ބައިނަލްއަޤްވާމީ މާލީ ޚިދުމަތްތަކުގެ މަރުކަޒަކަށް ދިވެހިރާއްޖެ ހެދުމަށް ގިނަގުނަ މަސައްކަތްތަކެއް ކުރެވެމުންދާ ކަމަށ އިޤްތިޞާދީ ތަރައްޤީއާއި ވިޔަފާރިޔާބެހޭ ވުޒާރާގެ ވަޒީރު، މުޙައްމަދު ސަޢީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޢިޤްތިޞާދީ ތަރައްޤީއާއި ވިޔަފާރިޔާބެހޭ ވުޒާރާއިން ސިޗުއަން ޕްރޮވިންޝަލް ޕީޕަލްސް ކޮންގްރެސް އާއި ޗައިނާ ކައުންސިލް ފޯ ދަ ޕްރޮމޯޝަން އޮފް އިންޓަނޭޝަނަލް ޓްރޭޑް ސިޗުއާން ކައުންސިލް (ސީސީޕީއައިޓީ ސިޗުއާން ކައުންސިލް) އާ ގުޅިގެން އިންތިޒާމުކުރި "މޯލްޑިވްސް-ސިޗުއާން (ޗައިނާ) ޓްރޭޑް އެންޑް އިންވެސްޓްމަންޓް ކޯޕަރޭޝަން ކޮންފަރެންސް" ނިންމުމުގެ ގޮތުން ބޭއްވެވި ރަސްމިއްޔާތުގައި ވާހަކަ ދައްކަވަމުންނެވެ.
މި ކޮންފަރެންސްގެ މައިގަނޑު މަޤްޞަދަކީ ދިވެހިރާއްޖެއާއި ޗައިނާގެ ސިޗުއާން ޕްރޮވިންސްއާ ދެމެދު ވިޔަފާރިއާއި އިންވެސްޓްމަންޓްގެ ގުޅުން އިތުރަށް ބަދަހިކުރުމެވެ. މި ކޮންފަރެންސް ބޭއްވުނީ 6 އޮގަސްޓު 2024 ވަނަ ދުވަހުއެވެ.
ކޮންފަރެންސް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ އިޤްތިޞާދީ ތަރައްޤީއާއި ވިޔަފާރިޔާބެހޭ ވުޒާރާގެ ވަޒީރު، މުހައްމަދު ސަޢީދާއި، ސިޗުއާން ޕްރޮވިންޝަލް ޕީޕަލްސް ކޮންގްރެސްގެ ދާއިމީ ކޮމިޓީގެ ނައިބު ރައީސް ހަރ އެކްސަލަންސީ ޒޫ ޗުންސިއުއެވެ. މީގެ އިތުރުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ހަރ އެކްސަލަންސީ ވަންގް ލީޝިން ބައިވެރިވެވަޑައިގެންނެވިއެވެ. އަދި މި ކޮންފަރެންސްގައި ދިވެހި ސަރުކާރުގެ އިސް ބައެއް ވަޒީރުން ވެސް ބައިވެރިވެވަޑައިގެންފައިވެއެވެ.
މި ރަސްމިއްޔާތުގައި ޢިޤްތިޞާދީ ވަޒީރު ސަޢީދުދެއްކެވި ވާހަކަފުޅުގައި ރާއްޖެއާއި ޗައިނާއާ ދެމެދު އޮތް ވަރުގަދަ ގުޅުމާއި އެކުވެރިކަން ފާހަގަކުރެއްވިއެވެ. އަދި ދެ ޤައުމުން އެކުގައި މަސައްކަތްކުރުމަށް ޝައުޤުވެރިވާ ދާއިރާތަކަށް އަލިއަޅުއްވާލެއްވިއެވެ.
މިގޮތުން، ވަޒީރު ވިދާޅުވީ ސަރުކާރުގެ ތަރައްޤީގެ ތސައްވުރަކީ އިޤްތިޞާދީ އަދި ކާބޯތަކެތީގެ ރައްކާތެރިކަން ކަށަވަރުކޮށްދޭ ތަފާތު ދާއިރާތަކުގެ މައްޗަށް ބިނާވެފައިވާ އިޤްތިޞާދެއް އުފެއްދުންކަމަށެވެ. އަދި މި ވިޝަން ހާސިލުކުރުމަށްޓަކައި ސަރުކާރުން އަސާސީ ސްޓްރެޓެޖިކް އިންފްރާސްޓްރަކްޗަރ ތަރައްޤީކުރުމަށް މަސައްކަތްކުރައްވަމުން ގެންދަވާކަމަށެވެ. މީގެ ތެރޭގައި އެއަރޕޯޓް އިކޮނޮމިކް ޒޯން ތަރައްޤީކުރުމާއި މައި ބަނދަރު އަލުން ތަރައްޤީކުރުމާއި އަދި ކާބޯތަކެތީގެ ރައްކާތެރިކަމަށް އަމާޒުކޮށްގެން ދަނޑުވެރިކަމުގެ އިޤްތިޞާދީ ސަރަޙައްދު ތަރައްޤީކުރުން ހިމެނޭކަމަށެވެ.
