މީގެ 20 އަހަރު ކުރިން ދިވެހިން ތެދުވީ އަނިޔާވެރި ވެރިކަމަކާ ދެކޮޅަށް ކަމަށް އެމްޑީޕީގެ ޗެއާޕާސަން އަދި ކުރީގެ އިޤްތިސާދީ ވަޒީރު ފައްޔާޒް އިސްމާޢީލް ވިދާޅުވެއްޖެއެވެ.
ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި ކުރީގެ މިނިސްޓަރު ފައްޔާޒް އެކްސްގައި އާންމު ކުރެއްވި ޕޯސްޓެއްގައި، ފައްޔާޒް ވަނީ އޮގަސްޓް 12-13 ގައި ހިނގި ތާރީޚީ މުޒާހަރާގެ ހަނދާން އައު ކުރައްވާފައެވެ.
އޭރު ރާއްޖޭގެ ރައީސް ކަމުގައި ހުންނެވީ ރައީސް އަލްއުސްތާޒް މައުމޫން ޢަބްދުލްޤައްޔޫމެވެ. އެމަނިކުފާނު ވަނީ އިސްލާޙީ އެޖެންޑާގެ ދަށުން އައު ޤާނޫނު އަސާސީއެއް ވުޖޫދުކުރައްވައި، މަލްޓި ޕާޓީ ޑިމޮކްރެސީގެ ހަމަތަކުގެ މަތިން 2008 ވަނަ އަހަރުގެ ރިޔާސީ އިންތިޚާބު ބާއްވަވައި، އެ އިންތިޚާބުން ބަލިވެވަޑައިގަތުމުން ޑިމޮކްރެސީގެ ރީތި އުސޫލު ދައްކަވައި ޤައުމުގެ ހަމަޖެހުމަށް އިސްކަންދެއްވައި، ވެރިކަމާ ދުރަށް ވަޑައިގަންނަވާފައެވެ.
ރައީސް މައުމޫނަކީ ޚުދުމުޚްތާރު ވެރިއެއް ކަމަށް އެމްޑީޕީން އޭރުވެސް ސިފަކުރައްވަމުން ގެންދެވިއެވެ. ނަމަވެސް 2018 ވަނަ އަހަރު ރިޔާސީ އިންތިޚާބު އެމްޑީޕީއަށް ކާމިޔާބު ކުރެވުނީ ރައީސް މައުމޫނުގެ ތާޢީދާއެކުގައެވެ. އެކަން މެދުވެރިވީ، އެމަނިކުފާނުގެ ކޮއްކޯފުޅު ރައީސް ޔާމީންގެ ވެރިކަމުގައި ހުންނަވައިގެން އެމަނިކުފާނު ނުހައްޤުން ޖަލަށް ލެއްވުމާ ގުޅިގެން އުފެދުނު ދެ ބަސްވުންތަކުގެ ސަބަބުންނެވެ.
20 އަހަރު ކުރިން، ދިވެހިން ތެދުވީ އަނިޔާވެރި ވެރިކަމަކާ ދެކޮޅަށް ކަމަށާއި، އޭރުގެ ޒުވާނުން ގޮވާލީ ސިޔާސީ އަނިޔާއާއި ބިރުވެރިކަމުން މިނިވަންވާން ކަމަށް ފައްޔާޒް އިސްމާޢީލް ވިދާޅުވިއެވެ.
މިއަދުވެސް، ފަހަކަށްއައިސް ހޯދާފައިވާ ޑިމޮކްރެޓިކް ކުރިއެރުންތަކާމެދު ޔަޤީންކަން ނެތް ދަނޑިވަޅެއްގައި، ޒުވާނުން ވާންޖެހެނީ ހޫނު ލޭއާއި ދަގަނޑުން ހޯދާފައިވާ ކުރިއެރުންތައް ދިފާޢުކޮށް ރައްކާތެރިކުރުމުގެ އިސްސަފުގައި ތިބޭ ބަޔަކަށް ކަމަށް ފައްޔާޒް ވިދާޅުވިއެވެ.
މީގެއިތުރުން ތަރައްޤީގައި މިއަދުގެ ޒުވާނުންގެ ހިއްސާ އިތުރު ކުރަން ޖެހޭ ކަމަށާއި ޤައުމު ބައްޓަންކޮށް، އެންމެންނަށް ފާގަތި މުސްތަޤުބަލެއް ކަށަވަރުކޮށްދޭ ދިނުމުގައި ޒުވާނުން ތެދުވެތިބެން ޖެހޭ ކަމަށް ފައްޔާޒް ވިދާޅުވިއެވެ.
