އޭލެވެލް ފަށާ ދަރިވަރުންނަށް މަހަކު 1500 ރުފިޔާގެ ސްޓައިޕެންޑެއް ދެނީ؛ އަވަހަށް ޓީޗަރަކަށްވާންވީ!

ގުރޭޑް 11ގައި ކިޔަވާ ދަރިވަރުންގެ ތެރެއިން ޓީޗަރުންނަށް ވާން ބޭނުންވާ ދަރިވަރުންނަށް ސްޓައިޕެންޑްގެ ގޮތުގައި 1500 ރުފިޔާ މަހަކު ދޭން އެޑިޔުކޭޝަން މިނިސްޓްރީން ނިންމަވައިފއެވެ. މިކަން ހާމަކުރައްވާފައިވަނީ ދައުލަތުގެ މީޑިޔާ ޓީވީއެމްގެ ހެނދުނު ހެނދުނާ ޕްރޮގްރާމުގައި ވާހަކަ ދައްކަވަމުން މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަޙްމަދު މުޙައްމަދުއެވެ

ޑރ. އަޙްމަދު މުޙައްމަދު ވިދާޅުވީ، ރާއްޖޭގައި އޮތް ޓީޗަރުންގެ ދަތިކަމަށް ހައްލެއް ހޯދަން ޓީޗަރުން ތަމްރީނު ކުރުމުގެ ޤައުމީ މަޝްރޫއެއް އަންނަ ސެޕްޓެމްބަރު މަހުގެ ތެރޭގައި ފަށަން ތައްޔާރު ވަމުން އަންނަ ކަމަށާއި އެ މަޝްރޫއުގެ ކޮންސެޕްޓް މިހާރު އެކުލަވާލެވިފައިވާ ކަމަށެވެ.

ތައުލީމީ ދާއިރާގެ މުސްތަގުބަލް އޮތީ، ޓީޗިންގ ފޯސްއަށް ވީހާވެސް ކޮލިޓީ ރަނގަޅު، ފެންވަރު ރަނގަޅު ދަރިވަރުން ވަދެގެން ކަމަށާއި ބޭނުންވަނީ ޓީޗިންގ ކެރިއަރއެއްގެ ގޮތުގައި ކުރިއަށް ގެންދާ ކުދިންނަކީ އޭލެވެލް ނިންމާ ކުދިންނަށް ހެދުން ކަން ފާހަގަކުރައްވައި، ޑރ. އަޙްމަދު ވިދާޅުވީ، މި އަހަރު ގުރޭޑް 11އަށް ވަންނަ ދަރިވަރުންގެ ތެރެއިން ޓީޗަރުންނަށް ވާން ބޭނުންވާ ދަރިވަރުންނަށް ސްޓައިޕެންޑްގެ ގޮތުގައި 1500 ރުފިޔާ ދޭން ނިންމާފައިވާ ކަމަށާއި އެ ފައިސާ ދޭނީ ޓީޗަރުން ތަމްރީނު ކުރުމުގެ މަޝްރޫއުގެ ތެރެއިން އެ ދަރިވަރުންނާއި މައިންބަފައިންނާއެކު ވެވޭ އެއްބަސްވުމެއްގެ ދަށުން ކަމަށެވެ. އެ އެއްބަސްވުމުގެ ދަށުން ކަނޑައަޅާ ވަކި މާއްދާއަކުން އެ ދަރިވަރަކު އޭލެވެލް ނިންމާފައި ކެރިއަރއެއްގެ ގޮތުގައި ޓީޗިންގ ދާއިރާއިން ކުރިއަށްދާން ޖެހޭނެ ކަމަށް ޑރ. އަޙްމަދު ވިދާޅުވިއެވެ.

" އޭރުން އޭލެވެލް ހަދަމުންދާއިރު އެކުދިން އެދަނީ ޓީޗިންގ ކެރިއަރގެ ޕާތްވޭ ނަގައިގެން، ޤައުމު ބިނާކުރުމަށް މުދައްރިސަކަށް ވުމަށްޓަކައި އަޒުމް ކަނޑައަޅައިގެން" ޑރ. އަޙްމަދު ވިދާޅިވިއެވެ.

ޓީޗިންގ ދާއިރާއިން ކުރިއަށް ދާން ބޭނުންވާ ދަރިވަރުންނަށް ގުރޭޑް11 ކުރިއަށް ގެންދާނީ ފައުންޑޭޝަން ލެވެލްގެ ކޯހެއް ގޮތަށް ފަރުމާ ކުރެވިގެން ކަމަށާއި އޭލެވެލްގެ ކޮންޓެންޓް ކިޔަވަމުންދާއިރު އެކުދިން ތިބޭނީ ޓީޗިންގ ކޯހަށް ވަނުމަށް ތައްޔާރުވެފައި ކަން ސްޓޭޓް މިނިސްޓަރު ފާހަގަކުރެއްވިއެވެ.

އެޑިޔުކޭޝަން މިނިސްޓްރީގެ ތަފާސް ހިސާބަށް ބަލާއިރު 10،000 އެއްހާ ޓީޗަރުން މަސައްކަތް ކުރާއިރު، އޭގެ ތެރޭގައި ބިދޭސީ 2،000 ޓީޗަރުން މަސައްކަތް ކުރަމުން ގެންދެއެވެ.

ރާއްޖޭގެ ތައުލީމީ ދާއިރާގައި ހަމައެކަނި ދިވެހި މުދައްރިސުން ތިބޭ ގޮތަށް ހެދުމުގެ ބޮޑު މަޝްރޫއު އަންނަ ސެޕްޓެންބަރު މަހު ފަށްޓަވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިނިވަންދުވަހުގެ ޖަލްސާގައި ޤައުމާ މުޚާޠަބުކުރައްވަމުން ވިދާޅުވެފައެވެ.

މި ސަރުކާރުގެ ފަސް އަހަރު ނިމޭއިރު ޕްރައިމަރީ އަދި ސެކަންޑަރީ ލެވެލްގެ ހުރިހާ ޓީޗަރުންނަކީ ފެންވަރު ރަނގަޅު ދިވެހި ޓީޗަރުންނަށް ހެދުމަކީ ރައީސް މުއިއްޒުގެ އަމާޒެކެވެ.

މިއަހަރުގެ މިނިވަން ދުވަހުގެ ޖަލްސާގައި ރައީސް ވިދާޅުވީ ރާއްޖޭގެ ތައުލީމީ ދާއިރާގައި ހަމައެކަނި ދިވެހި މުދައްރިސުން ތިބޭ ގޮތަށް ހެދުމުގެ ބޮޑު މަޝްރޫއު އަންނަ ސެޕްޓެންބަރު މަހު ފަށްޓަވާނެ ކަމަށެވެ. ޓީޗަރުން ބިނާ ކުރުމަކީ ވަރަށް ބޮޑު އިސްކަމެއް ދެއްވާނެ ކަމެއް ކަން ފާހަގަ ކުރައްވާ ރައީސް ވިދާޅުވީ އެކަމުގައި އެމަނިކުފާނުގެ އަމާޒެއް އެބަ އޮތް ކަމަށެވެ. އެ ބަދަލު އައުމުން ދަރިވަރުންގެ ސިކުޑި ބިނާ ކުރުމަށް ވަރަށް ބޮޑު ބާރަކަށް ވެގެންދާނެ ކަމަށް ރައީސް ވިދާޅުވިއެވެ.