ރޭ ދަންވަރުގެ ވަގުތެއްގައި ހިޔާ ފްލެޓުތަކުގެ އެޕާޓްމަންޓަކުން ރޮއިހޭރި އެހީއަށް އެދެމުން ދިޔަ އަންހެނެއް ސަލާމަތްކޮށް ކުށުގެ ތުހުމަތު ކުރެވޭ ދެ މީހަކު ހައްޔަރުކޮށްފިއެވެ.
މި މައްސަލައިގައި ފުލުހުން ހައްޔަރު ކުރި ދެ މީހުންނަކީ، ހ. މާމިޔާ އަހުމަދު އުވެއިސް (20 އ) އަދި މއ. ތުރީމޫންސް، މުހައްމަދު މުމީތު (39 އ) ކަމަށެވެ.
މިކަމާ ގުޅިގެން މީޑިއާތަކަށް ފޮނުވި މެސެޖެއްގައި ފުލުހުން ވިދާޅުވީ، އަންހެނަކު ސަލާމަތްކޮށްދޭން އެދި ރޯ އަޑުއިވޭތީ ފުލުހުން އެޕާޓްމަންޓަށް ދިއުމުން އެ ގެއަށް ވަދެވޭ ގޮތެއް ނުވި ކަމަށެވެ.
ފުލުހުން ވިދާޅުވީ، ދޮރު ހުޅުވުމަށް އެދުމުން، އެ އެޕާޓްމަންޓުގައި ކަމެއް ނުހިނގާކަމަށް ބުނެ ދެ މީހަކު ދޮރު ހުޅުވުމަށް ފަހު އަނެއްކާވެސް ދޮރު ލައްޕައި ތަޅުލިކަމަށެވެ.
ދެވަނަ ފަހަރަށް ވެސް ސަލާމަތްކޮށް ދޭން އެދި އަންހެނަކު ހަޅޭއްލަވާ އަޑަށް، ދޮރު ހުޅުވުމަށް ތަކުރާރުކޮށް ބުނެ ނުހުޅުވުމުން ބާރުގެ ބޭނުންކޮށްގެން ދޮރު ހުޅުވައި އަންހެން މީހާ ސަލާމަތް ކުރިކަމަށް ފުލުހުން ވިދާޅުވެފައިވެއެވެ.
މިކަމާ ގުޅޭ އިތުރު ތަފްސީލެއް އަދި ހާމަކުރައްވާފައެއް ނުވެއެވެ.
