ރައީސުލްޖުމްހޫރިއްޔާކަން ކުރެއްވި މީހެއްގެ އެކައުންޓުގައި 100 މިލިއަން ރުފިޔާ ހުރުމަކީ ޝައްކު އުފެދޭނެ ކަމެއް ކަމަށް ވިދާޅުވެ ޕީއެންސީގެ ޕީޖީ ލީޑަރު އިބްރާހީމް ފަލާޙް ސުވާލުއުފައްދަވައިފިއެވެ.
ރޭ ޕީއެންސީން ބޭއްވި ހަރުގެ ޖަލްސާގައި ވާހަކަދައްކަވަމުން، ފަލާހް ވިދާޅުވީ މިހާރުވެސް ޔާމީންގެ އެކައުންޓްގައި ދައުލަތުގެ 1 އަހަރު ދުވަހުގެ ބަޖެޓް ފޫބައްދާނެ ވަރަށް ފައިސާ ހުރި ކަމުގެ މަޢުލޫމާތު ލިބިފައިވާ ކަމަށެވެ.
ފަލާޙް ފާހަގަކުރެއްވި ގޮތުގައި، ކުރީގެ ރައީސް ޔާމީން އަބްދުލްޤައްޔޫމްގެ ވެރިކަން ނިމުނުއިރު އޭނާގެ އެކައުންޓްގައި 100 މިލިއަން ރުފިޔާ ނުވަތަ 200 މިލިއަން ރުފިޔާ ހުރުމުން ނިމިދިޔަ ސަރުކާރުން އެކަމާއި ސުވާލު އުފެއްދިއެވެ.
ކުރީގެ ރައީސް ޔާމީންގެ މައްޗަށް ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ހިޔާނާތުގެ މައްސަލައާއި ވ. އާރަށް ކުއްޔަށް ދޫކުރި މައްސަލައާއި ގުޅިގެން 11 އަހަރުގެ ޖަލު ހުކުމެއް އިއްވާފައެވެ. އެކަމުގައި ޖަލު ހުކުމެއް ތަންފީޒު ކުރައްވަމުންދަނިކޮށް، ރައީސް ޑރ. މުޙައްމަދު މުޢިއްޒު އެދިވަޑައިގަތުމާ ގުޅިގެން، ނިމިދިޔަ ވެރިކަމުގެ ފަހުކޮޅު އޭރުގެ ރައީސް އިބްރާހީމް މުހައްމަދު ޞާލިޙް ވަނީ އެމަނިކުފާނުގެ ގޭ ބަންދަން ބައްދަލުކުރައްވާފައެވެ.
ފަލާހް ވިދާޅުވީ، ސަރުކާރުން ވެރިކަމާއި ހަވާލުވިފަހުން ޔާމީންގެ ބަންދަށް ވަނީ އިތުރު ލުއިފަސޭހަތައް ދެއްވާފައި ކަމަށާއި، އެމްޑީޕީން މިހާރުވެސް ވެރިކަމުގައި ތިބިނަމަ، ޔާމީން މިއަދުވެސް ހުންނަވާނީ ޖަލުގައި ކަމަށެވެ.
މީގެ އިތުރުން، ޕީއެންސީގެ ހަރުގެ ޖަލްސާގައި ވާހަކަ ދައްކަވަމުން ފަލާޙް ވިދާޅުވީ މިދައުރުގައި މަޖިލީހުގެ ތެރޭގައި ކުރެވުނު މަސައްކަތް ތަކުގެ ތެރެއިން އެތައް ގާނޫނަކަށް އަދި ގަވައިދަކަށް އިސްލާހު ގެނެސްފައިވާ ކަމަށެވެ. މިހުރިހާ މަސައްކަތެއް ކުރައްވާ އިރުވެސް މަޖިލީހުގެ 19 ކޮމިޓީ އޮންނަ ކަމަށް ފާހަގަކޮށް ފަލާހް ވިދާޅުވީ 19 ކޮމިޓީގައި އެއް ދުވަހަކުން މަސައްކަތް ކުރައްވާ ނަމަ ތަޅުމުގައި މެމްބަރަކު ނުހުންނަވާނެ ކަމަށެވެ.
ފަލާހް ވިދާޅުވީ ކޮންމެ ކޮމިޓީއެއްގައި 11 ނުވަތަ 8 މެމްބަރުން ތިއްބަވާ ކަމަށެވެވެ. ފަލާހް ވިދާޅުވީ މަޖިލިސް ތަޅުމުގައި ކުރެވޭ މަސައްކަތަކީ ކޮމިޓީތަކުގައި ކުރައްވާ މަސައްކަތަށްވުރެ މާ މަދު މަސައްކަތް ކަމަށެވެ.
މަޖިލީހުގެ މަސައްކަތްތައް ނިންމާލުމަށްފަހު ގެއަށް ދެވެނީ ރޭގަނޑު ކަމަށާއި އަދި ކޮމިޓީ މަރުހަލާގައި ކުރެވޭ މަސައްކަތްތަކަކީ ރަސްމީ މަސައްކަތް ތަކެއް ކަމަށެވެ. ރައްޔިތުންގެ މަޖިލީހުގެ މިހާރުގެ މެމްބަރުންގެ ހާޒިރީއަށް ބެލި ނަމަވެސް މިހާތަނަށް ހާޒިރީ އެންމެ ރަނގަޅު މެމްބަރުންނަށް ވާނެ ކަމަށް ފަލާހް ވިދާޅުވިއެވެ.
މެމްބަރުން އިންތިޚާބުވުމާ ގުޅިގެން ރައީސް މުއިއްޒު މެމްބަރުންނާއި ބައްދަލު ކުރައްވާ ނަމޫނާ މަޖިލީހަކަށް ހެދުމަށް މަސައްކަތް ކުރުމަށް ވިދާޅުވި ކަމަށާއި އަދި އެކަން ކުރުމަށްޓަކައި ގަޑިއަށް ފަރުވާތެރި ވުމަކީ އެންމެ މުހިންމު އެއްކަން ކަމުގައި ފާހަގަކުރެއްވި ކަމަށެވެ.
މީގެއިތުރުން ފަލާހް ވިދާޅުވީ ބަލި ހާލަތު ހުރި ގޮތުން ނޫން ގޮތެއްގައި ޕީއެންސީއަށް ނިސްބަތް އެއްވެސް މެމްބަރަކު މަޖިލީހަށް ވަޑައިނުގެން ނުތިއްބަވާނެ ކަމަށެވެ. މަޖިލީހުގައި ކުރާ މަސައްކަތް ތަކަކީ ކަމަކަށް ކަމެއް ކުރާ އުސޫލުން ކުރާ ކަމެއް ނޫން ކަމަށާއި އެއީ ރައްޔިތުންނަށް އިހުލާސްތެރި މަސައްކަތްތަކެއް ކޮށްދިނުމުގެ ނިޔަތުގައި ކުރާ ކަންކަން ކަމަށް ފަލާހް ވިދާޅުވިއެވެ.
