ރާއްޖޭގައި ޗައިނާގެ ބޭންކެއް ހުޅުވުމުގެ މަސައްކަތްކުރަމުންދާކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
"މޯލްޑިވްސް – ސިޗުއާން ޓްރޭޑު އެންޑު އިންވެސްޓުމަންޓު ކޯރޕަރޭޝަން ކޮންފަރެންސް" ފެށުމުގެ ރަސްމިއްޔާތުގައި ވާހަކަދައްކަވަމުން ވަޒީރު ސަޢީދު ވިދާޅުވީ، ޗައިނާއާއެކު މިނިވަން ވިޔަފާރީގެ އެއްބަސްވުމަށް އަންނަ މަހުގެތެރޭ އަމަލުކުރަން ފަށަން ތައްޔާރުވަމުންދާއިރު، މިއާއެކު ވިޔަފާރިވެރިންނަށް ހުރި ފުރުޞަތުތައް ދިވެހި ވިޔަފާރިވެރިންނަށް އެނގެން ޖެހޭ ކަމަށެވެ. އަދި އެ ވުޒާރާއިން ވިޔަފާރިވެރިންނަށް އަމާޒުކޮށް މިކަމާއި ގުޅޭ މައުލޫމާތުތައް ދިނުމަށް ވޯކް ޝޮޕްތަކާއި ހިންގުމަށް ނިންމާފައިވާ ކަމަށެވެ.
ވަޒީރު ސަޢީދު ވިދާޅުވީ، މިނިވަން ވިޔަފާރީގެ އެއްބަސްވުމުގެ ތެރެއިން ރާއްޖެއަށް ގިނަ ފައިދާތަކެއް ލިބޭނެ ކަމަށެވެ.
މިނިވަން ވިޔަފާރީގެ ފައިދާ ވިޔަފާރިވެރިންނަށް އެންމެ ބޮޑަށް ލިބޭނެ މަގުތައް ހޯދުމަށް ސަރުކާރުން މަސައްކަތްކުރަމުންދާ ކަމަށާއި، އެގޮތުން ރައީސް ޑރ. މުޢިއްޒު ބޭނުންފުޅުވަނީ ޗައިނާގެ ބޭންކެއް ރާއްޖޭގައި ހުޅުވުން ކަމަށެވެ. އަދި އެކަމާގުޅޭ މަސައްކަތްތައް ކުރެވެމުންދާ ކަމަށެވެ.
ވަޒީރު ވިދާޅުވީ ޗައިނާއިން ގެންނަ މުދަލަށް ދިވެހި ރުފިޔާ ބޭނުންކޮށްގެން މުއާމަލާތު ކުރެވޭނެގޮތް ހެދުމަށް ސަރުކާރުން ކުރަމުންދާ މަސައްކަތްތަކާއެކު ޑޮލަރަށް ބަރޯސާވުން ކުޑަކުރެވިގެންދާނެ ކަމަށެވެ.
"ޕީޕަލްސް ބޭންކު އޮފް ޗައިނާއާއި އެމްއެމްއޭއާއެކު އެއްބަސްވުން ޤާއިމްކުރުމުގެ މަސައްކަތް ދަނީ ކުރެވެމުން. މިކަން މިގޮތަށް ވީމައި، ރާއްޖެއަށް ޗައިނާއިން މުދާ އެތެރެކުރާ ފަރާތްތަކުން، ދިވެހި ބޭންކެއް މެދުވެރިކޮށް ދިވެހި ރުފިޔާއިން ފައިސާ ދެއްކޭނެ ގޮތް ފަހިވެގެންދާނެ." ވަޒީރު ވިދާޅުވިއެވެ.
ހަމައެކަނި ސިޗުއާން ޕްރޮވިންސްއިންވެސް 19 މިލިޔަން ރުފިޔާގެ ވިޔަފާރީގެ ފުރުޞަތުތައް އެބަހުރި ކަމަށާއި، އެހެންކަމުން ވިޔަފާރީގެ ގުޅުންތައް ބަދަހިވެގެންދާއިރު ވިޔަފާރިވެރިންނަށް ފައްސޭހަ މާހައުލެއް ގާއިމްކޮށްދިނުމަށް ސަރުކާރުން މަސައްކަތްކުރައްވާނެ ކަމަށް ވަޒީރު ވިދާޅުވިއެވެ.
ރާއްޖެއާއި ޗައިނާގެ ސިޗުއާން ޕްރޮވިންސްއާ ދެމެދު އޮންނަ ގުޅުން ބަދަހިކުރުމަށް ބޭއްވި ކޮންފަރެންސް ފެށުމުގެ ރަސްމިއްޔާތުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދުގެ އިތުރުން ކެބިނެޓުގެ ބައެއް ވަޒީރުން ބައިވެރިވެޑައިގެންނެވިއެވެ.
