އިލެކްޓްރޯނިކް ގަވަރމަންޓް ޕްރޮކިއުމަންޓް (އީ-ޖީޕީ) ސިސްޓަމް އަކީ ޓްރެޑިޝަނަލް ޕްރޮކިއުމަންޓް މެތަޑްތަކުގެ ޑިޖިޓަލައިޒޭޝަން ޕްރޮސެސްއެއް ކަމަށާއި އީ-ޖީޕީ ސިސްޓަމާއެކު ޚަރަދުތަކުގެ ޓްރާންސްޕޭރެންސީ އިތުރުވެގެންދާނެ ކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ފިނޭންސް މިނިސްޓްރީން ވިދާޅުވީ، އިލެކްޓްރޯނިކް ގަވަރމަންޓް ޕްރޮކިއުމަންޓް (އީ-ޖީޕީ) ސިސްޓަމް އަކީ ޓްރެޑިޝަނަލް ޕްރޮކިއުމަންޓް މެތަޑްތަކުގެ ޑިޖިޓަލައިޒޭޝަން ޕްރޮސެސްއެއް ކަމަށާއި، މި ގޮތުން ފުޅާ ދާއިރާއެއްގައި ދިރާސާކޮށް ރާއްޖެއަށް އެންމެ އެކަށީގެންވާ ނިޒާމެއްގެ ގޮތުގައި އިހްތިޔާރުކުރެވިފައިވަނީ އެސް.އޭ.ޕީ އަރީބާ ކަމުގައެވެ.
"މި ނިޒާމް ގާއިމްކުރުމުގެ މައިގަނޑު މަގުސަދަކީ ދައުލަތުގެ ޕްރޮކިއުމަންޓް ހަރަކާތްތަކުގެ ޓްރާންސްޕޭރެންސީ، އެފިޝަންސީ އަދި ކޮސްޓް އިފެކްޓިވްކަން އިތުރުކުރުމެވެ. މި ފެށުނު މަސައްކަތް ރަމްޒުކޮށްދެނީ ޕްރޮކިއުމަންޓް ޕްރޮސެސްތައް ޒަމާނީކޮށް ކުރިއެރުވުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެކެވެ." ފިނޭންސް މިނިސްޓްރީން ވިދާޅުވިއެވެ.
މި މަސައްކަތުގެ އެންމެ ބޮޑު އެއް ބޭނުމަކީ ޚަރަދު ކުޑަކޮށް ވަގުތު ސަލާމަތްކުރުން ކަމަށާއި، ޕްރޮކިއުމަންޓް ޕްރޮސެސްތައް އޮޓޮމޭޓްކޮށް، ސްޓްރީމްލައިންކޮށްގެން، މިހާރު ހިނގާ އިދާރީ ޚަރަދުތައް ކުޑަކުރެވި، ޕްރޮސެސިންގ ވަގުތުތައް ކުރުވެ، ވަސީލަތްތައް މިހާރަށްވުރެ ހަރުދަނާގޮތެއްގައި ބޭނުންކުރުމަށް މަގުފަހިވެގެންދާނެ ކަމަށް އެ މިނިސްޓްރީން ވިދާޅުވެއެވެ.
ފިނޭންސް މިނިސްޓްރީން ވިދާޅުވި ގޮތުގައި، އަރީބާ ސިސްޓަމާއެކު މިހާރު ތަފާތު އެކި ޕްލެޓްފޯމްތަކުން ކުރިއަށްގެންދާ ޕްރޮކިއުމަންޓުގެ ކަންތައްތައް އެއް ޕްލެޓްފޯމަކުން ކުރިއަށް ގެންދެވޭނެއެވެ. މިކަމުގެ ސަބަބުން ސަޕްލަޔަރުންނަށް އެއް ޕްލެޓްފޯމަކުން ދައުލަތުގެ ހުރިހާ ޕްރޮކިއުމަންޓުތަކުގައި ބައިވެރިވުމުގެ މަގުފަހި ވެގެންދާނެއެވެ. އަދި މުއާމަލާތްތައް ފަސޭހަވެ، ކޯޑިނޭޝަން ރަނގަޅުވެ، ޕަބްލިކް ފައިނޭންސް ފަންކްޝަންތަކުގައި އަވަސް ނިންމުންތަކެއް ނިންމުމަށް މަގުފަހިވެގެންދާނެ އެވެ.
މީގެ އިތުރުން، އަރީބާއަކީ މިހާރުގެ ބޭނުންކުރާ އެސް.އޭ.ޕީ ސިސްޓަމާ ފަސޭހަކަމާއެކު އިންޓަރގްރޭޓްކުރެވޭ ސިސްޓަމަކަށްވުމުން، ޕްރޮކިއުމަންޓް ޕްރޮސެސްތަކަށް އިތުރު ކުރިއެރުންތަކެއް ލިބިގެން ދާނެ ކަމަށް ފިނޭންސް މިނިސްޓްރީން ވިދާޅުވިއެވެ.
ފިނޭންސް މިނިސްޓްރީން ވިދާޅުވީ، މި ސިސްޓަމާއެކު ޚަރަދުތަކުގެ ޓްރާންސްޕޭރެންސީވެސް އިތުރުވެގެންދާނެ ކަމަށާއި، އައު ނިޒާމުގެ ސަބަބުން ޕްރޮކިއުމަންޓްގެ ޑޭޓާތަކާއި ޕްރޮކިއުމަންޓާ ގުޅޭ އިތުރު މައުލޫމާތުތައް ފަސޭހައިން ލިބޭނެ ކަމަށާއި، މިކަމުގެ ސަބަބުން ޚަރަދުތައް ރަނގަޅަށް ޓްރެކްކޮށް މެނޭޖްކޮށް، ވަގުތުން ރިޕޯޓްތައް އުފެއްދުމަށް މަގުފަހިވެގެންދާނެ ކަމުގައެވެ.
