ﷲ އަށް ތަޤްވާވެރިވެ އެކަލާނގެއަށް އަޅުކަންކޮށް ނަމާދު ޤާއިމު ކުރުމުން، ތިބާ ޙިސާބުވެސް ކޮށްނުލާފަދަ އަދި ތިބާ ހީވެސްނުކުރާފަދަ ގޮތްގޮތުން ތިބާއަށް ރިޒްޤު އަންނާނެތެވެ.
އިބްނު ކަޘީރު (774ހ.) ވިދާޅުވިއެވެ:
«އަދި އެކަލާނގެ ބަސްފުޅު: ﴿لَا نَسْأَلُكَ رِزْقًا نَحْنُ نَرْزُقُكَ﴾
"ރިޒްޤު ދެއްވުމަކަށް ކަލޭގެފާނުގެ ކިބަޔަކުން ތިމަން އިލާހު އެދިވޮޑިއެއް ނުގަންނަވަމެވެ. ކަލޭގެފާނަށް ރިޒްޤު ދެއްވަނީ، ތިމަންއިލާހެވެ."
[سُورَةُ طه: ١٣٢]
ޔަޢްނީ: ތިބާ ނަމާދު ޤާއިމްކޮށްފި ކަމުގައިވާނަމަ، ތިބާ ޙިސާބުވެސް ނުކުރާހާ ގޮތްގޮތަށް ތިބާއަށް ރިޒްޤު އަންނާނެ ކަމުގައެވެ. އެއީ އެކަލާނގެ ވަޙްޔު ކުރެއްވި ފަދައިންނެވެ: ﴿وَمَنْ يَتَّقِ اللَّهَ يَجْعَلْ لَهُ مَخْرَجًا * وَيَرْزُقْهُ مِنْ حَيْثُ لَا يَحْتَسِب﴾
"އަދި ﷲ އަށް ތަޤްވާވެރިވާމީހާ (ދަންނާށެވެ!) އެ އިލާހު އޭނާއަށް ނުކުންނާނެ މަގެއް ދައްކަވާނެއެވެ. އަދި ހީވެސް ނުކުރާފަދަ ގޮތްގޮތުން އެ އިލާހު އޭނާއަށް ރިޒްޤު ދެއްވާނެތެވެ."
[الطَّلَاقِ: ٢ – ٣]
އަދިވެސް އެކަލާނގެ ވަޙްޔު ކުރެއްވިއެވެ: ﴿وَمَا خَلَقْتُ الْجِنَّ وَالإنْسَ إِلا لِيَعْبُدُونِ * مَا أُرِيدُ مِنْهُمْ مِنْ رِزْقٍ وَمَا أُرِيدُ أَنْ يُطْعِمُونِ * إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ﴾
"އަދި ތިމަން އިލާހަށް އަޅުކަން ކުރުމަށްޓަކައި މެނުވީ، ޖިންނީންނާއި އިންސީން ނަހައްދަވަމެވެ. އެ މީހުންގެ ކިބަޔަކުން ތިމަން އިލާހު ރިޒްޤަކަށް އެދިވޮޑިއެއް ނުގަންނަވަމެވެ. އަދި ކާންދިނުމަކަށްވެސް އެދިވޮޑިއެއް ނުގަންނަވަމެވެ. ހަމަކަށަވަރުން ﷲ އީ ރިޒްޤު ދެއްވާ، ގަދަފަދަވަންތަ ބާރުގެ ވެރި އިލާހެވެ."
[الذَّارِيَاتِ: ٥٦ – ٥٨]»
[تفسير ابن كثير: ٥/٣٢٧]
