ރާއްޖޭގައި ފުރަތަމަ ފަހަރަށް ކުރިއަށް ގެންދެވޭ ދަނޑުވެރިކަމުގެ ބޯހިމެނުމުގައި ބޭނުންކުރާ ސުވާލުކަރުދާސް ޓެސްޓް ކުރުމާއި ދަނޑުވެރިންނާއި ބައްދަލުކޮށްލެއްވުމަށް މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑރ އާއިޝަތު ރަމީލާ ފ. އަތޮޅަށް ކުރެއްވި ދަތުރުފުޅު ނިންމަވާލެއްވުމަށްފަހު، މާލެ ވަޑައިގެންފިއެވެ. މިއީ މުޅި ރާއްޖޭގައި ފުރަތަމަ ފަހަރަށް ކުރިއަށް ގެންދެވޭ ދަނޑުވެރިކަމާއި ގުޅޭ ބޯހިމެނުމެކެއެވެ.
މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރއިން ވިދާޅުވި ގޮތުގައި، ދަނޑުވެރިކަމުގެ މި ބޯހިމެނުމަކީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އާއި، މޯލްޑިވްސް ބިއުރޯ އޮފް ސްޓެޓިސްޓިކްސް އާއި ގުޅިގެން ކުރިއަށް ގެންދާ މަސައްކަތެކެއެވެ.
މި ދަތުރުފުޅުގައި މިނިސްޓަރ ޑރ. ޢާއިޝަތު ރަމީލާ ވަނީ ފ. އަތޮޅު ދަނޑުވެރި ރަށްތަކަށްވެސް ޒިޔާރަތްކުރައްވާފައެވެ. އޮގަސްޓްމަހުގެ 8 ވަނަ ދުވަހު ފ. މަގޫދޫ އަށް ވަޑައިގެން ރަށު ކައުންސިލްއާއި ބައްދަލުކޮށް އެ ބޭފުޅުންގެ ކަންބޮޑުވުންތައް އައްސަވާ ދަނޑުވެރިކަން ކުރާ ސަރަހައްދުގެ ޙާލަތު ބެއްލެވުމުގެ ގޮތުން ދަނޑުތަކަށް މިނިސްޓަރ ޑރ އައިޝަތު ރަމީލާ ވަނީ ޒިޔާރަތް ކުރައްވާފައެވެ.ހަމަ އެ ތާރީޚްގައި ފ. ދަރަނބޫދޫ ކައުންސިލް އިދާރާގެ ބޭފުޅުން އަދި ރަށުގެ ދަނޑުވެރިންނާއިވެސް މިނިސްޓަރ ވަނީ ބައްދަލު ކުރައްވާފައެވެ. މި ބައްދަލުވުމުގައި މިނިސްޓްރީއާއި ދަރަނބޫދޫގެ ކައުންސިލް ގުޅިގެން ދަނޑުވެރިކަން ކުރިއެރުވުމަށް ކުރެވިދާނެ މަސައްކަތްތަކާއި ގުޅޭ ގޮތުން ވަނީ މަޝްވަރާކުރައްވާފައެވެ. މީގެ އިތުރުން ދިހަ އެއް އޮގަސްޓްގައި ފ. ނިލަންދޫ ކައުންސިލްގެ ބޭފުޅުންނާއި، އަދި ފ. އަތޮޅު ކައުންސިލްއާއިވެސް މިނިސްޓަރ ވަނީ ބައްދަލު ކުރައްވާފައެވެ.
ދަތުރުފުޅު ނިންމަވާލެއްވުމަށްފަހު މިނިސްޓަރ ރަމީލާ އެނބުރި މާލެ ވަޑައިގެންފައިވަނީ ދިހައެއް އޮގަސްޓްގައެވެ.
