ފޮއްދޫ، ޅޮހީ އަދި ވެލިދޫ ޞިއްޙީ މަރުކަޒާ ގުޅޭގޮތުން ވެލިދޫ ދާއިރާގެ މެންބަރު މުޙައްމަދު އައްބާސް ހެލްތު މިނިސްޓަރު ޑރ. ޢަބްދުﷲ ޚަލީލްއާ މިއަދު ސުވާލުކުރައްވައިފިއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ވެލިދޫ ދާއިރާގެ މެންބަރު މުޙައްމަދު އައްބާސް ކުރެއްވި ސުވާލުގައި ވިދާޅުވީ ރާއްޖޭގެ ސިއްޙީ ނިޒާމަށް ބޮޑެތި ބަދަލުތަކެއް މިހާރު އަންނަމުންދާކަން ފާހަގަކުރެއްވޭ ކަމަށާއި އެހެންނަމަވެސް ނ. ފޮއްދޫއަކީ އާބާދީ މަދު ރަށަކަށްވީތީ ވޭތުވެދިޔަ އެއްވެސް ސަރުކާރަކުން އެރަށުގައި ޞިއްޙީ ޚިދުމަތެއް ޤާއިމުކޮށްދީފައި ނުވާތީ އެހެން ރަށްރަށެކޭވެސް އެއްފަދައިން ހެލްތު ސެންޓަރެއް ޤާއިމުކޮށްދިނުމަކީ އަބަދުވެސް ދައްކަމުން އަންނަ ވާހަކައެއް ކަމަށާއި، އެހެންކަމުން ފޮއްދޫ ހެލްތު ސެންޓަރުގެ މަސައްކަތް ފެށުމުގެ ގޮތުން މިހާތަނަށް ކުރެވިފައި ވަނީ ކޮން ކަމެއްތޯ އާއި ޢަމަލީ މަސައްކަތް ފެށޭނީ ކިހާތާކުތޯ ފާހަގަކުރެއްވިއެވެ.
އައްބާސް ވިދާޅުވީ ވަޒީރާ ބައްދަލުކުރެއްވުމުން، ފޮއްދޫގެ ޞިއްޙީ ޙާލަތު ހުރިގޮތް ވަޒީރަށް ރަނގަޅަށް އެނގިވަޑައިގަންނަވާ ކަން ފާހަގަކުރައްވާފައިވާ ކަމުގައެވެ. އަދި ފޮއްދޫގައި ހެލްތު ސެންޓަރެއް ޤާއިމުކުރުމަށްޓަކައި ނިމިދިޔަ ސަރުކާރުން ކޮންޓްރެކްޓަރަކާ މަސައްކަތް ޙަވާލުކުރެވިފައިވާ ކަމަށާއި، އެހެންނަމަވެސް އެކަމަށް ފައިސާ ނެތް ކަމަށް މަޢުލޫމާތު ލިބިފައިވާ ކަން އައްބާސް ފާހަގަކުރެއްވިއެވެ.
މި ސުވާލުގެ ޖަވާބުގައި މިނިސްޓަރު ޑރ. ޚަލީލް ވިދާޅުވީ، ފޮއްދޫގެ ޞިއްޙީ މަރުކަޒުގެ މަސައްކަތް ކުރިއަށް ގެންދިއުމަށްޓަކައި ކޮންޓްރެކްޓަރަކާ މަސައްކަތް ޙަވާލުކުރެވިފައިވާ ކަމަށެވެ. އަގެއް ކަމުގައި ކަނޑައަޅާފައިވަނީ 24.8 މިލިއަން ރުފިޔާ ކަމަށާއި، މިއީ މިވަރުގެ ޕްރޮޖެކްޓަކަށް ބޮޑު އަދަދެއް ކަމުން އެ ޕްރޮޖެކްޓް ރީޑިޒައިން ކުރުމުގެ މަސައްކަތް ކުރައްވަމުން ގެންދަވާ ކަމަށާއި، ޕްރޮޖެކްޓްތައް މީގެ ކުރިން ހަވާލުކުރެވިފައި ހުރީ ޚިދުމަތްތަކަށް ވުރެ ބޮޑަށް ޑިޒައިންތަކަކަށް އިސްކަން ދެވިގެން ކަމަށެވެ.
