ސަރުކާރުގެ މައި ވިޔަފާރި ކުންފުނި، އެސްޓީއޯ އިން މާލޭގައި 25 ބުރީގެ މަލްޓިޕާޕަސް އިމާރާތެއް އަޅަން ނިންމައި އެ މަޝްރޫއުއަށް ޝައުގުވެރިކަން ފާޅުކުރުމުގެ ފުރުސަތު ހުޅުވާލައިފިއެވެ.
އެސްޓީއޯއިން ގެޒެޓު ކުރި ޝައުގުވެރިކަން ފާޅުކުރުމުގެ ދައުވަތު ކަރުދާހުގައި ބުނެފައިވާ ގޮތުން އެ އިމާރާތް ހަދާނީ މާލޭގައި ހުންނަ އެސްޓީއޯގެެ ހެޑް އޮފީހާ އިންވެގެން އޮންނަ އެ ކުންފުނީގެ 15،000 އަކަފޫޓުގެ ބިމުގައިއެވެ.
އެކުންފުނިން ވިދާޅުވި ގޮތުގައި، އެ އިމާރާތުގެ ބޭނުމަކީ ކުންފުނީގެ ހިންގުން ހަރުދަނާ ކުރުމަށް ބޭނުންވާ ޖާގަ އިތުރުކޮށް ކުންފުނީގެ ވިޔަފާރި ފުޅާކުރުމުގެ މަސައްކަތް ކުރުމަށެވެ.
އެ އިމާރާތް ހަދާނީ ކޮންޓްރެކްޓާ ފައިނޭންސް އުސޫލުން، އެސްޓީއޯގެ 15 ޕަސެންޓް އިކުއިޓީ ހިމެނޭ ގޮތަށް އަދި އިންޖިނިއަރިން، ޕްރޮކިއުމެންޓް އަދި ކޮންސްޓްރަކްޝަން (އީޕީސީ) މެތަޑަށް ކަމަށް މަޢުލޫމާތު ކަރުދާހުގައިވެއެވެ.
މި ޝައުގުވެރިކަން ފާޅުކުރާ ފަރާތަކީ ޕްރައިމަރީ ކޮންޓްރެކްޓަރެއްގެ ގޮތުގައި ވޭތުވެދިޔަ ފަސް އަހަރުގެ ތެރޭގައި 18 މިލިއަން ޑޮލަރު ނުވަތަ އެއަށްވުރެ އަގުހުރި އެފަދަ މަޝްރޫއެއް ހިންގާފައިވާ ކުންފުންޏަކަށް ވާންޖެހޭނެ ކަމަށާއި، ސަބް ކޮންޓްރެކްޓަރެއްގެ ގޮތުގައި މަސައްކަތް ކޮށްފައިވާ ފަރާތްތައް ބަލައިނުގަނެވޭނެ ކަމަށް އެސްޓީއޯއިން ވިދާޅުވެއެވެ.
އެ މަސައްކަތަށް ޝައުގުވެރިކަން ފާޅުކުރުމުގެ ސުންގަޑި ހަމަވާނީ މި މަހުގެ 13 ވަނަ ދުވަހަށެވެ.
ކަރުދާހުގައި ބުނެފައިވާ ގޮތުން އެ އިމާރާތުގައި ހުންނާނެ ވަސީލަތްތަކަކީ:
- އޯޕަން ކޮންސެޕްޓް އޮފީސް ސަރަހައްދު
- ކްލާސްރޫމް
- ލެކްޗާ ހޯލް/ އޮޑިޓޯރިއަމް
- ސްޓޯރޭޓް އޭރިއާ
- ވެލްނެސް ސެންޓަރު/ ޖިމް
- ކެފެޓީރިއާ/ ފުޓް ކޯޓްސް
- ޕޭންޓްރީ
- ރެކްރިއޭޝަން/ ކްލަބްހައުސް
- މަލްޓި ޕާޕަސް ހޯލް
- އީވީ ޗާޖިން ސްޓޭޝަންތަކާއެކު ކާރާއި ސައިކަލު ޕާކިން ޖާގަ
