ރައްޔިތުންނަށް ވެވަޑައިގެންފައިވާ ވައުދުތައް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފުއްދަވާނެކަމުގެ ފުރިހަމަ ޔަޤީންކަން އެބައޮތްކަމަށް ޕީއެންސީގެ ނައިބު ރައީސް އަދި ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ޕީއެންސީ ހަރުގެ ޖަލްސާގައި ވާހަކަފުޅު ދައްކަވަމުން، ނައިބު ރައީސް ޙުސައިން މުޙައްމަދު ލަޠީފް ވިދާޅުވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވެރިކަމުގައި ހިފަހައްޓާނެ ވަކި އަސާސްތަކާއި މިންގަނޑުތައް ހުންނާނެ ކަމަށާއި، އަދި ރާއްޖޭގެ ޤާނޫނީ ވެރިކަން އެމަނިކުފާނު ދަމަހައްޓަވާނެކަމަށެވެ.
ނައިބު ރައީސް ވިދާޅުވީ، ބާރުތައް ފެށިގެން އަންނަނީ ރައްޔިތުންގެ ކިބައިންކަން ރައީސުލްޖުމްހޫރިއްޔާ އަބަދުވެސް ހަނދުމަފުޅު ބަހައްޓަވާކަމަށާއި، ރައްޔިތުންގެ އިހުސާސްތައް އަޑުއެހުމަށް ރައީސުލްޖުމްހޫރިއްޔާ އަބަދުވެސް އިރުޝާދު ދެއްވާ ކަމަށެވެ.
"ރައީސް ހާލަތާއި ވަގުތަށް ބެލުމަށްފަހު ރައްޔިތުންގެ އަޑު އަހާކަށް ފަހެއް ނުޖެހޭނެ، ހެކިތައް ފެންނަން އެބަހުރި. ރައްޔިތުން ބޭނުންވާ ގޮތަށް ރައްޔިތުންގެ އަޑުއަހައިގެން އެމަނިކުފާނު ކަންކަން ކުރައްވަނީ" ނައިބު ރައީސް ޙުސައިން މުޙައްމަދު ލަޠީފް ވިދާޅުވިއެވެ.
ރައީސް ޑރ. މުޢިއްޒުގެ މެނިފެސްޓޯގައި ހުރި ކަންކަން މި ދައުރުގެ ތެރޭގައި ހާސިލް ކުރެވޭނެކަންވެސް ފާހަގަކުރައްވަމުން މި ޒައާމަތުގައި ތަފާތު ދައްކަވައި، ވެރިކަމުގެ ދެވަނަ ދައުރަކަށް ރައީސް މުއިއްޒު އިންތިޚާބުވެވަޑައިގަންނަވާނެކަމާމެދު ޝައްކު ނުކުރައްވާ ކަމަށްވެސް ނައިބު ރައީސް ވިދާޅުވިއެވެ.
ނައިބު ރައީސް ސިފަކުރެއްވި ގޮތުގައި، ޤައުމުގައި މީގެ ކުރިން އުފެދިފައި އޮތީ ނަފްރަތާ އަދާވާތްތެރިކަން ކަމަށާއި ބޮޑު ޖީލެއް ހަލާކުވީ ކުރީގެ ސިޔާސީ ލީޑަރުންގެ ސަބަބުންނެވެ. އަދި ޤައުމު ތަރައްޤީ ކުރެވޭނީ އަމާންކަމާއި ސުލްހަމަސަލަސްކަން އޮވެގެންކަން ކަމަށާއި، ރައީސް ޑރ. މުޢިއްޒަށް ރައްޔިތުން ތާއިދުކުރެއްވީ، އެމަނިކުފާނަކީ ރައްޔިތުންގެ އަޑު އެހުމުގެ ޤާބިލްކަން ހުންނަ ބޭފުޅަކަށްވާތީކަމަށް އެމަނިކުފާނު ވިދާޅުވިއެވެ.
ނައިބު ރައީސް އިތުރަށް ވިދާޅުވީ މިވީ ދުވަސްތަކުގައި ދައުލަތުގެ ބަޖެޓަށާއި ރައްޔިތުންގެ ފުދުންތެރިކަމަށް އައި ބަދަލުތައް ފެންނަ އޮތް ކަމަށާއި އެމަނިކުފާނު މަސައްކަތްޕުޅު ކުރައްވަނީ ރައްޔިތުންނަށް ހެޔޮވެރިކަމެއް ކޮށްދެއްވުމަށް ކަމަށެވެ.