އެހެންކަމުން ރައްޔިތުންނަށް ލުއި ފަސޭހަވާނެ ގޮތަކަށް ޑިޒައިން ކުރުމުގެ މަސައްކަތް ކުރިއަށް ގެންދިއުމަށް މަސައްކަތް ކުރައްވަމުން ގެންދަވާ ކަމަށާއި، އެކަމުގެ ނަތީޖާއަކަށް ވާނީ ރައްޔިތުންނަށް ލުއި ފަސޭހަ ވުމުގެ އިތުރުން ދައުލަތަށް ބުރަބޮޑު ނުވާނެ ގޮތަކަށް ބައްޓަންވެގެން ދިއުންކަމުގައި މިނިސްޓަރު ވިދާޅުވިއެވެ.
އަދި ފޮއްދޫ ސިއްޙީ މަރުކަޒު ޤާއިމުކުރުމަށް ހަމަޖެހިފައިވާ ބިމުގެ ރުއްގަހުގެ ބަދަލު ދާދި ފަހުން ހަމަޖެހިގެން ގޮސްފައިވާ ކަން ފާހަގަކުރައްވަމުން އެކަން ހަމަނުޖެހި ލަސްވެގެން ދިއުމަކީވެސް އެ ޕްރޮޖެކްޓް ލަސްވެގެން ދިޔަ ސަބަބެއް ކަމުގައި މިނިސްޓަރު ވިދާޅުވިއެވެ.
މިހާރު ކުރަމުންދާ ރީޑިޒައިންގެ މަސައްކަތް ނިމުނުހާ އަވަހަކަށް އެ ޕްރޮޖެކްޓް ފެށުމަށް އިންތިޒާމުކުރެވިގެންދާނެ ކަމަށް މިނިސްޓަރު ވިދާޅުވިއެވެ. މި ޕްރޮޖެކްޓުގެ ފަންޑިންގއަށް މިހާރު ކަނޑައެޅިފައިވަނީ 3.85 މިލިއަން ރުފިޔާ ކަމަށާއި، މިއަަދަދަކީ މިވަރުގެ ޕްރޮޖެކްޓަކަށް ވަރަށް ކުޑަ އަދަދެއް ކަމަށް މިނިސްޓަރު ފާހަގަކުރެއްވިއެވެ. އެކަމަކީ ވެސް ކުރިމަތިވާ ގޮންޖެހުމެއް ކަމަށް މިނިސްޓަރު ވިދާޅުވިއެވެ.
ދެން ކުރެއްވި ސުވާލަކީ، "ޅޮހީ ޞިއްޙީ މަރުކަޒުގައި އެޅުމަށް ހަމަޖެހިފައިވާ އާއިމާރާތް އެޅޭނީ ކިހާ ހިސާބަކުތޯ؟" މި ސުވާލެވެ.
މި ސުވާލަށް ޖަވާބު ދެއްވަމުން ހެލްތު މިނިސްޓަރު ޑރ. ޢަބްދުﷲ ޚަލީލް ވިދާޅުވީ، މި ސަރުކާރުން އިސްކަން ދެއްވަނީ އޮފީސް އިމާރާތެއް އަޅައި ރައްޔިތުންނަށް ރީތި އިމާރާތެއް ދެއްކުމަށް ނޫންކަމަށާއި، ނަމަވެސް މިސަރުކާރުގެ ވިސްނުމަކީ ރައްޔިތުންނަށް ޚިދުމަތް ދިނުމަށްޓަކައި އަޅަންޖެހޭ އިމާރާތްތައް އެންމެ ފުރިހަމައަށް އެޅުން ކަމަށެވެ.
