އެކި ޤައުމުތަކުން ފަންޑު ހޯދުމަށް ސަރުކާރުން ކުރައްވަމުން ގެންދަވާ މަސައްކަތްތަކުގައި ފެހި ސިގްނަލް ލިބިފައިވާކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ރާއްޖޭގެ މާލީ އަދި އިގްތިސާދީ ހާލަތާ ގުޅޭގޮތުން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.
މިއަދު ރައީސުލްޖުމްހޫރިއްޔާގެ އޮފީހުގައި ނޫސްވެރިންނާ ބަދަލުކުރައްވާ ވާހަކަފުޅު ދައްކަވަމުން ޚާރިޖީ ވަޒީރު މޫސާ ޒަމީރު ވިދާޅުވީ އެކި ޤައުމުތަކާއި ރާއްޖެއާ ދެމެދު އޮންނަ ދޭދޭ ގުޅުން ބަދަހިކުރުމަށާއި، ބައިނަލްއަގުވާމީ ޖަމްޢިއްޔާތަކާ އޮންނަ ގުޅުން ބަދަހިކުރުމަށް ފާއިތުވި ދުވަސްތަކުގައި މަސައްކަތް ކުރައްވާފައިވާކަމަށެވެ.
ޗައިނާގެ ޚާރިޖީ ވަޒީރުގެ ދައުވަތަކަށް އެ ޤައުމަށް ކުރެއްވި ދަތުރުފުޅުގައި އެ ޤައުމަށް ދައްކަން ޖެހޭ ލޯނު ދެއްކުމުގައި ލުއިގޮތްތަކެއް ހޯދުމަށް މަޝްވަރާކުރެއްވި ކަމަށާއި، އިންޑިއާގެޚާރިޖީ ވަޒީރު ރާއްޖެއަށް ކުރެއްވި ދަތުރުފުޅުގައިވެސް އެ މަޝްވަރާތައް ކުރައްވާފައިވާނެ ކަމަށް ވަޒީރު ވިދާޅުވިއެވެ.
އިތުރު ފަންޑިން ހޯދުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ދަށުން ފާއިތުވި ދުވަސްތަކުގައި މެދުއިރުމަތީގެ ޤައުމުތަކަށް ވަޑައިގެންނެވިކަމަށާއި، އެ މަސައްކަތުގައި ފެހި ސިގްނަލް ލިބިފައިވާ ކަމަށާއި، ފަންޑު ހޯދުމަށް އިތުރު މަސައްކަތްތަކެއްވެސް ކުރައްވަމުންގެންދަވާކަމަށް ޚާރިޖީ ވަޒީރު ވިދާޅުވިއެވެ.
"އިތުރަށް ފަންޑިންގެ ކަންކަމުގައި މަސައްކަތްކުރުމަށް މެދުއިރުމަތީގެ ބައެއް ޤައުމުތަކަށް ރައީސުލްޖުމްހޫރިއްޔާގެ ސިޓީފުޅާއެކު އަޅުގަނޑު ދަތުރުކޮށްފިން. މި ހުރިހާ ކަމެއްގައިވެސް އިރާދަކުރެއްވިއްޔާ ގްރީން ސިގްނަލް ލިބިގެން އޭގެ ފްލޯއަޕް މަސައްކަތް ކުރަމުން އެބަދޭ." ޚާރިޖީ ވަޒީރު މޫސާ ޒަމީރު ވިދާޅުވިއެވެ.
ޚާރިޖީ ވަޒީރު ވިދާޅުވީ ސަރުކާރުން މިހާރު ކުރައްވަމުން ގެންދަވާ މަސައްކަތްތަކުން ރާއްޖޭގައި ޑޮލަރުގެ އާމްދަނީ އިތުރުކުރެވޭނެ ކަމަށެވެ. އަދި ކޮވިޑުގެ ފަހުން ދިމާވި މާލީ ދަތިތަކާއި ފަހުން ކުރިމަތިވި އިޤްތިޞާދީ ދަތިތައް ފިލުވުމަށް ވަގުތު ބޭނުންވާކަން ފާހަގަކުރައްވައި ޚަރިޖީ ވަޒީރު މޫސާ ޒަމީރު ވިދާޅުވީ އެކުގައި ކުރެވޭ މަސައްކަތްތަކުން އެ ދަތިތައް ހައްލުކުރެވޭނެ ކަމަށެވެ.
