ހުކުރު ހުޠުބާގައި އަންނަ ވާހަކަތައް ރާއްޖޭގައި އުޅޭ ބިދޭސީ މުސްލިމުންނަށް އެނގުމަކީ މުހިއްމުކަމެއްކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ހުކުުރު ހުޠުބާގެ އިނގިރޭސި ތަރުޖަމާ އިސްލާމީ ކަންތައްތަކާ ބެހޭ ވުޒާރާގެ ފޭސްބުކް ޕޭޖުގެ ލައިވްއަށާއި އިސްލާމީ މަރުކަޒުގައި ބަހައްޓާފައިވާ ޓީވީތަކުން މުޅިން އަލަށް ގެނެސްދޭން ފަށާފައިވާއިރު، ވަޒީރު ޑރ. ޝަހީމް ވިދާޅުވީ ކުރިއަށް އޮތްތަނުގައި ބަންގްލަދޭޝް ބަހުންވެސް ތަރުޖަމާ ގެނެސްދިނުމަށް ނިންމާފައިވާކަމަށާއި އެކަމަށް މަސައްކަތް ކުރައްވަމުން ގެންދަވާކަމަށެވެ.
މީގެ އިތުރުން ކުރިއަށް އޮތް ހުކުރުން ފެށިގެން ޓީވީތަކުގެ ލައިވްއަށްވެސް ތަރުޖަމާގެ ފީޑު ދިނުމަށް ވަނީ ނިންމާފައެވެ. ތަރުޖަމާ ގެނެސްދިނުމުގެ މަސައްކަތް ކުރިއަށް ގެންދަނީ އިސްލާމީ ކަންތައްތަކާ ބެހޭ ވުޒާރާގެ އިސްލާމިކް ސްޓޫޑިއޯގެ ފަރާތުންނެވެ.