ޅޮހީ ޞިއްޙީ މަރުކަޒާ ގުޅޭގޮތުން ވަޒީރު ވިދާޅުވީ، ޅޮހީ ޞިއްހީ މަރުކަޒަށް އިތުރުކުރެވޭ އިމާރާތް އެޅުމަށް ބައެއް ދަތިތައް ކުރިމަތިވި ކަމަށާއި، ސިޔާސީ ބައެއް ކަންކަމާ ހެދި އިމާރާތްކުރަންވީ ތަނާމެދު އުފެދުނު ޚިޔާލު ތަފާތުވުންތަކެއްގެ ސަބަބުން އެތަން އަޅާނެ ބިން ކަނޑައެޅުމުގައި ލަސްތަކެއް އައި ކަމަށެވެ. ނަމަވެސް އެކަމަށް ޙައްލެއް ލިބި ކޮންޓްރެކްޓަރާ ވާހަކަ ދައްކަވައިގެން ވީހާވެސް އަވަހަކަށް އެމަސައްކަތް ފެށޭތޯ ބަލަމުންދާ ކަމަށް ވަޒީރު ވިދާޅުވިއެވެ.
ވެލިދޫ ހޮސްޕިޓަލާ ގުޅޭގޮތުން މެންބަރު އައްބާސް ކުރެއްވި ސުވާލަށް ޖަވާބު ދެއްވަމުން މިނިސްޓަރ ޑރ. ޢަބްދުﷲ ޚަލީލް ވިދާޅުވީ، ވަޒީރު، މާލަސްތަކެއް ނުވެ އެ މަސައްކަތް ފެށިގެން ދާނެ ކަމަށާއި، އެ ހޮސްޕިޓަލުގެ ޢިމާރާތް އެޅުމަށް ހަމަޖެހިފައިވަނީ ކުވޭތު ފަންޑުން ކަމަށްވެފައި، ވެލިދޫގައިވެސް ދިމާވި މައްސަލައަކީ އެވޯޑް ކުރުމުގައި ދިމާވި މައްސަލަތަކުގެ ސަބަބުން ފަންޑިންއައި ޑިލޭ ކަމަށެވެ.
"ނ. އަތޮޅު ހޮސްޕިޓަލުގެ ސީޓީ ސްކޭންގެ ޚިދުމަތް ކިހާ ތާކު ފެށޭނެތޯ؟" މި ސުވާލު ވެލިދޫ ދާއިރާގެ މެންބަރު ކުރެއްވި ސުވާލުގެ ޖަވާބުގައި މިނިސްޓަރު ވިދާޅުވީ، އެމްޓީސީސީއާ ހަވާލުކުރެވިފައިވާ ޢިމާރާތުގެ މަސައްކަތް ނިމުމުން ޕޭޝަންޓް ޓާން އޯވަރ އަށް ބަލައިގެން އެ ޚިދުމަތް ޤާއިމުކުރުމަށް ގޮތެއް ނިންމާނެ ކަމަށެވެ.
ސީޓީ ސްކޭން ހެދުމުގެ ޚިދުމަތް ޤާއިމުކުރުމުގެ ޚިދުމަތް ފެށުމާއެކު ޑޮކްޓަރަށް ދައްކަން މާލެ އަންނަ މީހުންގެ ނިސްބަތް ދަށްކުރެވޭނެ ކަމަށާއި، އަދި ވަކި ތަރުތީބެއްގެ ދަށުން މިފަސް އަހަރުގެ ތެރޭގައި އަތޮޅު ހޮސްޕިޓަލްތަކުގައި މި ޚިދުމަތް ޤާއިމުކުރުމަށް ވިސްނުންފުޅު ގެންގުޅުއްވާ ކަމަށް މިނިސްޓަރު ޑރ. ޚަލީލް ވިދާޅުވިއެވެ.
