މޭމަހު ހުޅަނގު މޫސުން ފެށި ކުރާ ވިއްސާރައަށް ފަހު، އޮގަސްޓު މަހަކީ ރާއްޖޭގެ ބޮޑު ބަޔަކަށް ދެން އެންމެ ވާރޭވެހެން ފަށާ މަހެވެ. ހުޅަނގު މޫސުމުގެ ވިއްސާރަ ރާއްޖެއަށް ފެށެނީ އިންޓަރ ޓްރޮޕިކަލް ކޮންވާޖަންސް ޒޯން (ދުނިޔޭގެ އުތުރު ބިތާއި ދެކުނު ބިތުން (ދެ ހެމިސްފިއަރއިން) ޖެހޭވައި އައިސް ގުޅޭ ހިސާބުގައި އުފެދޭ ވިއްސާރަ ވިލާގެ ބެލްޓް، ދެކުނުން އައްޑު ސަރަހައްދަށް މޭމަހުގައި އެރުމުންނެވެ.
އަދި މަޑުމަޑުން މެދުރާއްޖޭގެ އަތޮޅުތަކަށާއި އުތުރަށް ފެތުރި، އިންޑިޔާ އަދި ދެކުނު އޭޝީއާގެ އެހެން ގައުމުތަކާ ހަމައަށް ފޯރައެވެ. އަދި އިރު ވަށާ ދުނިޔެ ދައުރުކުރަމުން ދާގޮތުން މި ބެލްޓް އޯގަސްޓް މަހުތެރޭ މަޑުމަޑުން އަނެއްކާވެސް ދެކުނަށް ޖެހެއެވެ. އެގޮތުން ދެކުނު އިންޑިއާ ފަސްދޭން ފަށާ، ރާއްޖެ މައްޗަށް އެރުމަށް ފަހު ޑިސެންބަރުމަސްތެރޭ އައްޑު އަތޮޅު ފަސްދިނުމުން ރާއްޖެ ސަރަހައްދަށް އިރުވައި ފެށިގެންދެއެވެ.
މި ދައުރުވާ ދައުރުވުން އެކިއަހަރު ކޮންމެވެސް ވަރެއްގެ ތަފާތުތަކެއް ގެނުވާ އިތުރުކަންކަން ހުރެއެވެ. އެއިން ފުރަތަމަ ކަމަކީ ދިގުމުއްދަތަކަށް ބޮޑު ސަރަހައްދަކަށް އަންނަ ބަދަލުތަކެވެ. މިދުވަސްވަރު އެގޮތުން ފާހަގަކުރެވެނީ އިންޑިއަން އޯޝަން ޑައިޕޯލް (އައިއޯޑީ) ޕޮޒިޓިވް ހާލަތުގައި ހުރުމެވެ. މިހާލަތުގައި ހުޅަނގު އިންޑިއާ ކަނޑުގެ ހޫނުމިން އިރުމަތީ ބިތަށްވުރެއް މަތިވެއެވެ. އެހެންކަމުން ރާއްޖެ ސަރަހައްދުގައި ވިއްސާރަވިލާ އުފެދުމުގެ ފުރުސަތު ބޮޑުވެއެވެ.
ދެވަނަ ކަމަކީ ކުރުމުއްދަތަކަށް ކުޑަސަރަހައްދަކަށް އަންނަ ބަދަލުތަކެވެ. އެގޮތުން މިދުވަސްވަރު ފާހަގަކުރެވެނީ މޭޑަން ޖޫލިއަން އޮސިލޭޝަން (އެމްޖޭއޯ) އޭކިޔާ ދައުރުވުމެއް މިސަރަހައްދުގައި ބާރުގަދަވުމެވެ. އެމްޖޭއޯއަކީ ދުނިޔޭގެ ޓްރޮޕިކަލް ސަރަހައްދުގައި ހުޅަނގުން އިރަށް ދައުރުވާ ދައުރުވުމަކަށް ކިޔާނަމެކެވެ. އެމްޖޭއޯ ބާރުގަދަ ވާއިރު ވައިގަދަވުމާއި ވިއްސާރަވިލާ އުފެދުމުގެ ފުރުސަތު ބޮޑުވެއެވެ.
އެމްޖޭއޯ ދުނިޔެވަށާ ދައުރު ވަނީ ގާތްގަނޑަކަށް 45 ދުވަހުގެ ތެރޭގައެވެ. އެގޮތުން 12 އޯޖަސްޓްހާތާ އެމްޖޭއޯ އިރުމަތީ އެޕްރިކާ ސަރަހައްދު ދޫކޮށް އަރަބި ކަނޑު ސަރަހައްދަށް އަރާ، 18 އޯގަސްޓްހާއިރަށް ރާއްޖެމަތިން އިރަށް ޖެހޭނެކަމަށް ބެލެވެއެވެ. އެމްޖޭއޯގެ ސަބަބުން ބޮޑަށް މޫސުން ގޯސްވެގެންދަނީ އެއަށް ބާރުދޭނެ އިތުރު ކަންކަން ހުރުމުންނެވެ. މިހަފްތާއަށް ބަލާނަމަ އެއީ އިންޓަރ ޓްރޮޕިކަލް ކޮންވާޖަންސް ޒޯންގެ ވައި އަދި ޕޮޒިޓިވް އައިއޯޑީގެ ކަނޑުގެ ހޫނުކަމެވެ.
މި މަޢުލޫމާތު ހިއްސާކޮށްފައިވަނީ މޯލްޑިވްސް މީޓޮރޮލޮޖިކަލް ސާރވިސްއިން