ސަރަޙައްދުގައި ދިވެހިރާއްޖެއަކީ ބައިނަލްއަޤްވާމީ ބަންކަރިންގ ހަބަކަށް ހެދުމަށާއި، ޒަމާނީ މާލީ އުފެއްދުންތައް ކުރިއެރުވޭނެ ބައިނަލްއަޤްވާމީ މާލީ ޚިދުމަތްތަކުގެ މަރުކަޒަކަށް ދިވެހިރާއްޖެ ހެދުމަށް ގިނަގުނަ މަސައްކަތްތަކެއް ކުރެވެމުންދާކަމަށެވެ.
ވަޒީރު ސަޢީދު އިތުރަށް ފާހަގަކުރެއްވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަހަރުގެ ޖަނަވަރީ މަހު ޗައިނާއަށް ކުރެއްވި ރަސްމީ ދަތުރުފުޅުގައި ދެ ޤައުމުގެ ދެމެދުގައި ސޮއިކުރެވުނު 20 އެމްއޯޔޫގެ މަސައްކަތްތައް ކުރިއަށްދާކަމަށެވެ. އަދި ދެ ޤައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ފުޅާކުރުމަށްޓަކައި ޗައިނާ-މޯލްޑިވްސް ފްރީ ޓްރޭޑް އެގްރީމަންޓް (އެފްޓީއޭ) އެކްޓިވޭޓްކުރުމަށް މަސައްކަތްކުރަމުންދާ ކަމަށްވެސް ވިދާޅުވިއެވެ.
މީގެ އިތުރުން، ދެ ޤައުމުގެ ދެމެދުގައި ލޯކަލް ކަރަންސީ ސެޓްލްމަންޓްގެ ނިޒާމެއް ޤާއިމުކުރުމަށް ޕީޕަލްސް ބޭންކް އޮފް ޗައިނާއާއި ރާއްޖެއާ ދެމެދު ފެށިފައިވާ މަޝްވަރާތަކަށްވެސް ވަޒީރު ސަޢީދު އަލިއަޅުއްވާލެއްވިއެވެ. މި މަޝްވަރާތަކަކީ ދެ ޤައުމުގެ ދެމެދުގައި ކުރެވޭ ވިޔަފާރީގެ މުޢާމަލާތްތައް އިތުރަށް ފުޅާކުރުމަށް އެޅިގެންދާނެ މުހިންމު ފިޔަވަޅެއްކަމުގައި ވަޒީރު ފާހަގަކުރެއްވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ސިޗުއާން ޕްރޮވިންޝަލް ޕީޕަލްސް ކޮންގްރެސްގެ ދާއިމީ ކޮމިޓީގެ ނައިބު ރައީސް، ހަރ އެކްސަލަންސީ ޒޫ ޗުންސިއު ވަނީ، ބަދަލުވަމުންދާ ވެއްޓެއްގައި ރާއްޖޭގެ ޕްރައިވެޓް ސެކްޓަރ ފައިތިލަ ހަރުކުރަމުންދާ ގޮތުގެ ފުރިހަމަކަމަށް އަލިއަޅުވާލައްވާފައެވެ. އަދި ސަރުކާރުގެ ޢުމްރާނީ ތަރައްޤީގެ މަޝްރޫޢުތައް ކުރިއަށްދާ މިންވަރަށް ތަޢުރީފުކުރައްވާ މަރުޙަބާ ވިދާޅުވެފައިވެއެވެ.
ޗައިނާއިން ރާއްޖެއަށް ކަނޑައަޅުއްވާފައި ހުންނަ ސަފީރު ހަރ އެކްސަލަންސީ ވަންގް ލީޝިން ވިދާޅުވީ، ރާއްޖެއާއި ޗައިނާއާ ދެމެދު އޮންނަ ގުޅުން ދެމެހެއްޓެނިވި ގޮތެއްގައި ތަރައްޤީވަމުން ދިއުމުގެ ފަހަތުގައިވަނީ ދެ ޤައުމުގެ ވެރިން ދެއްވާ ސްޓްރެޓީޖިކް އިރުޝާދުގެ މަތިން ކަންކަން ބައްޓަންކުރަމުންދާ ދިޔުން ކަމުގައެވެ.
މި ކޮންފަރަންސްގައި ރާއްޖެ އާއި ޗައިނާގެ ސަރުކާރުގެ އިސް އޮފިޝަލުންގެ އިތުރުން ދެ ޤައުމުގެ ވިޔަފާރިވެރިންނާއި އިންވެސްޓަރުން ބައިވެރިވެފައިވެއެވެ. އަދި ރާއްޖޭގައި ހުރި އިންވެސްޓްމަންޓުގެ ފުރުޞަތުތަކާއި، ސަރުކާރުގެ ތަރައްޤީގެ އިސްތިރާޖީ ލަނޑުދަނޑިތައް ޙާޞިލްކުރުމުގައި ބައިވެރިވުމަށް ސިޗުއާންގެ ވިޔަފާރިވެރިންނަށް ދަޢުވަތު އެރުވުނެވެ. މީގެ އިތުރުން، މި ކޮންފަރަންސްގައި ބައިވެރިވި ދެ ޤައުމުގެ ވިޔަފާރިތަކަށް ވަނީ ތަޢާރަފްވުމުގެ ފުރުޞަތު ފަހިކޮށްދެއްވާފައެވެ.
I believe that the Conference will help promote the trade and economic cooperation between the two countries. https://t.co/eJh258dJLa
— Ambassador Wang Lixin (@China_Amb_Mdv) August 6, 2024
