ޢަލީ ރަޢީފް، އއ، ތޮއްޑޫ، ދޮން މޫނިމާގެ އަކީ އާދަޔާ ޚިލާފު ހާފިޒެއް ކަމަށާއި، އޭނާ ދަސްކޮށްފައިވަނީ އާޔަތުގެ ނަމްބަރާ ވެސް އެކުގައި ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އިސްލާމިކް މިނިސްޓްރީގެ މީޑިޔާ ގްރޫޕުގައި މިނިސްޓަރު ޑރ. ޝަހީމް ވިދާޅުވީ، ޢަލީ ރަޢީފް، އއ، ތޮއްޑޫ، ދޮން މޫނިމާގެ އަކީ އޯޓިޒަމްގެ އެންމެ މަތީ ލެވަލް ހުންނަ ކުއްޖެއްކަމަށް ޢާއިލާއިން މައުލޫމާތުދިން ކަމަށެވެ.
"500 ހާފިޒުންގެ ޕްރޮގްރާމްގައި ޤުރުއާން ހިތު ދަސްކުރަން ފެށި، 9 އަހަރުން ދަސްކޮށް ނިންމައި މި އަހަރު ފެބްރުއަރީ ގައި ވަނީ އެއްވެސް ކުށެއް ނުޖެހި 14 ދުވަހުން، ކީރިތި ޤުރުއާނާ ބެހޭ މަރުކަޒުގެ ހާފިޒުން އިމްތިހާނު ކޮމިޓީއަށް ހިތުން ކިޔައިދީ، ފާސްވެ އެއްވަނަ ދަރަޖައިގައި ހާފިޒްކަމުގެ ސަނަދު ހޯދާފަ. އޭނާއަކީ އާދަޔާ ޚިލާފު ހާފިޒެއް. ދަސްކޮށްފައި އާޔަތްތައް އެކަންޏެއްނޫން. އޭނާ ދަސްކޮށްފައިވަނީ އާޔަތުގެ ނަމްބަރާ ވެސް އެކުގަ. މިފަދަ ކުދިންނަކީ އޮޓިސްޓިކް ކުދިންނޭ ބުނަނީ ކީއްވެބާއެވެ؟" އިސްލާމިކް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ރަޢީފް ފަރާތުން އޯޓިޒަމް ހުންނަ ކުއްޖެއްގެ ކިބައިން ފެންނަ އެފަދަ އެއްވެސް ޢައިބެއް ފާހަގަ ނުވާކަމަށާއި، ކީރިތި ޤުރުއާންގެ ސަބަބުން އޭނާގެ ސުލޫކަށް ވަރަށް ބޮޑު ހެޔޮ ބަދަލެއް އައިސްފައިވާކަން ފާހަގަކުރެއްވިފައިވާ ކަމަށެވެ.
"ވަރަށް އަދަބުވެރި އަޚުލާޤު ރަނގަޅުކަން ފާހަގަވި. މިއީ ﷲ ދެއްވާ ނިޢުމަތެވެ. މިއަދު އަޅުގަނޑުވަނީ އޭނާއާއި މައިންބަފައިންނާ ބައްދަލުކޮށް ހިއްވަރު ދީފަ، އޭނާ އެންމެ ބޭނުންވީ ޢުމްރާ ދަތުރެއް،. އިސްލާމިކް މިނިސްޓްރީއިން އިންޝާ ﷲ އޭނާގެ އުންމީދު ޙާޞީލްކޮށްދޭނެ. ރަޢީފް ޤުރުއާން ދަސްކޮށްފައިވަނީ ވަޒީފާއެއްގައި ވެސް އުޅެމުން.." އިސްލާމިކް މިނިސްޓަރ ޑރ. ޝަހީމް ވިދާޅުވިއެވެ.
