ބޭނުންވާ ޢުމްރާނީ ވަސީލަތްތައް ޤާއިމްކުރުމުގެ މަސައްކަތްކުރައްވާކަމަށް ރައީސް ވިދާޅުވިއެވެ.

ރާއްޖޭގައި ކުޅިވަރުގެ ޢުމްރާނީ ވަސީލަތް އިތުރުކުރުމަށް އަންނަ އަހަރުން ފެށިގެން ކުޅިވަރުގެ ވުޒާރާގެ ބަޖެޓުގައި ވަރަށް އިސްކަން ދެއްވާނެކަމަށް ރައީސް ވިދާޅުވިއެވެ. އަދި ކުޅިވަރު ކުރިއެރުވުމަށް މިހާތަނަށް މަސައްކަތް ނުކުރެވޭވަރަށް މަސައްކަތްކުރާނެކަމަށާއި، ރާއްޖޭގެ ތާރީޚުގައި ނުދެކޭ ފެންވަރަށް ކުޅިވަރުތައް ގެންދިއުމަކީ ސަރުކާރުގެ ސިޔާސަތެއްކަމަށްވެސް ރައީސް ވިދާޅުވިއެވެ.

ރާއްޖޭގެ ކުޅިވަރަށް އިންގިލާބީ ކުރިއެރުމަށް ގެނައުމަށް މަސައްކަތްކުރައްވާނީ ކުޅިވަރުގެ ޢާއިލާގެ އެއްބާރުލުމާއެކުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ހިޔާލު ފާޅުކުރައްވާ!

ހިޔާލު ދެއްވާ!

Your email address will not be published. Required fields are marked *

ފަހުގެ

މަޤްބޫލު