ހުޅުމާލޭ ދުވާރުމަތީގައި ބަހައްޓާފައިވާ ގޮނޑިއާއި މޭޒު ނެގުމުގެ މަސައްކަތް އެޗްޑީސީ އިން ފަށައިފިއެވެ.
އެޗްޑީސީން ވިދާޅުވި ގޮތުގައި، ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިން، ދުވާރުމަތީގައި ބަހައްޓާފައިވާ ގޮނޑި މޭޒު ނެގުމުގެ މަސައްކަތް ކަމާބެހޭ އިދާރާތަކާ ގުޅިގެން ރަސްމީކޮށް މިއަދު ވަނީ ފަށާފައެވެ.
ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިން، ދުވާރުމަތީގައި ބަހައްޓާފައިވާ ގޮނޑި މޭޒު ނެގުމުގެ މަސައްކަތް ކަމާބެހޭ އިދާރާތަކާ ގުޅިގެން ރަސްމީކޮށް މިއަދު ވަނީ ފަށާފައި. #އެޗްޑީސީއާއެކު#މަގޭހުޅުމާލެ pic.twitter.com/PW1Y4gFpoL
— Housing Development Corporation (@hdcmaldives) August 11, 2024
ހުޅުމާލޭ ދުވާރުމަތީގައި ބަހައްޓާފައިވާ ގޮނޑިއާއި މޭޒު 10 އޮގަސްޓުގެ ކުރިން ނަގަން އެޗްޑީސީން ވަނީ އެދިވަޑައިގެންފައެވެ.
މީގެ ކުރިން އެޗްޑީސީއިން ވިދާޅުވެފައިވަނީ، ހުޅުމާލޭގެ އެކި ސަރަހައްދުތަކުގެ ދުވާރުމަތީގައި އަދި ހެޖުތެރޭގައި ކެފޭ ރެސްޓޯރެންޓް އަދި ޓޭކް-އަވޭ ޕޮއިންޓްތަކުން ގޮނޑި މޭޒު ބަހައްޓައިގެން ޚިދުމަތް ދެމުންގެންދާކަން އެ ކޯޕަރޭޝަނަށް ފާހަގަކުރެވިފައިވާ ކަމަށެވެ.
ނަމަވެސް އަދި އެއެންގުމާ އެއްގޮތަށް ގޮނޑިފަދަ ތަކެތި މަގުމަތިން ނަގާފައި ނުވާ ކަމަށް އެޗްޑީސީން ވިދާޅުވެއެވެ.
އެހެންވެ، ހުޅުމާލޭ ދުވާރުމަތީގައި ބަހައްޓާފައިވާ ގޮނޑިއާއި މޭޒު 10 އޮގަސްޓުގެ ކުރިން ނެގުމަށް އެޗްޑީސީން ވަނީ އަންގަވާފައެވެ. އަދި އެތާރީޚުގެ ނިޔަލަށް އެތަކެތި ނަގާފައި ނުވާނަމަ، ކަމާ ގުޅުންހުރި އިދާރާތަކާ ގުޅިގެން އެ ސަރަޙައްދުތައް ސާފުކުރުމުގެ މަސައްކަތްކުރައްވާނެ ކަމަށް އެޗްޑީސީން ވިދާޅުވިއެވެ.
އެދުވާރުމަތީގައި އަދި ހެޖުތެރޭގައި މޭޒާއި ގޮނޑިފަދަ ތަކެތި ބަހައްޓައިގެން ވިޔަފާރި ހިދުމަތް ދެމުން ގެންދާތީ، އެކަމުގެ ސަބަބުން އާންމުންނަށް ގިނަ ދަތިތައް ކުރިމަތިވާކަމަށާއި އެކަމުގެ ޝަކުވާ އެޗްޑީސީއަށް ލިބެމުން އަންނަ ކަމަށް އެ ކޯޕަރޭޝަނުން ވިދާޅުވެއެވެ.
ހިނގާބިނގާވެ އުޅޭ ފަރާތްތަކަށް ދަތިވާގޮތަށް ދުވާރު ބޭނުން ކުރުމާއި، ސްކޫލު ހިމެނޭ ސަރަހައްދުތަކުގައި ދުންފަތުގެ އިސްތިއުމާލު ކުރުމުގެ ސަބަބުން އާންމުންނާއި ކުޑަކުދިންނަށް ދުންފަތުގެ ދުމުގެ ނޭދެވޭ އަސަރު ކުރުން އަދި އަދަބާ ހިލާފު އިބާރާތްތަކުން މުއާމަލާތްކުރުމުގެ ޝަކުވާ ބެލެނިވެރިންގެ ފަރާތުންނާއި ސްކޫލުތަކުން ވެސް ހުށަހަޅާފައިވާ ކަމަށް އެޗްޑީސީއިން ވިދާޅުވެއެވެ.
އެޗްޑީސީއިން ވިދާޅުވީ، މިގޮތަށް ދުވާރުމައްޗާއި ހެޖުތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުސޫލުން ބޭނުން ކުރުމަކީ މަނާކަމެއް ކަމަށެވެ.
ހުޅުމާލޭ މަގުމަތީގެ ދުވާރު މަތީގައި ބަހައްޓާފައިހުރި ގޮނޑި އާއި މޭޒުނަގަން އެޗްޑީސީއިން ވަނީ މީގެކުރިން ވެސް އަންގާފައެވެ. އަދި ވިޔަފާރި ކުރާ ފަރާތްތަކުން ކަނޑައެޅިފައިވާ އުސޫލުތަކާ އެއްގޮތަށް އަމަލުކުރުމަށް އެ ކޯޕަރޭޝަނުން ވަނީ އިލްތިމާސްކުރައްވާފައެވެ.
