ހިކަނދި ފަތް ގިނަ ދުވަހު ބެހެއްޓުމަށް ކަންތައް ކުރަންވީ ގޮތަކީ މީ

ހިކަނދި ފަތަކީ ދިވެހިންގެ ކެއުމުގައި މުހިންމު ދައުރެއް އަދާ ކުރާއެއްޗެކެވެ. އާންމުކޮން ލައިގެންކާ އެއްޗެހި ތައްޔާރު ކުރުމަށް ހިކަނދި ފަތަކީ މުހިންމު އެއްޗެކެވެ. މީގެ އިތުރުން ހިކަނދި ފަތަކީ ގިނަ ފައިދާ ތަކެއްވެސް ހިމެނޭ އެއްޗެކެވެ. އެހެންވެ ހިކަނދި ފަތް ވެފައިވަނީ ބަދިގޭގެ ރަސްކަން ކުރާ އެއްޗެއްގެ ގޮތުގައިއެވެ.

މި ފަތް ގަހުން ނައްޓާލުމަށްފަހު މޯޅި ނުވެ ބަހައްޓަން ވަރަށް އުނދަގުލެވެ. އަދި މަޑުމަޑުން ކަޅުވެ ފަތުގެ ރަހަ އެއްކޮށް ގެއްލެއެވެ. ހިކަނދިފަތަކީ އޭގައި އެއްވެސް ތެތްކަމެއް ނުވަތަ މޮއިސްޗަރ އެއް ހުންނަ އެއްޗެއް ނޫނެވެ. އެހެންވެ، އެއީ ގިނަދުވަހުގައި ބެހެއްޓުމަށް ވަރަށް އުދަނގޫ އެއްޗެކެވެ.

ނަމަވެސް ޒަމާނާއި އެކުގައި ތަފާތު އީޖާދުތައް ކުރަމުން ގޮސް ބަދީގޭގައި އުޅޭ އަންހެންވެރިން ވަނީ ހިކަނދިފަތް ގިނަ ދުވަހުގައި ބެހެއްޓުމަށް ތަފާތު އުކުޅުތައް އީޖާދުކޮށްފައެވެ. އެގޮތުން މި ފަތް ގިނަ ދުވަހު ބެހެއްޓުމަށް އެންމެ ފުރަތަމަ ފަތްކޮޅު ތަނޑިން ވަކިކޮށްލުމަށް ފަހު މަތި ބާރު ކުރެވޭ އެއްޗެއްގެ ތެރެއަށް ތެތް ޓީޝޫއެއް ލުމަށްފަހުގައި ފަތްކޮޅު އަޅައިލާށެވެ. މިހެން ހެދުމުން ދެހަފްތާ އެއްހައި ދުވަހަށް ތާޒާކަންމަތީ ބެހެއްޓޭނެއެވެ.

ދެން އޮތް ގޮތަކީ ހިކަނދި ފަތް ކޮޅު ރަނގަޅަށް ސާފުކޮށްލުމަށްފަހު، ތަނޑިން ފަތްކޮޅު ވަކިކޮށްލާށެވެ. އަދި އައިސްކިއުބް ޓްރޭއަކަށް ފަތްކޮޅުއަޅައިލާށެވެ. ރަނގަޅުވާނީ ބޮޑެތި ކިއުބް ގެ ޓްރޭއެކެވެ. އެއަށް ފަހު އެކަށީގެން ވާ ވަރުގެ ފަތްކޮޅެއް އެޅުމަށްފަހު ފެން އަޅާ ގަނޑުކޮށްލާށެވެ. މިހެން ހެދުމުން ފަތްކޮޅު ތާޒާކަންމަތީ ހުންނާނެވެ.

ހިކަނދި ފަތުގައި ހިމެނޭ ބައިތަކުގެ ތެރޭގައި ކާބޯހައިޑްރޭޓް، ފައިބަރު، ކެލްސިއަމް، ފޮސްފަރަސް، އަޔަން، މެގްނީޒިއަމް، ޒިންކް، އަދި މަލްޓިވިޓަމިންސް ހިމެނެއެވެ.  ހިކަނދި ފަތަކީ ފަސޭހައިން ލިބެން ހުންނަ މީގެ އިތުރުން ފަސޭހައިން ހައްދައިވެސް ލެވޭ ގަހެކެވެ. އަދި ރާއްޖެ އިން އާންމުކޮން ފެންނަ މި ގަހަކީ އަތޮޅުގެ ރަށްރަށުގައި އާންމު އެއްޗެކެވެ. މި ފަތުން ލިބޭ ފައިދާ އަށް ބަލާއިރުގައި މީގެން ކޮލެސްޓްރޯލް ލެވެލް ދަށްކޮށްދެއެވެ. މީގެ އިތުރުން ހަޖަމުކުރުން އިތުރުކޮށްދީ އިސްތަށިގަނޑު ހެދި ބޮޑުވުމަށް އެހީތެރިވެދެއެވެ. މީގެ އިތުރުން ބެކްޓީރިއާ ނައްތާލަނީ ބަރުދަން ލުއިކުރުމަށްވެސް އެހީތެރިވެދެއެވެ.